ភ្នំពេញ៖ យន្តការរបស់រាជរដ្ឋាភិបាល ក្នុងការជំរុញចលនាភូមិមួយផលិតផលមួយ គឺដើម្បីកាត់បន្ថយភាពក្រីក្រ ការធ្វើចំណាកស្រុក និងបង្កើនចំណូលជូនប្រជាពលរដ្ឋ ដែលជាផលិតករ កសិករ សមាគម សហគមន៍ និងសេវាករ។
![](https://cen.com.kh/wp-content/uploads/2022/12/279519600_527956312325050_2465834065075711243_n-1024x661.jpg)
ការជំរុញចលនាភូមិមួយផលិតផលមួយ ក៏ដើម្បីឱ្យមានការទទួលស្គាល់នូវគុណភាពផលិតផល និងស្វែងរកទីផ្សារលក់ចេញរបស់ផលិតផល។ សម្រាប់ខេត្តកំពត មានផលិតផលតចំនួន ២១មុខ ត្រូវបានចុះបញ្ជីភូមិ១ ផលិតផល១ ដែលជាចំនួនច្រើនជាងខេត្តផ្សេងៗ។
![](https://cen.com.kh/wp-content/uploads/2022/12/299691950_1528680954232918_1490755126181909831_n-1024x577.jpg)
លោក ពេញ ធារម្យ អភិបាលរងខេត្តកំពត បានបើកកិច្ចប្រជុំមួយដើម្បីត្រួតពិនិត្យពាក់កណ្ដាលអាណត្តិគោលនយោបាយជាតិស្តីពី ការជំរុញចលនាភូមិមួយផលិតផលមួយ២០១៦-២០២៦ និងផែនការយុទ្ធសាស្ត្រជាតិស្តីពី ការជំរុញចលនាភូមិមួយផលិតផលមួយ ៥ឆ្នាំ លើកទី១ ២០១៩-២០២៣។
![](https://cen.com.kh/wp-content/uploads/2022/12/photo_2022-12-01_13-58-32-1024x654.jpg)
លោក បានបញ្ជាក់ថា ខេត្តកំពត ជាខេត្តមួយ ដែលមានសក្តានុពលជាច្រើនស្ទើគ្រប់វិស័យ ហើយការងារជំរុញចលនាភូមិ១ ផលិតផល១ បានដំណើរការទៅដោយរលូន នឹងទទួលបានលទ្ធផលល្អគួរជាទីមោទនៈ។ លោកក៏បានជំរុញដល់ក្រុមការងារលេខាធិការដ្ឋាន ក៏ដូចជាអាជ្ញាធរ និងមន្ទីរពាក់ព័ន្ធ ត្រូវចូលរួមសហការគ្នាឱ្យបានស្អិតរមួត ធ្វើយ៉ាងណាឱ្យការងារជំរុញចលនាភូមិ១ ផលិតផល១ ក្នុងខេត្តទទួលបានផ្លែផ្កា និងលទ្ធផលល្អបន្ថែមទៀតសម្រាប់ឆ្នាំក្រោយ។
![](https://cen.com.kh/wp-content/uploads/2022/12/299660906_1528681174232896_5086299299158522439_n-1024x768.jpg)
សម្រាប់ខេត្តកំពត ក្នុងរយៈពេលអនុវត្តនៃការជំរុញចលនាភូមិ១ ផលិតផល១ រយៈពេល ៥ឆ្នាំកន្លងមកនេះ បានធ្វើការចុះបញ្ជីផលិតផលជូនផលិតករ កសិករ សមាគម សហគមន៍ និងសេវាករដែលបម្រើលើសេវាកម្មផ្សេងៗបានចំនួន ២១មុខ ហើយនឹងត្រៀមផលិតផលចំនួន ២៦មុខទៀត ដើម្បីដាក់បញ្ជូលក្នុងបញ្ជីភូមិ១ ផលិតផល១៕