ភ្នំពេញ៖ រាជរដ្ឋាភិបាលកម្ពុជា បានយកចិត្តទុកដាក់ខ្ពស់ បន្តការគាំទ្រដល់ការអភិវឌ្ឍសហគ្រិនភាព ដោយផ្តោតសំខាន់លើសហគ្រាសខ្នាតតូច និងមធ្យម(SMEs) ដើម្បីកំណើនការងារ សមធម៌ និងប្រសិទ្ធភាព ក្នុងគោលបំណងគាំទ្រសកម្មភាពបណ្តុះបណ្តាលធនធានមនុស្ស ផលិតភាព ការបង្កើតការងារ សហគ្រិនភាព ភាពច្នៃប្រឌិត និងនវានុវត្តន៍ ក៏ដូចជា ការលើកទឹកចិត្តសហគ្រាសឲ្យមានលក្ខណៈស្របច្បាប់ ព្រមទាំងការទទួលបានសេវាកម្មហិរញ្ញវត្ថុ ក្នុងការពង្រីកសហគ្រាសជាដើម។
ឯកឧត្តម ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងការងារ និងបណ្ដុះបណ្តាលវិជ្ជាជីវៈ ក្នុងកម្មវិធីបិទ ការប្រកួតប្រជែងពាន់រង្វាន់សហគ្រិនថ្នាក់ជាតិឆ្នាំ២០២២ នាពេលថ្មីៗនេះ បានឲ្យដឹងថា សហគ្រាសធុនតូច និងមធ្យម (SMEs) សរុបចំនួនប្រមាណ ៥២ម៉ឺនសហគ្រាស ស្មើនឹង ៩៩,៨% នៃក្រុមហ៊ុនទាំងអស់ បានផ្ដល់ការងារជូនប្រជាជនចំនួន ៧០% នៃការងារទាំងអស់ និងរួមចំណែកប្រមាណ ៥៨%នៃផលិតផលក្នុងស្រុកសរុប (GDP)។
ឯកឧត្តម បានបន្តថា សហគ្រិនមិនត្រឹមតែផ្តល់ឱកាស និងផលប្រយោជន៍ដល់ខ្លួនឯងប៉ុណ្ណោះទេ ប៉ុន្តែការងាររបស់ពួកគេ ក៏បានជួយអភិវឌ្ឍន៍សេដ្ឋកិច្ចជាតិ ផ្ដល់ឱកាសការងារ, កាត់បន្ថយចំណាកស្រុក, បង្កើតប្រាក់ចំណូល និងកាត់បន្ថយភាពក្រីក្រផងដែរ។
គួរបញ្ជាក់ថា បើតាមឯកឧត្តម ពេជ សោភ័ន នៅកម្ពុជា វិស័យសហគ្រាសធុនតូច និងមធ្យម ត្រូវបានចាត់ថ្នាក់សហគ្រាស ជា ៤ប្រភេទ គឺមីក្រូសហគ្រាស, សហគ្រាសខ្នាតតូច, ខ្នាតមធ្យម និងសហគ្រាសខ្នាតធំ។ ក្នុងនោះ សហគ្រាសខ្នាតតូច ខ្នាតមធ្យម (SMEs) ត្រូវបានបែងចែកជា៣ វិស័យធំៗ គឺ វិស័យផលិតកម្ម រួមមាន ការកែច្នៃផលិតផលកសិកម្ម កម្មន្តសាល និងរ៉ែ, វិស័យសេវាកម្ម និងវិស័យពាណិជ្ជកម្ម រួមមាន ការលក់ដុំ និងរាយ៕