គួរបញ្ជាក់ថា កាលពីវេលាថ្ងៃត្រង់ថ្ងៃទី៦ ខែតុលា ឆ្នាំ២០២២ អតីតប៉ូលិសម្នាក់ ដែលត្រូវបានតុលាការចោទប្រកាន់ពាក់ព័ន្ធគ្រឿងញៀន បានបាញ់ប្រហារលើមជ្ឈមណ្ឌលអភិវឌ្ឍន៍កុមារមួយកន្លែង ស្ថិតនៅឃុំ Uthai Sawan ស្រុក Na Klang ខេត្ត Nong Bua Lamphu បានបណ្តាលមនុស្សយ៉ាងតិច ៣៧ នាក់ ស្លាប់ ដែលក្នុងនោះមានកុមារចំនួន ២៤ នាក់។
ដោយឡែក សម្រាប់វឌ្ឍនភាពចុងក្រោយនៅថ្ងៃទី៧ ខែតុលា ឆ្នាំ ២០២២ បុគ្គលិកសារព័ត៌មាន Sorayuth Suthatsanachinda បានរាយការណ៍ព័ត៌មានលម្អិត អំពីការរៀបចំសពជនរងគ្រោះ ដោយមិនមានសាច់ញាតិចូលរួម ខណៈដែលក្រុមអ្នកជួយសង្គ្រោះ បានដឹកទៅកាន់មន្ទីរពេទ្យ Udon Thani នៃរដ្ឋបាលសង្កាត់ Uthai Sawan ហើយខាងមន្ទីរពេទ្យ នឹងចេញលិខិតបញ្ជាក់មរណភាព ដើម្បីឲ្យបុគ្គលិកសង្គ្រោះ ដឹកទៅផ្ទះគ្រួសារបន្ទាប់។
សម្រាប់នីតិវិធីនៃការធ្វើកោសល្យវិច័យ ដំបូងឡើយ ក្រុមវេជ្ជបណ្ឌិតបានប្រមូលផ្តុំ ដើម្បីពន្លឿនការស៊ើបអង្កេត។ ប៉ុន្តែ ឥឡូវនេះ ក្រុមគ្រូពេទ្យមិនចាំបាច់ទេ ព្រោះមូលហេតុនៃការស្លាប់របស់ពួកគេ គឺបានដឹងច្បាស់រួចហើយ។
ជំនួសមកវិញ ក្រុមការងារសង្គ្រោះ នឹងត្រូវបានធ្វើការផ្លាស់ប្តូរសម្លៀកបំពាក់ថ្មីឲ្យសពកុមារទាំង ២៤ នាក់ ដែលជាមូលនិធិជួយផ្សព្វផ្សាយព្រះធម៌ខេត្ត Udon Thani ដោយសារសម្លៀកបំពាក់ចាស់របស់ពួកគេប្រឡាក់ដោយឈាម។ ចំណែកសពមនុស្សពេញវ័យដទៃទៀត និងជនដៃដល់ ត្រូវឆ្លងកាត់ការធ្វើកោសល្យវិច័យដើម្បីកំណត់អត្តសញ្ញាណ ប៉ុន្តែ ការកោសល្យវិច្ច័យទាំងអស់ ក៏ត្រូវបានបញ្ចប់ផងដែរ។
នៅម៉ោង 12 និង10 នាទី ថ្ងៃត្រង់ អ្នកជួយសង្គ្រោះស្ម័គ្រចិត្តមកពីមូលនិធិផ្សេងៗ រួមទាំងអ្នកជួយសង្គ្រោះ Udon Thani, Nong Bua Lamphu និង Na Klang បានរៀបចំសាកសពទាំង ៣៧ នាក់ ដាក់ចូលមឈូស រួចដឹកសពទៅកាន់មន្ទីរពេទ្យ Udon Thani ជាមួយក្បួនប្រវែងប្រហែល១គីឡូម៉ែត្រ មុនពេលបញ្ជូនសពទៅស្រុកកំណើត ប្រគល់ឱ្យសាច់ញាតិយកទៅធ្វើបុណ្យតាមប្រពៃណី។
អ្វីដែលគួរឲ្យសង្វេកខ្លាំងនោះ គឺគ្រប់ច្រកល្ហក នៅច្រកចូលស្រុក Na Klang ខេត្ត Nong Bua Lamphu ត្រូវបានឃើញប្រជាពលរដ្ឋ និងមន្ត្រីស្ថាប័នផ្សេងៗ ស្លៀកពាក់ខ្មៅ ដើម្បីកាន់ទុក្ខអ្នកស្លាប់ ខណៈដែលក្បួនរំកិលឆ្លងកាត់៕ រក្សាសិទ្ធិដោយ៖ លឹម ហុង
