ភ្នំពេញៈ សម្ដេចក្រឡាហោម ស ខេង នាយករដ្ឋមន្រ្តីស្ដីទី នៃរាជរដ្ឋាភិបាលកម្ពុជា អមដំណើរដោយថ្នាក់ដឹកនាំក្រសួងមហាផ្ទៃ អគ្គស្នងការដ្ឋាននគរបាលជាតិ បានអញ្ជើញចុះពិនិត្យទីតាំងសាងសង់អគ្គស្នងការដ្ឋាននគរបាលជាតិថ្មី ស្ថិតនៅភូមិសាស្ត្រភាគខាងត្បូងរាជធានីភ្នំពេញ កាលពីរសៀលថ្ងៃទី២៤ ខែកញ្ញា ឆ្នាំ២០២២ នេះ។
គួរបញ្ជាក់ថា នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ កាលពីថ្ងៃទី២៩ ខែធ្នូ ឆ្នាំ២០១៧ បានធ្វើលិខិតគោរពជូនសម្តេចក្រឡាហោម ស ខេង ស្នើសុំគោលការណ៍អនុញ្ញាតដោះដូរទីតាំងអគារអគ្គស្នងការដ្ឋាននគរបាលជាតិ ដែលមានទីតាំងនៅសង្កាត់ទន្លេបាសាក់ ខណ្ឌចំការមន។ ការស្នើសុំគោលការណ៍ដោះដូរទីតាំងអគារអគ្គស្នងការដ្ឋាននគរបាលជាតិ គឺយោងលិខិតចុះថ្ងៃទី២ ខែធ្នូ ឆ្នាំ២០១៧ របស់ក្រុមហ៊ុន LONG MA INVEST AND REALESTATE Co.,LTD , យោងតាមដីកាបញ្ជូនលេខ ២០៤៨ ចុះថ្ងៃទី១៥ ខែធ្នូ ឆ្នាំ២០១៧ របស់ខុទ្ទកាល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងយោងតាមចំណារឯកភាពដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចុះថ្ងៃទី២២ ខែធ្នូ ឆ្នាំ២០១៧។
នាយឧត្តមសេនីយ៍ សន្តិបណ្ឌិត នេត សាវឿន បានរាយការណ៍ជូនសម្តេចក្រឡាហោម ស ខេង ថា ៖ “ទីតាំងដី-អគារអគ្គស្នងការដ្ឋាននគរបាលជាតិ ស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ មានសភាពចាស់ទ្រុឌទ្រោមតូចចង្អៀត ខ្វះអគារសម្រាប់កម្លាំងបំពេញការងារប្រចាំថ្ងៃ កន្លែងសម្រាកប្រចាំការ កន្លែងហ្វឹកហាត់ ឃ្លាំងរក្សាទុកអាវុធ ចំណតរក្សាទុករថយន្ត ឃ្លាំងដាក់សម្ភារៈផ្សេងៗ និងនាយកដ្ឋានមួយចំនួនដែលចំណុះឲ្យអគ្គស្នងការដ្ឋាននគរបាលជាតិ កម្លាំងបច្ចុប្បន្ននេះមានចំនួនកើនជាបន្តបន្ទាប់ ធ្វើឲ្យជួបការលំបាកក្នុងការបំពេញភារកិច្ចប្រចាំថ្ងៃ ហើយម៉្យាងវិញទៀតនៅពេលដែលកម្លាំងអន្តរាគមន៍ចេញប្រតិបត្តិការម្តងៗ ច្រកទ្វារចេញចូលមានការកកស្ទះចរចារណ៍ជារៀងរាល់ថ្ងៃ។ ដើម្បីងាយស្រួលក្នុងការបំពេញការងារ និងកែសម្រួលទីតាំងមានលក្ខណៈសមស្របតាមស្តង់ដារ។ អគ្គស្នងការដ្ឋាននគរបាលជាតិ សូមគោរពស្នើសុំគោលការណ៍អនុញ្ញាតឲ្យក្រុមហ៊ុន LONG MA INVEST AND REALESTATE Co.,LTD ធ្វើការដោះដូរទីតាំងខាងលើនេះ នឹងសុំធ្វើប័ណ្ណកម្មសិទ្ធិមុនធ្វើការអភិវឌ្ឍន៍ជាថ្នូរនឹងទីតាំងរបស់ក្រុមហ៊ុនដែលមានទំហំ ៧០.០០០ម៉ែត្រការ៉េ ស្ថិតនៅភូមិខ្វារ សង្កាត់ដង្កោ ខណ្ឌដង្កោ រាជធានីភ្នំពេញ និងសាងសង់អគារអគ្គស្នងការដ្ឋាននគរបាលជាតិ ទំហំ ៣២ម៉ែត្រគុណ៦០ម៉ែត្រ កម្ពស់ ១០ជាន់។ មានចំនួន ១អគារ អគារស្នាក់នៅរបស់កងកម្លាំង ២ អគារតាមបទដ្ឋានបច្ចេកទេសលក្ខណៈស្តង់ដារទាំងគុណភាព និងសោភ័ណ្ឌភាព ព្រមទាំងបំពាក់បរិក្ខារទំនើបៗ និងរៀបចំបណ្តាញទឹកភ្លើង ជណ្តើរយន្ត ម៉ាស៊ីនត្រជាក់ និងចាក់ដីបំពេញបន្ថែមលើទីតាំងធ្វើរបងព័ន្ធជុំវិញ ក្លោងទ្វារ ប៉ុស្តិ៍យាម ជូនជាថ្នូរវិញ”៕ រក្សាសិទ្ធិដោយៈ ចេស្តារ
