នេះជាករណីប្លន់ដ៏សាហាវមិននឹកស្មានដល់ ខណៈដែលចោរប្រដាប់អាវុធមានគ្នីគ្នា៤នាក់ ជិះម៉ូតូ២គ្រឿង ចូលប្លន់បាញ់ហាងមាសឆៅៗ ដែលធ្វើឲ្យអ្នកលក់ដូរជិតខាង និងអ្នកដំណើរ រត់ក្រាបព្រលឹងចុងសក់។ តែទោះជាយ៉ាងណា សំណាងអាក្រក់ ប្លន់ប៉ះចំម្ចាស់ហាងជំនាញបាញ់ បានទាញកាំភ្លើងវែងបាញ់ស្រោចវិញរត់ចែកជើង ក្នុងនោះចោរម្នាក់រងរបួសធ្ងន់ដេកនៅនឹងកន្លែងតែម្តង។
តាមសារព័ត៌មានថៃ បានចុះផ្សាយឲ្យដឹងថា នៅវេលាម៉ោង ១ រសៀលថ្ងៃទី៨ ខែធ្នូ ឆ្នាំ២០២២ មជ្ឈមណ្ឌលវិទ្យុ ១៩១ បានរាយការណ៍ថា មានករណីប្លន់ប្រដាប់អាវុធ ដោយចោរ៤នាក់ បានបាញ់វាយឆ្មក់ចូលហាងមាសមួយកន្លែង ស្ថិតនៅទល់មុខសាលារៀន Tak Pittayakom ក្នុងស្រុក Muang ខេត្ត Tak។
សេចក្តីរាយការណ៍បានឲ្យដឹងថា ចោរបានស្រែកខ្លាំងៗ និងដកកាំភ្លើងខ្លីបាញ់បំបែកកញ្ចក់មុខហាង រួចទាត់ទម្លុះចូលទៅក្នុងហាងយ៉ាងសាហាវ។ ប៉ុន្តែ អ្វីដែលមិននឹកស្មានដល់នោះ គឺខណៈពេលចោរម្នាក់ក្នុងចំណោមនោះ បានប្រើម៉ាស៊ីនកាត់ ដើម្បីកាត់ចម្រឹងដែកប្រមូលមាស ស្រាប់តែម្ចាស់ហាងយកកាំភ្លើងវែងបាញ់ស្រោចវិញ ធ្វើឲ្យពួកចោររត់ចែកជើងតែម្តង។ ប៉ុន្តែ សំណាងអាក្រក់ ចោរម្នាក់ត្រូវគ្រាប់កាំភ្លើងរងរបួសធ្ងន់ធ្ងរដេកនៅនឹងថ្នល់ ខណៈម្នាក់ទៀតត្រូវចាប់ខ្លួន និង២នាក់ទៀតរត់គេចខ្លួនរួច។
លោក Pisit Rapitphan អាយុ ៤៦ ឆ្នាំ ជាម្ចាស់ហាង បានប្រាប់ប៉ូលិសថា គាត់បានឃើញក្រុមចោរបានប្រើកាំភ្លើងបាញ់បំបែកកញ្ចក់ មុនពេលទាត់ទ្វារចូល ហើយនៅពេលនោះ គាត់បានប្រាប់ប្រពន្ធរបស់គាត់ឲ្យលាក់ខ្លួននៅខាងក្រោយទូមាស រួចគាត់ក៏យកកាំភ្លើងមកបាញ់ការពារខ្លួន ដោយបាញ់ត្រូវចោរកាន់ម៉ាស៊ីនកាត់ដែកម្នាក់ បន្ទាប់ពីរូបគេរត់ចេញការហាង ព្យាយាមឡើងជិះម៉ូតូ។
ជុំវិញហេតុនេះផងដែរ អ្នកសារព័ត៌មានបានរាយការណ៍ថា អាណាព្យាបាលសិស្ស ពិតជាមានការព្រួយបារម្ភសុវត្ថិភាពកូនៗយ៉ាងខ្លាំង នៅក្នុងសាលា Tak Pittayakom ដោយសារខ្លាចថា នឹងត្រូវរងការផ្ទុះអាវុធបែបនេះ ហើយក៏បញ្ជាក់ថា ក្រុមចោរនេះគឺជាក្រុមដដែលដែលបានប្រព្រឹត្តអំពើហិង្សា ប្លន់នៅហាងមាសម្តងរួចហើយ កាលពីដើមឆ្នាំនេះ នៅស្រុក Phop Phra ខេត្ត Tak។
តាមប្រភពចែករំលែកនៅលើបណ្តាញសង្គមថៃ បានឲ្យដឹងថា ម្ចាស់ហាងពិតជាមិនធម្មតានោះទេ ដោយទទួលបានពានបាញ់កាំភ្លើង និងមានកាំភ្លើងវែងច្រើនដើម ទុកការពារផងដែរ៕ រក្សាសិទ្ធិដោយ៖ លឹម ហុង
វីដេអូស្តែងៗ => Click on this link https://web.facebook.com/100027140194153/videos/861201335021840/https://web.facebook.com/100027140194153/videos/861201335021840/