មន្ត្រីអន្តោប្រវេសន៍ថៃ បានដកទិដ្ឋាការរបស់អ្នកយកព័ត៌មាន CNN ពីរនាក់ បន្ទាប់ពីត្រូវបានចោទប្រកាន់ថា បានបំពានការអនុញ្ញាតចូលថតនៅក្នុងកន្លែងកើតហេតុនៃការសម្លាប់រង្គាល កាលពីថ្ងៃព្រហស្បតិ៍ នៅឯមជ្ឈមណ្ឌលថែទាំកុមារ ក្នុងខេត្ត Nong Bua Lam Phu ។
អគ្គស្នងការរងនគរបាលជាតិ លោក Surachate Hakparn បាននិយាយកាលពីថ្ងៃអាទិត្យថា អ្នកយកព័ត៌មានទាំងពីរនាក់ ម្នាក់ឈ្មោះ Anna Coren អាយុ ៤៧ ឆ្នាំ ជនជាតិអូស្ត្រាលី និងម្នាក់ទៀតឈ្មោះ Daniel Hodge អាយុ ៣៤ ឆ្នាំ ជាជនជាតិអង់គ្លេស ត្រូវបានប៉ូលិសនាំចេញពីសណ្ឋាគាររបស់ពួកគេក្នុងខេត្ត Udon Thani ហើយបាននាំទៅកាន់ប៉ុស្តិ៍ប៉ូលិស Na Klang ក្នុងទីក្រុង Nong Bua ខេត្ត Lam Phu ដើម្បីសាកសួរ។
លោក Surachate និយាយថា ប៉ូលិសចង់ដឹងពីពួកគេថា តើមន្ត្រីថៃបានអនុញ្ញាតឲ្យពួកគេចូលកន្លែងឧក្រិដ្ឋកម្មដូចការអះអាងនោះទេ ព្រោះថាមានតែប៉ូលិសប៉ុណ្ណោះ ដែលមានសិទ្ធិអនុញ្ញាត។
អគ្គស្នងការរងនគរបាលជាតិ ក៏បានបញ្ជាក់ថា អ្នកយកព័ត៌មានទាំងពីរនាក់ អាចប្រឈមមុខនឹងការចោទប្រកាន់ពីបទទន្ទ្រានចូលក្នុងកន្លែងកើតហេតុ និងជ្រៀតជ្រែកភស្តុតាង ប្រសិនបើគេអាចបញ្ជាក់បានថា ពួកគេឆ្លងកាត់ខ្សែហាមចូលកន្លែងកើតហេតុ ដោយគ្មានការអនុញ្ញាត។
លោកបានពន្យល់ថា យោងតាមនីតិវិធីច្បាប់ថៃ អ្នកយកព័ត៌មានទាំងពីរ នឹងត្រូវនិរទេស និងដាក់ក្នុងបញ្ជីខ្មៅ ប៉ុន្តែបន្ទាប់ពីបញ្ចប់នីតិវិធីផ្លូវច្បាប់ណាមួយ។
ពាក្យបណ្តឹងនៃការទន្ទ្រានចូលទៅក្នុងទីធ្លារដ្ឋាភិបាលត្រូវបានដាក់ប្តឹងអ្នកយកព័ត៌មាន CNN ទៅកាន់ប៉ូលីសស្រុក Na Klang ដោយអភិបាលក្រុងនៃរដ្ឋបាលឃុំ Uthai Sawan ដែលបានដឹងពីការរំលោភខ្សែហាមចូលទីតាំងហេតុកើត ពីប្រព័ន្ធផ្សព្វផ្សាយ។
នេះបើតាមអ្នកសារព័ត៌មានរបស់ BBC ប្រចាំប្រទេសថៃ លោក Jonathan Head បាននិយាយនៅលើ Twitter នៅថ្ងៃនេះថា លោកនៅខាងក្រៅមជ្ឈមណ្ឌល ដើម្បីរាយការណ៍ព្រឹត្តិការណ៍នេះ ហើយបានព្រមានអ្នកសារព័ត៌មានផ្សេងទៀត កុំឱ្យឆ្លងកាត់ខ្សែហាមចូល នៅពេលដែលពួកគេបានព្យាយាមឡើងលើរបងនោះ។
ជាមួយគ្នានេះ CNN ក៏បានធ្វើការសុំទោស ប៉ុន្តែបានបញ្ជាក់ពីការអនុញ្ញាតពីមន្ត្រីសុខាភិបាល៕ រក្សាសិទ្ធិដោយ៖ លឹម ហុង
