ភ្នំពេញ៖ ក្នុងពិធីអបអរសាទរខួប១១ឆ្នាំនៃប្រតិបត្តិការរបស់ក្រុមហ៊ុនមីនីបៀ Minebea(Cambodia) នាព្រឹកថ្ងៃទី០១ ខែធ្នូ ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឲ្យអភិបាលរាជធានីខេត្ត ប្រើប្រាស់អំពូលវៃឆ្លាតតាមដងផ្លូវ ដើម្បីសន្សំការចំណាយអគ្គិសនី។
សម្តេចតេជោ ហ៊ុន សែន បានបញ្ជាក់ថា «អំពូលវៃឆ្លាត ដាក់តាមដងផ្លូវ គឺអាចបញ្ជាទិញពីរោងចក្រមីនីបៀតបស់ជប៉ុនដែលផលិតនៅស្រុកយើងស្រាប់ »។ សម្តេចបានបញ្ជាក់ថា«អំពូលវៃឆ្លាត គឺប្រសិនបើនៅលើដងផ្លូវដ៏វែង ហើយមិនមានឡានបរកាត់អំពូលនោះនឹងបន្ថយពន្លឺហើយនឹងកាត់បន្ថយការប្រើប្រាស់អគ្គិសនី»។
សម្តេចតេជោ ហ៊ុន សែន ក៏បានបញ្ជាក់ផងដែរថា នេះជាថាមពលស្អាតដោយកម្ពុជាបានខិតខំ ថាមពលស្អាតនេះមកដល់ពេលនេះយើងមានរហូតទៅដល់ជាង៦០ភាគរយនៃថាមពលស្អាតដែលកើតចេញពីវារីអគ្គិសនី ពីពន្លឺព្រះអាទិត្យ»។ សម្តេចតេជោ ហ៊ុន សែន បានបន្តថា «អាចចាត់ទុកកម្ពុជា ជាប្រទេសមួយ ដែលទទួលថាមពលស្អាត»។
សម្តេចតេជោ លើកឡើងថា សមិទ្ធិផលទាំងអស់នេះ បានកើតឡើងជាបន្តបន្ទាប់ ដោយសារកត្តាសុខសន្តិភាព និងភាពអំណោយផលនៃការវិនិយោគនៅកម្ពុជា។
សម្តេច ហ៊ុន សែន បានមានប្រសាសន៍ថា «យើងមិនត្រឹមតែពង្រីកក្រុមហ៊ុនរបស់ជប៉ុន ដែលមានស្រាប់ទេ យើងត្រូវទាក់ទាញក្រុមហ៊ុនដទៃទៀត»។ សម្តេចតេជោ ហ៊ុន សែន ក៏បានបង្ហាញការរីករាយដែលទំហំពាណិជ្ជកម្មកម្ពុជា ជប៉ុនមានការកើនឡើងផងដែរ។ សម្តេចបានបញ្ជាក់ថា «ទំនាក់ទំនងសេដ្ឋកិច្ចល្អ គឺកាន់តែជំរុញទំនាក់ទំនងការទូតកាន់តែរឹងមាំ»។
ជាមួយគ្នានេះសម្តេចតេជោ ក៏បានបញ្ជាក់ថា«ឯកឧត្តម កែវ រតនៈ នឹងនាំអគ្គនាយកក្រុមហ៊ុន មីនីបៀជប៉ុនទៅកាន់ខេត្តពោធិ៍សាត់ ដោយគ្រោងបង្កើតរោងចក្រអគ្គិសនីផលិតដោយពន្លឺព្រះអាទិត្យកំលាំងរហូតដល់ជាង៩០មេហ្គាវ៉ាត់»៕