សារសំឡេងថ្មីមួយ របស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាផ្ញើជូនជនរួមជាតិ បានឱ្យដឹងថា ព្រះរាជពិធីបុណ្យអុំទូកនៅក្នុងរាជធានីភ្នំពេញ នាឆ្នាំនេះ ត្រូវបានផ្អាកសិន ហើយមូលហេតុនៃការផ្អាក មិនមែនដោយសារតែរាជរដ្ឋាភិបាលអស់ថវិកា ដូចការវិភាគរបស់ជនមួយចំនួននោះឡើយ។
សារសំឡេងរបស់ សម្តេចតេជោ ហ៊ុន សែន បានធ្វើឡើងនៅព្រឹកថ្ងៃព្រហស្បតិ៍ ទី១៥ ខែកញ្ញា ឆ្នាំ២០២២, ដោយសម្ដេចបានបញ្ជាក់ថា មានមូលហេតុពីរដែលនាំឱ្យសម្តេចសម្រេចផ្អាកព្រះរាជពិធីបុណ្យអុំទូកនៅរាជធានីភ្នំពេញ ដោយសារការរាតត្បាតជំងឺកូវីដ-១៩ មិនទាន់បិទបញ្ចប់ទាំងស្រុង ហើយមូលហេតុធំមួយទៀតនោះ គឺកម្ពុជាត្រូវទទួលធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន ដែលនឹងត្រូវរៀបចំដំណាលគ្នានឹងថ្ងៃប្រារព្ធព្រះរាជពិធីបុណ្យអុំទូក។
សម្ដេចតេជោ ហ៊ុន សែន បានថ្លែងក្នុងសារសំឡេងថា យើងមិនខ្វះលុយសម្រាប់ដោះស្រាយបញ្ហាត្រឹមបុណ្យអុំទូកនោះទេ ព្រោះក្នុងមួយខែយើងបានបញ្ចេញថវិកាប្រមាណ ៤០លានដុល្លារ ដើម្បីជួយដល់ប្រជាជនក្រីក្ររបស់យើង, យើងផ្តល់អាទិភាពសម្រាប់ប្រជាជនក្រីក្រ ហើយយើងក៏មិនខ្វះលុយត្រឹមតែព្រះរាជពិធីបុណ្យអុំទូក ដែលចាយត្រឹមតែ៤ ទៅ៥លានដុល្លារប៉ុណ្ណោះ។ នេះមិនមែនជាមូលហេតុពិតប្រាកដនៃការផ្អាកព្រះរាជពិធីបុណ្យអុំទូកនោះទេ ប៉ុន្តែយើងគោរពចំពោះអ្នកវាយតម្លៃខុស យើងសូមកោតសរសើរចំពោះអ្នកវាយតម្លៃខុសបែបនេះ ដែលពួកគេនៅតែជាអ្នកបរាជ័យមួយជីវិត។
សម្តេចតេជោ ហ៊ុន សែន បានលើកឡើងថា ចាប់ពីថ្ងៃទី០៧ ដល់ ថ្ងៃទី០៩ ខែវិច្ឆិកា មានការបំពេញទស្សនកិច្ចជាផ្លូវការពីសំណាក់នាយករដ្ឋមន្ត្រីវៀតណាម នាយករដ្ឋមន្ត្រីចិន និងប្រធានាធិបតីហ្វីលីពិន។ លុះនៅថ្ងៃទី១០ ដល់ ថ្ងៃទី១៣ ខែវិច្ឆិកា ដដែលកម្ពុជាត្រូវរៀបចំកិច្ចប្រជុំកំពូលអាស៊ាន។ ក្រៅតែពីកម្មវិធីដ៏ធំខាងលើនេះហើយ យើងក៏នៅមានការរៀបចំពិធីបុណ្យឯករាជ្យជាតិទៀត ដែលធ្វើឱ្យរាជរដ្ឋាភិបាល ពិបាកក្នុងការត្រៀមលក្ខណៈក្នុងការរក្សាសន្តិសុខ។
សម្តេចតេជោ ហ៊ុន សែន បានបញ្ជាក់ជូនជនរួមជាតិទៀតថា បន្ទាប់ពីកិច្ចប្រជុំកំពូលអាស៊ាននៅកម្ពុជាហើយនោះ ក្នុងឋានៈជាប្រធានអាស៊ាន សម្តេចនឹងត្រូវអញ្ជើញទៅកាន់កោះបាលី ប្រទេសឥណ្ឌូនេស៊ី ចូលរួមកិច្ចប្រជុំG20, បន្ទាប់មកអញ្ជើញទៅក្រុងបាងកក ប្រទេសថៃ ចូលរួមកិច្ចប្រជុំ APEC ដូច្នេះឃើញថា យើងជាប់មមាញឹកច្រើន៕ ពិសិដ្ឋ CEN
