ភ្នំពេញ ៖បុរសម្នាក់បានស្លាប់ ដោយសារបុរសម្នាក់យកកាំបិតផ្គាក់ កាប់ទៅលើជនរងគ្រោះចំកញ្ចឹងក, នគរបាលខណ្ឌច្បារអំពៅ បានឃាត់ខ្លួនជនដៃដល់ម្នាក់ ក្នុងចំណោម៣នាក់ ដែលចូលលួចមាន់ ហើយទាញកាំបិតផ្គាក់កាប់ប្រហារបណ្តាលអោយម្ចាស់មាន់ស្លាប់ នៅចំណុចដីឡូត៍ចំការស្វាយ ភូមិមិត្តភាព សង្កាត់ព្រែកឯង ខណ្ឌច្បារអំពៅ កាលពីថ្ងៃទី ៣១ ខែឧសភា ឆ្នាំ២០១៨ ម៉ោង២០និង៤០នាទី។
លោក ម៉ៅ សឿត អធិការស្តីទីខណ្ឌច្បារអំពៅ បានអោយដឹងថា ជនសង្ស័យឃាត់ខ្លួនឈ្មោះ ជា ហៃ ភេទ ប្រុស អាយុ ១៦ឆ្នាំ មុខរបរ មិនពិតប្រាកដ ស្នាក់នៅមិនពិតប្រាកដ ។
ចំណែកជនរងគ្រោះឈ្មោះ មាស ចន្ថា ហៅ ឌៀប ភេទ ប្រុស អាយុ ៥១ឆ្នាំ ជនជាតិ ខ្មែរ មុខរបរ ចាំចំការឲ្យគេ ស្នាក់នៅ ចំណុចកើតហេតុខាងលើ។
លោកអធិការស្តីទី បានបញ្ជាក់ថា កាលពីថ្ងៃទី ៣១ ខែឧសភា ឆ្នាំ២០១៨ វេលាម៉ោង២០និង៤០នាទី ជនសង្ស័យ៣នាក់ ឈ្មោះ ជា ហៃ, ឈ្មោះ តួ និងម្នាក់ទៀតមិនស្គាល់ឈ្មោះនាំគ្នាផ្លោះរបងចូលទៅក្នុងដីឡូត៍ចំការស្វាយ (ចំណុចកើតហេតុខាងលើ) ដើម្បី លួចមាន់ ពេលនោះជនរងគ្រោះឮឆ្កែព្រុសក៏បញ្ចាំងភ្លើងពិលឃើញជនសង្ស័យកំពុងទាញសំណាញ់លួចមាន់ ក៏ងើបពី គ្រែដេកស្ទុះចេញទៅចាប់ជនសង្ស័យ រួចពួកជនសង្ស័យនាំគ្នាវាយជនរងគ្រោះដួលទៅលើដី ហើយជនសង្ស័យឈ្មោះ តួ ស្ទុះទៅយកកាំបិតផ្គាក់របស់ជនរងគ្រោះនៅក្រោមគ្រែកាប់ទៅលើជនរងគ្រោះចំកញ្ចឹងក, ចំថ្ពាល់ខាងស្តាំ និងចំ ក្បាលរបួសធ្ងន់ រួចនាំគ្នាគេចខ្លួនបោះកាំបិតផ្គាក់ចោលនៅកន្លែងកើតហេតុ។ ចំណែកជនរងគ្រោះត្រូវបានក្រុមគ្រួសារ បញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត រួចក៏បានស្លាប់។ រហូតដល់ម៉ោង២២ ថ្ងៃដដែល សមត្ថកិច្ចស្រាវជ្រាវឃាត់ខ្លួនបានបក្ខពួកជនសង្ស័យម្នាក់ឈ្មោះ ជា ហៃ នៅភូមិកើតហេតុខាងលើ បញ្ជូនមកអធិការដ្ឋាន នគរបាលខណ្ឌច្បារអំពៅ ចាត់ការតាមច្បាប់។ដោយ៖បញ្ញាស័ក្តិ