ភ្នំពេញ ៖ ពិព័រណ៍ចិន-អាស៊ាន លើកទី១៩ ត្រូវបានប្រារព្ធធ្វើឡើងនៅទីក្រុងណាននីង ប្រទេសចិន តាមប្រព័ន្ធវីដេអូ នាព្រឹកថ្ងៃសុក្រ ទី១៦ ខែកញ្ញា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន បានអញ្ជើញថ្លែងសុន្ទរកថា ផ្ដោតលើការពង្រីកវិសាលភាពនៃកិច្ចសហប្រតិបត្តិការសេដ្ឋកិច្ចរវាងអាស៊ាន និងចិន ឲ្យកាន់តែទូលំទូលាយ និងស៊ីជម្រៅបន្ថែមទៀត។
សូមបញ្ជាក់ថា ពិព័រណ៍ចិន-អាស៊ាន គឺជាវេទិកាដ៏មានសារៈសំខាន់ក្នុងការផ្សព្វផ្សាយផលិតផលរវាងចិន និងអាស៊ាន ហើយក៏ជាឱកាសក្នុងការជំរុញការធ្វើពាណិជ្ជកម្ម និងធុរកិច្ចរវាងចិន និងអាស៊ានផងដែរ។ ព្រឹត្តិការណ៍ដ៏សំខាន់នេះ ធ្វើឡើងក្រោមប្រធានបទ «ការចែករំលែកកាលានុវត្តភាពថ្មី ដែលទទួលបានពីភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប) ដើម្បីស្ថាបនាតំបន់ពាណិជ្ជកម្មសេរីចិន-អាស៊ាន ទម្រង់ថ្មី ៣.០»។
សុន្ទរកថា របស់ សម្ដេចតេជោ ហ៊ុន សែន បានបង្ហាញខ្លឹមសារថា ជាការពិតកិច្ចសហប្រតិបត្តិការសេដ្ឋកិច្ច អាស៊ាន និងចិន សម្រេចបាននូវសមិទ្ធផលប្រកបដោយផ្លែផ្កាជាច្រើន ចាប់តាំងពីការចុះហត្ថលេខាលើក្របខ័ណ្ឌកិច្ចព្រមព្រៀងស្ដីពីកិច្ចសហប្រតិបត្តិការ សេដ្ឋកិច្ចគ្រប់ជ្រុងជ្រោយ រវាង អាស៊ាន-ចិន ក្នុងឆ្នាំ២០០២ និងការចុះហត្ថលេខាលើកិច្ចព្រមព្រៀងពាណិជ្ជកម្ម និងវិនិយោគនានាជាបន្តបន្ទាប់។
សម្ដេចតេជោ ហ៊ុន សែន ថ្លែងថា ក្នុងស្មារតីឈរលើមូលដ្ឋានជោគជ័យនៃការអនុវត្តកិច្ចព្រមព្រៀងពាណិជ្ជកម្មសេរីអាស៊ាន-ចិន ទម្រង់ ១.០ និងទម្រង់ ២.០ កន្លងមក កម្ពុជាសូមគាំទ្រដល់គំនិតផ្ដួចផ្ដើមស្ដីពីការលើកកម្ពស់កិច្ចព្រមព្រៀងនេះ ទៅជាទម្រង់ថ្មី ៣.០ និងយល់ថា ត្រូវផ្ដោតការយកចិត្តទុកដាក់បន្ថែម លើការពង្រីកវិសាលភាពនៃកិច្ចសហប្រតិបត្តិការសេដ្ឋកិច្ច រវាង អាស៊ាន និងចិន ឲ្យកាន់តែទូលំទូលាយ និងស៊ីជម្រៅបន្ថែមទៀត ដោយផ្ដោតលើការកាត់បន្ថយរបាំងពាណិជ្ជកម្ម ទំនិញ សេវាកម្ម និងវិនិយោគនានា ព្រមទាំងជំរុញកិច្ចអភិវឌ្ឍន៍សេដ្ឋកិច្ចឌីជីថល កំណើនបៃតង និងការបង្កើនសមត្ថភាពសហគ្រាសធុនតូច និងមធ្យម (SMEs)។
ការណ៍នេះ សម្ដេចតេជោ ហ៊ុន សែន បានសម្ដែងនូវជំនឿចិត្តថា សម្រាប់កម្ពុជា ជាមួយនឹងការសម្រេចបាននូវ ” ភាពស៊ាំសហគមន៍រឹងមាំ ” រាជរដ្ឋាភិបាល បានបើកដំណើរការប្រទេសឡើងវិញ នូវរាល់សកម្មភាពផលិតកម្ម ធុរកិច្ច និងពាណិជ្ជកម្មទាំងអស់ ចាប់តាំងពីចុងឆ្នាំ២០២១ មកម្ល៉េះ ហើយរាជរដ្ឋាភិបាលបានប្រឹងប្រែងដោះស្រាយបញ្ហារចនាសម្ព័ន្ធ និងដាក់ចេញឲ្យអនុវត្តនូវកម្មវិធីកែទម្រង់ជាបន្តបន្ទាប់ ដូច្នេះខ្ញុំជឿជាក់ថា ការចាប់ផ្ដើមអនុវត្ត ” អាសិប ” ក្នុងឆ្នាំនេះ ក្រៅពីការបង្កើតបន្ថែម និងនាំមកនូវកាលានុវត្តភាពពាណិជ្ជកម្ម និងវិនិយោគជាច្រើនសម្រាប់ប្រទេសក្នុងតំបន់ ក៏បាននិងកំពុងចូលរួមចំណែកយ៉ាងសំខាន់ដល់ការលូតលាស់វិស័យខាងលើនេះផងដែរ ជាពិសេស នឹងធ្វើឱ្យអាស៊ាន-ចិន ក្លាយជា ” ក្របខ័ណ្ឌស្នូល ” សម្រាប់ការស្ថាបនាតំបន់ពាណិជ្ជកម្មសេរីអាស៊ាន-ចិន ទម្រង់ ៣.០ នាពេលខាងមុខ៕ រក្សាសិទ្ធិដោយ ៖ ពិសិដ្ឋ CEN
