ប៉ូលិសថៃ កាលពីថ្ងៃទី២៩ ខែវិច្ឆិកា ឆ្នាំ២០២២ បានឆ្មក់ចូលឆែកឆេរផ្ទះប្រណីត និងខុនដូ ចំនួន១១ទីតាំង របស់ពួកមូលធនចិន ដែលត្រូវបានចោទប្រកាន់ជាប់ពាក់ព័ន្ធក្នុងអាជីវកម្ម «ប្រផេះ» នៅក្នុងប្រទេសថៃ។
តាមរយៈការឆែកឆេរផ្ទះប្រណីតចំនួន៣ ដែលក្រុមម៉ាហ្វីយ៉ាចិន យកធ្វើជាលំនៅឋាន នៅតំបន់ Soi La Salle ក្នុងតំបន់ Bang Na ទីក្រុងបាងកក ប៉ូលិសបានរឹបអូសរឹបអូសរថយន្តទំនើបៗ១០គ្រឿង, ថ្នាំញៀនជាច្រើនដែលមានស្លាកអក្សរចិន បារីចិន និងស្រារត់ពន្ធមួយចំនួន ទូសុវត្ថិភាពចំនួនបី បារីអេឡិចត្រូនិក និងឧបករណ៍លេងម៉ាចុង និងព្រមទាំងកាបូបសម្លៀកបំពាក់ម៉ាកយីហោមួយចំនួនទៀត ដែលនឹងត្រូវត្រួតពិនិត្យបន្ថែម។
ដោយឡែក នៅខុនដូប្រណីតមួយកន្លែងទៀត នៅតំបន់ Charoen Nakhon សមត្ថកិច្ចបានដកហូតលុយ, ប័ណ្ណកម្មសិទ្ធិ, សម្ភារប្រើប្រាស់, រថយន្ត Porsche 911 មួយគ្រឿង, រថយន្ត Mercedes-Benz G calss ពីរគ្រឿង និង Toyota Alphard ពណ៌សមួយគ្រឿង និងរឹបអូសផ្ទះជួលមួយខ្នងដែលមានតម្លៃប្រហែល ១០០ លានបាត។
បើតាមសេចក្តីរាយការណ៍ បានឲ្យដឹងថា ផ្ទះប្រណិតនីមួយៗនៅ Lasalle មានតម្លៃជាង ៥០ លាន ឬច្រើនជាងនេះ ដែលមានជនជាតិចិនចូលមកទិញ ដើម្បីស្វាគមន៍ប្រជាជនចិនដែលធ្វើដំណើរទៅកាន់ប្រទេសថៃ ហើយក៏មានអ្នកមើលថែសម្អាតផ្ទះជូនផងដែរ។ បន្ថែមពីលើនេះ មុននេះ គេបានរកឃើញថា មានអ្នកទេសចរចិនមួយក្រុមដែលមានទំនាក់ទំនងនឹងហាង Jin Ling មកលេងបៀរ និងជួបជុំគ្នានៅផ្ទះប្រណីតទាំងនោះ។
លោក Torsak Sukvimol អគ្គស្នងការរងនគរបាលជាតិ បានឲ្យដឹងថា ក្រុមមូលធនចិនទាំងនោះ បានដំណើរការអាជីវកម្មទាក់ទងនឹងទេសចរណ៍ដ៏ទូលំទូលាយ ដែលរួមមានការរៀបចំកញ្ចប់ដំណើរកម្សាន្តទៅកាន់ប្រទេសថៃ សម្រាប់ភ្ញៀវទេសចរចិនដែលមានទ្រព្យសម្បត្តិ ការផ្តល់សេវារថយន្តក្រុងដឹកពួកគេទៅកាន់កន្លែងកម្សាន្ត និងកន្លែងលេងល្បែងស៊ីសង។
លោក Torsak បាននិយាយថា ប៉ូលិស និងមន្ត្រីមកពីក្រុមប្រឹក្សាត្រួតពិនិត្យគ្រឿងញៀន នឹងធ្វើដំណើរទៅកាន់ទីក្រុង Hua Hin ដើម្បីរឹបអូសយកយន្តហោះឯកជនមួយគ្រឿង ដែលត្រូវបានចោទប្រកាន់ថាជា កម្មសិទ្ធិរបស់លោក Chaiyanat Kornchayanant ហៅថា “Tohao” ជាពាណិជ្ជករជនជាតិចិនដែលមានទំនាក់ទំនងជាមួយអាជីវកម្ម “ប្រផេះ” នេះ។
Chaiyanat ត្រូវបានគេសង្ស័យថា ជាបុគ្គលសំខាន់ក្នុងរង្វង់ជំនួញចិន ដែលត្រូវបានគេចោទថាមានជាប់ពាក់ព័ន្ធនឹងប្រតិបត្តិការជាចម្បងនៅទីក្រុងបាងកក។ បច្ចុប្បន្នជននេះ ត្រូវបានឃុំខ្លួនបណ្ដោះអាសន្នពីបទជួញដូរគ្រឿងញៀន។
Chaiyanat ដែលរស់នៅប្រទេសថៃជាង២០ឆ្នាំ និងមានប្រពន្ធជាជនជាតិថៃ ត្រូវបានគេនិយាយថា បានបណ្តុះទំនាក់ទំនងជិតស្និទ្ធជាមួយអ្នកនយោបាយថៃមួយចំនួន ដែលត្រូវបានដឹងថាបានចំណាយលុយសូកប៉ាន់ពួកគេ ៣លានបាត ដើម្បីដំណើរការអាជីវកម្មខុសច្បាប់ក្នុងចំណោមនោះ៕ រក្សាសិទ្ធិដោយ៖ លឹម ហុង
