នេះជារឿងមួយភ្ញាក់ផ្អើលខ្លាំងតែម្តង នៅពេលដែលបានដឹងថា វេជ្ជបណ្ឌិតជនជាតិថៃដ៏ល្បីម្នាក់ ដែលធ្វើដំណើរកម្សាន្តទៅកាន់ប្រទេសម៉ាលី ត្រូវបានគេចាប់ជំរិតនៅទីនោះ អស់រយៈពេល ២៥ ថ្ងៃ។ ប៉ុន្តែ សំណាងហើយ ដែលគាត់មានលុយលោះ ពុំនោះទេ នឹងមានវាសនាមិនខុសមនុស្សជាច្រើនទៀត ដែលកំពុងត្រូវបានជាប់ឃុំឃាំងរាប់ឆ្នាំមកហើយ។
យោងតាមកាសែត thethaiger បានចុះផ្សាយឲ្យដឹងថា វេជ្ជបណ្ឌិតជនជាតិថៃដ៏ល្បីឈ្មោះ លោក Nopparat “Song” Rattanawaraha ដែលត្រូវបានចាប់ជំរិតនៅប្រទេសម៉ាលី កាលពីខែមុន បានត្រលប់មកផ្ទះវិញនៅថ្ងៃនេះ (ទី២៥ តុលា) បន្ទាប់ពីត្រូវបានដោះលែងដោយអ្នកចាប់របស់គាត់។
គ្រូពេទ្យវះកាត់អាយុ ៤៩ ឆ្នាំ រូបនេះ ត្រូវបានចាប់ជំរិត នៅពេលធ្វើដំណើរជិតព្រំដែនសាធារណរដ្ឋម៉ាលី នៅអាហ្វ្រិកខាងលិច ហើយត្រូវបានឃុំខ្លួនអស់រយៈពេល ២៥ ថ្ងៃ។ ក្រុមចាប់ជំរិតរបស់គាត់ បានដោះលែងគាត់កាលពីម្សិលមិញ (ថ្ងៃទី២៤ តុលា) បន្ទាប់ពីគាត់បានរៃអង្គាសប្រាក់បានចំនួន ៦ លានបាត (១៥៦,០០០ ដុល្លារអាមេរិក) ជាថ្នូរនឹងសេរីភាពរបស់គាត់។
Nopparat ដែលគេស្គាល់ច្បាស់ថា Mor Song ឬ Doctor Song គឺជាបុគ្គលម្នាក់មានមុខមាត់ដ៏លេចធ្លោ នៅលើបណ្ដាញសង្គមថៃ។ ក្រៅពីការងារជាគ្រូពេទ្យវះកាត់ លោក Song បានចងក្រងឯកសារដំណើរផ្សងព្រេងរបស់គាត់ដែលមានចំណងជើងថា Doctor Song Travels Around the World (หมอสองท่องโลก) នៅលើ Facebook និង Instagram។
Song បានជូនដំណឹងដល់អ្នកតាមដានរបស់គាត់ថា គាត់នឹងចាប់ផ្តើមដំណើរកម្សាន្តរយៈពេល ៣ សប្តាហ៍ដ៏រំភើប ចាប់ពីថ្ងៃទី១២ ខែកញ្ញា ដល់ថ្ងៃទី៣ ខែតុលា ដោយធ្វើដំណើរទៅប្រទេសអាហ្វហ្គានីស្ថាន ប៉ាគីស្ថាន ឆាដ នីហ្សេរីយ៉ា ប៊ូគីណាហ្វាសូ ម៉ាលី កាមេរូន អេក្វាទ័រហ្គីណេ និងសៅតូមេ។
គ្រូពេទ្យវះរូបនេះ ក៏បានអាប់ដេតការធ្វើដំណើររបស់គាត់នៅលើ Facebook និង Instagram ជាមួយនឹងរឿងរ៉ាវ និងរូបភាពប្រចាំថ្ងៃ រហូតដល់ថ្ងៃទី២៨ ខែកញ្ញា។ អ្នកតាមដានរបស់គាត់មួយចំនួន ក៏បានស្នើសុំឱ្យ ធ្វើការអាប់ដេតបន្ទាប់ពីពីរបីថ្ងៃ នៃការបង្ហោះ ប៉ុន្តែ Song នៅស្ងៀម (ពុំបានបង្ហោះអ្វីនៅលើបណ្តាញសង្គមទៀតទេ)។
តែអ្វីដែលភ្ញាក់ផ្អើលនោះ ស្រាប់តែប្រព័ន្ធផ្សព្វផ្សាយថៃ ត្រូវបានជូនដំណឹងអំពីការបាត់ខ្លួនរបស់គាត់ កាលពីថ្ងៃសៅរ៍ទី២២ ខែតុលា បន្ទាប់ពីអតីតភរិយារបស់គាត់ Yingyae Nonthaporn បានស្វែងរកជំនួយពីប្រព័ន្ធផ្សព្វផ្សាយសង្គម ដោយបាននិយាយថា អតីតស្វាមីរបស់នាងត្រូវបានចាប់ជំរិតនៅអាហ្វ្រិកហើយ។
ប៉ុស្តិ៍លេខ ៣ បានសម្ភាសលេខារបស់ Song ដែលក៏បានឲ្យដឹងថា វេជ្ជបណ្ឌិតរបស់ពួកគេ ត្រូវបានចាប់ជំរិត នៅពេលគាត់ទៅលេងផ្សារមួយ នៅភាគខាងលិចនៃសាធារណរដ្ឋម៉ាលី កាលពីថ្ងៃទី២៨ ខែកញ្ញា។
Song ត្រូវបានគេនាំទៅជំរុំឧក្រិដ្ឋជនជ្រៅក្នុងព្រៃ -ទីកន្លែងដែលគាត់ត្រូវបានគេចាប់ដាក់ច្រវាក់ ប៉ុន្តែ មិនបានរងគ្រោះដល់រាងកាយ ពីការចាប់ជំរិតរបស់គាត់ទេ។
ក្រុមមួយបានផ្តល់ទូរស័ព្ទដៃដល់ Song ដើម្បីទាក់ទងទៅសាច់ញាតិ ឬមិត្តភ័ក្តិ ដើម្បីយកថ្លៃលោះ។ វេជ្ជបណ្ឌិតបានចាត់មិត្តម្នាក់ឱ្យខ្ចីប្រាក់ប្រាំមួយលានបាត ដើម្បីទិញសេរីភាពរបស់គាត់។
Song បានលាតត្រដាងថា គាត់ជាប់គុកជាមួយអ្នកដទៃដែលត្រូវឃុំខ្លួនក្នុងជំរំរាប់ឆ្នាំ។ ពួកគេនៅតែនៅក្នុងជំរំ ព្រោះពួកគេមិនមានលទ្ធភាពបង់ថ្លៃលោះ៕ រក្សាសិទ្ធិដោយ៖ លឹម ហុង
