សៀមរាប ៖ បុរសជនជាតិអាមេរិកម្នាក់ដែលរំលោភក្មេងស្រីមិនទាន់គ្រប់អាយុ បានរត់គេចខ្លួនពីប្រទេសអាមេរិក មកសម្ងំលាក់ខ្លួននៅប្រទេសកម្ពុជា ត្រូវបានកម្លាំងអន្តោប្រវេសន៍ នៃស្នងការដ្ឋាននគរបាលខេត្តសៀមរាប សហការជាមួយស្ថានទូតអាមេរិក ធ្វើការឃាត់ខ្លួន កាលពីថ្ងៃទី៣០ ខែឧសភា ឆ្នាំ២០១៨ ដោយមានការសម្របសម្រួលពី ព្រះរាជអាជ្ញានៃអយ្យការអមសាលាដំបូងខេត្តសៀមរាប។
លោកឧត្តមសេនីយ៍ត្រី ជា គឹមសាន ស្នងការរងនគរបាលខេត្តសៀមរាប បានឲ្យដឹងថា បុរសជាជនសង្ស័យរូបនេះឈ្មោះ GILBERT MICHAEL GREENWOOD កើតថ្ងៃទី១៣ ខែកក្កដា ឆ្នាំ១៩៥៥ កាន់លិខិតឆ្លងដែនលេខ488043160 ពាក់ព័ន្ធបទល្មើសរំលោភសេពសន្ថវៈលើកុមារ ប្រព្រឹត្តនៅសហរដ្ឋអាមេរិក ចាប់ខ្លួនតាមសំណើរផ្នែកភ្នាក់ងារសន្តិសុខការទូត (Deplomatic Security Services . DSS) សហរដ្ឋអាមេរិក ប្រចាំប្រទេសកម្ពុជា។ កម្លាំងផែនអន្តោប្រវេសន៍ នៃស្នងការដ្ឋាននគរបាលខេត្តសៀមរាប បានបញ្ជូនជនសង្ស័យ ទៅកាន់អគ្គនាយកដ្ឋានអន្តោប្រវេសន៍ ដើម្បីបណ្តេញជនសង្ស័យរូបនេះ ទៅសហរដ្ឋអាមេរិកវិញ៕ ដោយ ៖ បញ្ញាស័ក្តិ