សម្តេចតេជោ សម្តែងនូវការសោកស្តាយ ដែលរដ្ឋមន្ត្រីការបរទេសរុស្ស៉ី និងរដ្ឋមន្ត្រីការបរទេសអ៊ុយក្រែន មិនបានជួបគ្នានៅកម្ពុជា ដើម្បីរកដំណោះស្រាយ

ភ្នំពេញ៖ថ្លែងទៅកាន់អ្នកសារព័ត៌មានពាក់ព័ន្ធទៅនឹងរឿងអ៊ុយក្រែន សម្តេចតេជោ ហ៊ុន សែន បានបញ្ជាក់ថា កម្ពុជាមិនមានការបញ្ជូនកងទ័ព ឬផ្តល់ជំនួយយោធាទៅជួយអ៊ុយក្រែននោះទេ គឺគ្រាន់តែចូលរួមជាមួយជប៉ុន ក្នុងការជួយបណ្តុះបណ្តាលការដោះមីនដល់អ៊ុយក្រែនតែប៉ុណ្ណោះ។
សម្តេចតេជោក៏បានសម្តែងនូវការសោកស្តាយ ដែលរដ្ឋមន្ត្រីការបរទេសរុស្ស៉ី និងរដ្ឋមន្ត្រីការបរទេសអ៊ុយក្រែន មិនបានជួបគ្នានៅកម្ពុជា ដើម្បីរកដំណោះស្រាយណាមួយនោះ។

ការថ្លែងរបស់សម្តេចតេជោធ្វើឡើង ក្នុងសន្និសីទសារព័ត៌មាននាវិមានសន្តិភាព ដើម្បីបង្ហាញលទ្ធផលសំខាន់ៗ នៃកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំកំពូលពាក់ព័ន្ធដែលកម្ពុជា ដែលធ្វើជាម្ចាស់ផ្ទះពីថ្ងៃទី១០ ដល់ទី១៣ ខែវិច្ឆិកា ឆ្នាំ២០២២។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ាន បានសម្តែងការសោកស្តាយ​ ដែលរដ្ឋមន្ត្រីការបរទេសរុស្ស៉ី លោក សឺហ្គី ឡារ៉ូវ (Sergey Larov) និងរដ្ឋមន្ត្រីការបរទេសអ៊ុយក្រែន លោក ឌីមីទ្រី គូឡេបា (Dmytro Kuleba) មិនបានជួបសន្ទនាគ្នា នៅរាជធានីភ្នំពេញ ដើម្បីចរចារកដំណោះស្រាយបញ្ហាវិបត្តិសង្គ្រាម រវាងប្រទេសទាំង២នោះទេ។

សម្តេចតេជោ ហ៊ុន សែន បានបញ្ជាក់ថា ក្នុងពេលជួបពិភាក្សាជាមួយរដ្ឋមន្ត្រីការបរទេសអ៊ុយក្រែន សម្តេចបានផ្តួចផ្តើម ចង់ឲ្យមានការជួបសន្ទនាជាមួយនឹងរដ្ឋមន្ត្រីការបរទេសរុស្ស៉ី ដែលមានវត្តមាននៅកម្ពុជា ក្នុងការចូលរួមកិច្ចប្រជុំអាស៊ាន នៅភ្នំពេញ ប៉ុន្តែភាគីទាំង២ មិនបានជួបគ្នានោះឡើយ។

សម្តេចតេជោ ហ៊ុន សែន បានថ្លែងថា អំពីគំនិតផ្តួចផ្តើ​មអ៊ុយក្រែន ខ្ញុំបានជម្រាបជូនរដ្ឋមន្ត្រីការបរទេសអ៊ុយក្រែនថា ឯកឧត្តមគួរពិចារណា មើលទាន់រដ្ឋមន្ត្រីការបទេសរុស្ស៊ី មកដល់ទីក្រុងភ្នំពេញ គួរមានការជួបសន្ទនាគ្នា បើទោះបីបានលទ្ធផល ឬមិនបានលទ្ធផល វាក៏ជាការបង្ហាញនូវកាយវិការ នៃការសន្ទនាប្រកបដោយការស្ថាបនា ក៏ប៉ុន្តែជាការគួរឲ្យសោគស្តាយ ដែលទាំងរុស្ស៊ី និងអ៊ុយក្រែន គឺមិនបានជួបគ្នាណាមួយកើតឡើង នៅទីក្រុងភ្នំពេញនោះទេ​ ហើយយើងពិនិត្យក្នុងគំនិតផ្តួចផ្តើម ក្នុងការសន្ទនានានា គឺយើងមិនទាន់ឃើញមានសញ្ញា ជាក់លាក់ណាមួយទាក់ទងជាមួយដំណើរការសន្តិភាពទេ តែមានលេចឡើងទាក់ទិនការ រកវិធីដោះស្រាយបញ្ហាការដឹកជញ្ជូនគ្រាប់ធុញ្ញជាតិ និងជី ចេញពីអ៊ុយក្រែ​ន។ គំនិតផ្តួចផ្តើមជាក់លាក់ទាក់ទងនឹងការចរចារវាងរុស្ស៊ី-អ៊ុយក្រែន ដូចជាមិនទាន់មាន ព្រោះយើងមើលឃើថាអ្នកទាំងសងខាង ហាក់ដូចជានៅសង្ឃឹមលើការវាយគ្នាយកឈ្នះ យកចាញ់នៅឡើយ ដូច្នេះស្ថានភាពនេះហាក់ដូចជាកំពុងតែសង្ឃឹមទៅលើការប្រើអាវុធ ជាជាងការប្រើប្រាស់ការចរចា៕ រក្សាសិទ្ធិដោយ ៖ សុទ្ធលី