ភ្នំពេញ៖ ផលិតផលជលផលធម្មជាតិ និងម្រេចរបស់កម្ពុជា នឹងត្រូវបាននាំចេញទៅប្រទេសចិនឆាប់ៗនេះ ដោយក្នុងនោះស្ថានទូតនៃសាធារណរដ្ឋប្រជាមានិតចិនប្រចាំនៅកម្ពុជា បានឲ្យដឹងនៅថ្ងៃទី២២ ខែវិច្ឆិកា ឆ្នាំ២០២២ថា កម្ពុជានឹងអាចនាំចេញម្រេច និងជលផលធម្មជាតិរបស់ខ្លួនទៅកាន់ទីផ្សារប្រទេសចិន ហើយការដឹកជញ្ជូនដោយផ្ទាល់អាចធ្វើទៅបាន បន្ទាប់ពីអគ្គរដ្ឋបាលគយរបស់សាធារណរដ្ឋប្រជាមានិតចិន បានចេញសេចក្តីប្រកាសដាច់ដោយឡែកអំពីតម្រូវការភូតគាមអនាម័យសម្រាប់ផលិតផលកម្ពុជាទាំងពីរ។
កន្លងទៅ ផលិតផលកសិកម្មសំខាន់ៗរបស់ប្រទេសកម្ពុជា ត្រូវបាននាំចេញទៅទីផ្សារប្រទេសចិន រួមមាន ចេកស្រស់ អង្ករ ដំឡូងមីស្ងួត ម្សៅដំឡូងមី ជ័រកៅស៊ូ ស្វាយស្រស់ ដំណាប់ស្វាយ គ្រាប់ស្វាយចន្ទីកែច្នៃ និងម្សៅកាកាវ។
សូមជម្រាបផងដែរថា ចាប់តាំងពីដើមឆ្នាំ២០២២ មក ភាគីចិន បានបញ្ចប់ការវាយតម្លៃហានិភ័យនៃត្រីប្រាកម្ពុជា ពោតក្រហម និង ផ្លែមានផងដែរ។ បើតាមស្ថានទូតចិន មកដល់ពេលនេះ ផ្លែឈើកម្ពុជាចំនួនបីមុខ គឺចេក ស្វាយ និង មានកម្ពុជា អាចដឹកជញ្ជូនដោយផ្ទាល់ទៅប្រទេសចិន។
ចាប់ពីឆ្នាំ ២០១៩ ដល់ឆមាសទី១ ឆ្នាំ ២០២២នេះ ប្រទេសកម្ពុជា បាននាំចេញកសិផលរបស់ខ្លួនជាង ២,៤ លានតោន ដែលមានតម្លៃ ១,៩៤២ លានដុល្លារទៅកាន់ទីផ្សារប្រទេសចិន។
គួរបញ្ជាក់ថា នៅឆ្នាំមុន ចិនបានក្លាយជាទីផ្សារដ៏ធំជាងគេ ក្នុងការស្រូបទាញផ្លែចេកស្រស់របស់កម្ពុជា មិនតែ ប៉ុណ្ណោះ ប្រទេសចិន បានក្លាយជាទីផ្សារនាំចូលអង្ករច្រើនជាងគេពីប្រទេសកម្ពុជា។ ប្រទេសចិនកំពុងដើរតួនាទីយ៉ាងសំខាន់ក្នុងការទទួលទិញអង្ករពីកម្ពុជា ហើយតម្លៃដែលក្រុមហ៊ុនប្រមូលទិញយកទៅប្រទេសចិន ក៏ខ្ពស់ដែរ បើធៀបទៅគោលដៅប្រទេសនាំចេញមួយចំនួន។ បច្ចុប្បន្នក្រៅពីទីផ្សារប្រទេសចិន ទីផ្សារអឺរ៉ុប ក៏កំពុងមានសន្ទុះនាំចេញ គួរឱ្យកត់សម្គាល់ផងដែរ៕
