ភ្នំពេញ៖ ក្រុមហ៊ុនអាយស្ម័យយាន Royal Railways របស់អ្នកឧកញ៉ាគិត ម៉េង នឹងឈានជើងចូលទីផ្សារកម្ពុជាដើម្បីបោះលក់ប័ណ្ណបំណុលនាពេលខាងមុខ បន្ទាប់ពីទទួលបានការអនុម័ត យល់ព្រមពីនិយ័តករមូលបត្រកម្ពុជារួចហើយ។
យោងតាមសេចក្តីប្រកាសព៌តមាន របស់់និយ័តករមូលបត្រកម្ពុជា ដែលបានចេញផ្សាយនៅថ្ងៃទី១៩ កញ្ញា បានឲ្យដឹងថា ការអនុញ្ញាតឱ្យក្រុមហ៊ុន Royal Railways បោះផ្សាយមូលបត្រលក់ជាផ្លូវការ ធ្វើឡើងនៅក្នុងកិច្ចប្រជុំក្រុមប្រឹក្សាអាជ្ញាធរសេវាហិរញ្ញវត្ថុ មិនមែនធនាគារ ( អ. ស. ហ.) លើកទី១០ ក្រោមអធិបតីភាពរបស់ឯកឧត្តមអគ្គបណ្ឌិតសភាចារ្យអូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សា អ. ស. ហ លើរបៀបវារៈចំនួន ៧ និងមានការចូលរួមពីលោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា នាព្រឹកថ្ងៃទី១៩ ខែកញ្ញា ឆ្នាំ២០២២។
ក្រុមហ៊ុន Royal Railways ជាក្រុមហ៊ុនទី៨ហើយ ដែលទទួលបានការអនុញ្ញាត ឱ្យបោះលក់មូលបត្របំណុល ដែលក្រុមហ៊ុននេះ គ្រោងបោះលក់មូលបត្របំណុល តម្លៃ ១០លានដុល្លារ។ ក្រុមហ៊ុន Royal Railways ជាក្រុមហ៊ុនទីមួយ ដែលទទួលបានការឯកភាព ជាគោលការណ៍លើពាក្យស្នើសុំពិនិត្យលទ្ធភាព អាចចុះបញ្ជីលក់មូលបត្រ បំណុល នៅផ្សារមូលបត្រកម្ពុជា ក្នុងឆ្នាំ២០២២នេះ។
គួរបញ្ជាក់ថា ផ្លូវដែកកម្ពុជា មានចំនួន ២ខ្សែ គឺ ខ្សែភាគខាងជើង និងខ្សែភាគខាងត្បូង ដែលមានប្រវែងសរុប ៦៥០គីឡូម៉ែត្រ។ ផ្លូវដែកភាគខាងជើង មានប្រវែង ៣៨៦គីឡូម៉ែត្រ ចេញពីភ្នំពេញ ទៅដល់ប៉ោយប៉ែត។ ចំណែកឯ ខ្សែភាគខាងត្បូងមានប្រវែងសរុប ២៦៤គីឡូម៉ែត្រ ពីភ្នំពេញ ទៅក្រុងព្រះសីហនុ។ បច្ចុប្បន្ន ផ្លូវដែកទាំងពីរខ្សែនេះ ត្រូវបានសាងសង់ និងជួសជុលដាក់ឱ្យប្រើប្រាស់ឡើងវិញ តាមរយៈ ការសហការរវាងក្រសួងសាធារណការ និងដឹកជញ្ជូន និងក្រុមហ៊ុន Royal Railways ដែលផ្តល់សេវាដឹកជញ្ជូនទំនិញ និងប្រជាពលរដ្ឋកម្ពុជា ៕
