នេះជាវីដេអូ និងរូបភាពចុងក្រោយ ដែលបង្ហាញឲ្យឃើញពួកអ្នកភូមិមួយនៅក្នុងប្រទេសឥណ្ឌូនេស៊ី បាននាំគ្នាវះពោះពស់ថ្លាន់ដ៏ធំ១ក្បាល ក្នុងក្តីដ៏រន្ធត់ពេកក្រៃគ្រប់ៗគ្នា ដើម្បីយកចេញសាកសពស្រ្តីម្នាក់ បន្ទាប់ពីពស់នេះត្រូវបានគេចាប់បាននៅជិតកន្លែងដែលស្រ្តីរងគ្រោះបានបាត់ខ្លួន ខណៈកំពុងមើលថែសួនបន្លែរបស់នាង ។
សាកសពរបស់ស្ត្រីរងគ្រោះឈ្មោះ Wa Tiba អាយុ ៥៤ ឆ្នាំ ត្រូវបានរកឃើញកាលពីថ្ងៃសុក្រ នៅពេលដែលអ្នកភូមិបានវះពោះរបស់ពស់ថ្លាន់ដែលមានប្រវែង ៧ ម៉ែត្រ ដែលត្រូវបានរកឃើញនៅក្នុងភូមិ Persiapan Lawela នៅលើកោះ Muna នៃឆ្នេរសមុទ្រ Sulawesi ។
ប៉ូលីសម្នាក់ឈ្មោះ Hamka និយាយថា៖ «អ្នកស្រុកបានមានការសង្ស័យថា ពស់ថ្លាន់នេះបានលេបស្ត្រីរងគ្រោះ ហេតុដូច្នេះ ពួកគេក៏បានសម្លាប់វា និងបន្ទាប់មក នាំយកវាចេញក្នុងចម្ការ ដែលជាទីកន្លែងវាបានលេបស្ត្រីរងគ្រោះ» ។
អ្នកភូមិបន្ទាប់មក ក៏បានសម្រេចធ្វើការវះពោះពស់ថ្លាន់នេះ និងពិតជាមានការស្លុតរន្ធត់ជាខ្លាំង នៅពេលរកឃើញសពស្ត្រីរងគ្រោះនៅខាងក្នុង ។
អ្នកស្រុកប្រហែល ១០០ ក្នុងនោះមានសាច់ញាតិជនរងគ្រោះ បានចាប់ផ្តើមស្វែងរកស្ត្រីរងគ្រោះ បន្ទាប់នាងពុំបានឃើញវិលត្រឡប់មកផ្ទះវិញពីចម្ការ នៅយប់ថ្ងៃព្រហស្បតិ៍ ។
លោក Hamka បានឲ្យដឹងទៀតថា អ្នកភូមិបានរកឃើញពស់ថ្លាន់នេះ នៅកំពុងដេកចម្ងាយប្រែល ៣០ ម៉ែត្រ ពីស្បែកជើង និងផ្គាក់ (កាំបិតផ្លែវែងសម្រាប់ឆ្កាព្រៃ) របស់ Tiba nig ។ លោកបន្ថែមថា ពស់ថ្លាន់នេះបានលេបក្បាលរបស់ស្ត្រីរងគ្រោះមុន ហើយខ្លួនប្រាណរបស់នាងត្រូវបានរកឃើញខូចខាត ៕ ឧត្តម
