Friday, September 30, 2022

រុស្ស៊ី អះអាងថា ទាហានអ៊ុយក្រែនស្លា.ប់ និងរបួសច្រើនជាងរុស្ស៊ី ខណៈភាគីទាំងពីរកំពុងរើសកម្លាំងទ័ពបន្ថែមដូចគ្នា

spot_img

រុស្ស៊ី ៖សង្គ្រាមនៅអ៊ុយក្រែន បានធ្វើឱ្យរុស្ស៉ី បាត់បង់កងទ័ពជិត ៦,០០០នាក់ អំឡុងពេលប្រយុទ្ធគ្នាជាច្រើនខែកន្លងមក, ចំណែកខាងអ៊ុយក្រែនវិញ បានបាត់បង់កងទ័ពច្រើនជាងរុស្ស៊ីដល់ទៅ ១០ដងឯណោះ គឺកងកម្លាំងរបស់ទីក្រុងកៀវ បាត់បង់កងទ័ពជាង ៦១,០០០នាក់ ត្រូវបានស្លាប់ ខណៈទាំងរុស្ស៊ី និងអ៊ុយក្រែនកំពុងរើសទ័ពបន្ថែមទៀតដូចគ្នា។

រដ្ឋមន្រ្តីការពារជាតិរុស្ស៊ី លោក សឺហ្គៃ សយហ្គូ (Sergei Shoigu) បានបញ្ជាក់ថា ការកេណ្ឌកងទ័ពខាងលើនេះ គឺត្រូវអនុវត្តតែទៅលើពលរដ្ឋរុស្ស៉ីដែលមានឈ្មោះជាទាហានបម្រុង ឬធ្លាប់បម្រើ ការងារទាហាន ក៏ដូចជាមានបទពិសោធន៍យោធាប៉ុណ្ណោះ ខណៈនិស្សិត និងអ្នកដែលបានត្រឹមតែចូលបំពេញកាតព្វកិច្ចយោធា គឺមិនប៉ះពាល់នឹងការនាំយកទៅធ្វើសង្គ្រាមនោះទេ។

បើតាមការចេញផ្សាយរបស់សារព័ត៌មាន RT នៅថ្ងៃពុធ ទី២១ ខែកញ្ញា ឆ្នាំ២០២២ បានឱ្យដឹងថា លោក សឺហ្គៃ សយហ្គូ (Sergey Shoigu) រដ្ឋមន្រ្តីការពារជាតិរុស្ស៉ី បាននិយាយថា មកទល់ពេលនេះ ខាងរុស្ស៊ី បានបាត់បង់កម្លាំងទ័ពសរុបចំនួន ៥,៩៣៧នាក់។ ចំណែកខាងអ៊ុយក្រែនវិញ គឺពីដំបូងឡើយថា មានកម្លាំងប្រដាប់អាវុធ ចន្លោះ ២០១,០០០-២០២,០០០នាក់ប៉ុណ្ណោះ ហើយចាប់តាំងពីពេលនោះមក ពួកគេបានបាត់បង់កងកម្លាំងខ្ទង់ ១០០,០០០នាក់ ដោយ៦១,២០៧នាក់បានស្លា.ប់ និង៤៩,៣៦៨នាក់ បានរងរបួស, ហើយពេលនេះ ទីក្រុងកៀវ កំពុងកេណ្ឌទ័ពរាប់សែននាក់បន្ថែមទៀត។

នេះជាលើកឡើងរបស់រុស្ស៉ីស្ដីពីការបាត់បង់ចំនួនកងទ័ពរបស់ខ្លួន អំឡុងសង្រ្គាមនៅអ៊ុយក្រែន, ប៉ុន្តែបើតាមការប៉ាន់ស្មានរបស់ក្រសួងការពារជាតិអាមេរិក កាលពីដើមខែសីហាកន្លងទៅ គឺថា កងទ័ពរុស្ស៉ីអាចរហូតដល់ទៅ ៨០,០០០នាក់ ត្រូវបានស.ម្លាប់ ឬក៏រងរបួស៕ រក្សាសិទ្ធិដោយ ៖ ពិសិដ្ឋ CEN