នេះជាអ្វីដែលត្រូវបានហៅថាជាករណីអំពើឃាតកម្មដ៏សាហាវបំផុត របស់ប្រទេសថៃ បន្ទាប់ពីមនុស្សយ៉ាងតិច ៣៦ នាក់ ដែលក្នុងនោះជាកុមារ ២៤ នាក់ ត្រូវបានសម្លាប់នៅក្នុងការសម្លាប់រង្គាល នៅក្នុងមជ្ឈមណ្ឌលថែទាំកុមារមួយកន្លែង ស្ថិតនៅភាគឦសានប្រទេសថៃ។
យោងតាម BBC ជនល្មើសឈ្មោះ Panya Kamrab គឺទើបតែបានឡើងតុលាការកាលពីថ្ងៃព្រហស្បតិ៍ សម្រាប់ការចោទប្រកាន់ទាក់ទងនឹងការប្រើប្រាស់ និងលក់ថ្នាំញៀនមេតំហ្វេតាមីន មុនពេលសម្រុកចូលកន្លែងបណ្តុះបណ្តាលកូនក្មេងនៅវេលាម៉ោង ១២ និង ៣០ នាទី ថ្ងៃត្រង់។ សាលក្រម ត្រូវបានគ្រោងនឹងប្រកាសនៅថ្ងៃសុក្រនេះ (ទី៧ ខែតុលា ឆ្នាំ ២០២២ )។
នៅក្នុងការឆែកឆេរផ្ទះរបស់ Panya ប៉ូលីសបានរកឃើញថេប្លេត Yaba នៅក្នុងផ្ទះរបស់គេ។ Yaba គឺជាការរួមបញ្ចូលគ្នានៃមេតំហ្វេតាមីន និងជាតិកាហ្វេអ៊ីន ដែលត្រូវបានគេស្គាល់ថាជាគ្រីស្តាល់មេតា។ វាគឺជាថេប្លេតដែលជាធម្មតាត្រូវបានបុកកម្ទេច និងជក់ ដែលត្រូវបានគេស្គាល់ថាជា “ថ្នាំឆ្កួត” ។
ការចោទប្រកាន់ពីបទកាន់កាប់គ្រឿងញៀនប្រភេទទី១ ជាហេតុធ្វើឲ្យរូបគេ ត្រូវព្យួរពីតួនាទីប៉ូលិស កាលក្នុងខែមករា។ បន្ទាប់មក រូបគេក៏ត្រូវបានបណ្តេញចេញពីកងកម្លាំងប៉ូលីសជាផ្លូវការ នៅក្នុងខែមិថុនា។
ដោយឡែក នៅមុនពេលកើតហេតុ បើតាមអ្នកនាំពាក្យប៉ូលិស ឧត្តមសេនីយ៍ Paisan Luesomboon បាននិយាយថា អតីតប៉ូលិសអាយុ ៣៤ ឆ្នាំ រូបនេះ បានទៅកន្លែងបណ្តុះក្មេងៗ ដើម្បីស្វែងរកកូនប្រុសចុងរបស់ខ្លួន អាយុ ២ ឆ្នាំ ដែលបានចុះឈ្មោះនៅទីនោះ។ ទោះជាយ៉ាងណា អ្នកគ្រូបង្រៀនឈ្មោះ Nanticha Panchum បាននិយាយថា ក្មេងប្រុសនេះមិនបានចូលរៀនមួយខែមកហើយ។
អ្នកគ្រូ Paisan បាននិយាយថា ដោយមិននិយាយមួយមាត់កមួយម៉ាត់ Panya “បានចូលបន្ទប់ដែលក្មេង ២៤ នាក់កំពុងដេក” ហើយបានសម្លាប់ទាំងអស់ ប៉ុន្តែក្នុងចំណោមពួកគេម្នាក់ប្រើកាំបិត។
អ្នកគ្រូបង្រៀនម្នាក់នៃមជ្ឈមណ្ឌល បានរៀបរាប់ពីអ្វីដែលនាងបានឃើញថា នៅពេលដែលជនល្មើសបើកការបាញ់ប្រហារ គឺខណៈពេលនោះបុគ្គលិកពីរនាក់ កំពុងទទួលទានអាហារថ្ងៃត្រង់។ អ្នកគ្រូនោះនិយាយថា៖ “ខ្ញុំស្រាប់តែឮសំឡេងដូចជាកាំជ្រួច។ លឺដូច្នេះ ខ្ញុំក៏ក្រឡេកមើលទៅ ពុទ្ធោ! ស្រាប់តែបុគ្គលិកពីរនាក់ បានដួលនៅលើឥដ្ឋបាត់ទៅហើយ»។
គ្រូៗទាំងនោះ បាននិយាយថា “បន្ទាប់មក ជនល្មើសបានដកកាំភ្លើងមួយផ្សេងទៀត ពីចង្កេះ… ពួកខ្ញុំមិននឹកស្មានថា រូបគេនឹងសម្លាប់ក្មេងៗដ៏សាហាវបែបនេះសោះឡើយ”។
គ្រូៗក៏បានឲ្យដឹងទៀតថា ជនដៃដល់ក៏បានកាន់កាំភ្លើងទី២ ព្រមទាំងកាំបិតផងដែរ បានចាក់សម្លាប់អ្នកគ្រូបង្រៀនម្នាក់ទៀត ដែលមានផ្ទៃពោះ ៨ខែ។
អ្នកគ្រូ Paisan បានប្រាប់ CNN ថា ការស្លាប់ភាគច្រើនជាលទ្ធផលនៃ “របួសស្នាម” ។ គ្រូបង្រៀន និងឧត្តមសេនីយ៍ប៉ូលិស Damrongsak Kittiprapas បានបញ្ជាក់ពីការលើកឡើងរបស់អ្នកគ្រូ Paisan ដែលថា ជនល្មើសភាគច្រើន បានប្រើកាំបិតដើម្បីសម្លាប់កុមារ។
លោក Damrongsak ក៏បាននិយាយថា៖ «បន្ទាប់មក ជនល្មើសរូបនេះ បានចេញទៅក្រៅ ហើយចាប់ផ្ដើមសម្លាប់អ្នកណាដែលរូបគេជួបតាមផ្លូវ ដោយកាំភ្លើង ឬកាំបិត រហូតដល់រូបគេត្រឡប់មកដល់ផ្ទះវិញ។ យើងបានឡោមព័ទ្ធផ្ទះ និងបានរកឃើញថា រូបគេបានធ្វើអត្តឃាតបាញ់សម្លាប់ខ្លួនឯង បន្ទាប់ពីសម្លាប់ប្រពន្ធ និងកូន នៅក្នុងផ្ទះ»៕ រក្សាសិទ្ធិដោយ៖ លឹម ហុង
