បន្ទាប់ពីលែងលះគ្នា ល្បីពេញសង្គមសិល្បៈខ្មែរ ស្រាប់តែថ្មីៗនេះ លោក សុវណ្ណ មករា បាននាំកូនភ្លោះទាំង ២នាក់របស់លោក ទៅកម្សាន្តនៅផ្សារទំនើបអ៊ីអន ដែលសកម្មភាពនេះ បានធ្វើឱ្យគាំទ្ររំភើបចិត្តយ៉ាងខ្លាំង ។
គេសង្កេតឃើញថា នេះមិនមែនជាលើកទីមួយឡើយ ដែលលោក សុវណ្ណ មករា អតិតប្ដីអ្នកនាង ឈិន សុធារី តែងតែផ្ដល់ភាពកក់ក្ដៅដល់កូនៗក្រោយពីលែងលះ ។ ដូចលោកធ្លាប់បានបញ្ជាក់កាលពីលើកមុនហើយថា ទោះជាលោកលែងលះ ប៉ុន្តែលោកនៅតែចូលរួមចំណែកអាហាររកិច្ចចំពោះកូនភ្លោះស្រី ប្រុសទាំង២ ដោយធានាចញ្ចឹមរហូតទាល់តែពួកគេទាំង២ធំ និងមានលទ្ធភាពចញ្ចឹមជីវិតខ្លួនបាន ។
គួររំឭកដែរថា កាលពីខែឧសភា ឆ្នាំ២០១៧ តារាសម្ដែង និងជាអ្នកដឹកនាំសម្ដែង លោក សុវណ្ណ មករា បានប្រកាសលែងលះជាមួយភរិយាអ្នកនាង ឈិន សុធារី ដោយលើកឡើងថា លោកជាប្ដីមិនល្អ ឪពុកមិនល្អ គ្មានទំនួលខុសត្រូវ លួចមានស្រីក្រៅ ដូចនេះលោកគ្មានមុខមាត់រស់នៅជុំប្រពន្ធឡើយ ។ សម្រាប់ទង្វើរបស់លោក សុវណ្ណ មករា កាលនោះបានធ្វើឱ្យមានការរិះគន់យ៉ាងខ្លាំង សូម្បីតែអ្នកក្នុងសិល្បៈក៏មានការលើកឡើងមិនពេញចិត្តចំពោះតួអង្គព្រះកែវក្នុងរឿង «ព្រះគោ ព្រះកែវ» រូបនេះដែរ ៕ សាវុធ
