ករណីនៃអំពើប្លន់ប្រដាប់អាវុធដ៏សាហាវ ពីសំណាក់ក្រុមចោរ៤នាក់ បានធ្វើសកម្មភាពបាញ់បំបែកចូលហាងមាសមួយកន្លែង នៅទល់មុខសាលារៀន Tak Pittayakom ខេត្ត Tak ហើយជាលទ្ធផល ចោរម្នាក់ត្រូវម្ចាស់ហាងបាញ់ឲ្យរងរបួសធ្ងន់, ម្នាក់ត្រូវចាប់ខ្លួន និង២នាក់ទៀតរត់គេចខ្លួនរួច បានកំពុងធ្វើឲ្យមានការចាប់អារម្មណ៍ខ្លាំង នៅលើបណ្តាញសង្គម។
ជុំវិញហេតុការណ៍នេះ សារព័ត៌មានប៉ុស្តិ៍លេខ៣ នៅថ្ងៃទី៩ ខែធ្នូ ឆ្នាំ២០២២ នេះ បានរាយការណ៍ថា លោក Pisit អាយុ ៤៦ ឆ្នាំ ម្ចាស់ហាងមាស Yaowarat បានបង្ហើបថា មានឧក្រិដ្ឋជន៤នាក់ បានចូលមក និងចាប់ផ្តើមបាញ់ទម្លុះទ្វារហាង។ ឃើញដូច្នេះ គាត់ក៏បានប្រាប់ប្រពន្ធ ឱ្យលាក់ខ្លួនខាងក្រោយទូរមាស។ ហើយភ្លាមៗនោះ ជនល្មើសម្នាក់ក្នុងចំណោមទាំង៤នាក់ បានប្រើម៉ូទ័រកាត់ យកទៅចម្រឹងដែក ដើម្បីចូលប្លន់។
លោក Pisit បន្តថា ឃើញដូច្នេះ គាត់ក៏ដើរទៅខាងក្រោយហាង ហើយរើសកាំភ្លើងវែងមួយដើម ដើម្បីបាញ់បណ្តេញក្រុមចោរ។ គ្រាប់ដំបូង បាញ់គំរាមដោយបាញ់សំដៅពិដាន និងគ្រាប់ទី២-៣-៤ បានបាញ់ទៅលើពួកគេ ហើយគ្រាប់ទី៤ ត្រូវចោរម្នាក់នៅចុងក្រោយ ដែលកំពុងព្យាយាមបញ្ឆេះម៉ូតូរត់គេចខ្លួន តែម៉ូតូមិនឆេះ។ ចោររូបនេះ បានរត់ទាំងរបួស ហើយក៏បានដេកដួលនៅលើផ្លូវ ប្រហែល ១០ ម៉ែត្រពីហាង។ បន្ទាប់មក ចោររងរបួសនោះ ក៏ត្រូវបានយកទៅសង្គ្រោះបន្ទាន់។
មានសេចក្តីរាយការណ៍ថា លោក Pisit ជាអ្នកបាញ់កាំភ្លើង ដោយគាត់បានប្រាប់ថា នៅពេលទំនេរ គាត់បានទៅហាត់បាញ់នៅមូលដ្ឋានទ័ពលេខ ៣១០ ជាប្រចាំ។ ហើយក៏ធ្លាប់ទទួលបានពានរង្វាន់បាញ់ត្រង់ផងដែរ។
លោកវរសេនីយ៍ទោ Kitti Kerdphon នាយការិយាល័យកិច្ចការស៊ីវិល កងវរសេនាតូចលេខ៣១០ ដែលជាគ្រូបង្ហាត់អាវុធដល់លោក Phisit បានបង្ហើបថា លោក Pisit បានមកហ្វឹកហាត់ផ្នែកប្រើប្រាស់អាវុធ នៅមូលដ្ឋានវាលស្រែ ជាមួយប្រពន្ធកាលពី៨ឆ្នាំមុន ដោយម្ចាស់ហាងមាសរូបនេះចូលចិត្តកីឡាបាញ់ប្រហារនេះណាស់។ គាត់ធ្លាប់ចូលរួមក្នុងការប្រកួតបាញ់ដែលរៀបចំដោយកីឡដ្ឋានក្នុងខេត្ត Tak ហើយក៏ទទួលបានពានរង្វាន់ផងដែរ។
គ្រូបង្ហាត់ខាងលើ បន្តថា «ទោះយ៉ាងណា សព្វថ្ងៃនេះ គឺនៅពេលទំនេរ លោក Pisit តែងតែទៅហាត់បាញ់កាំភ្លើងដោយផ្ទាល់ ជាមួយកាំភ្លើងមានច្រើនប្រភេទ ហើយរាល់ពេលដែលខ្ញុំទៅ ខ្ញុំតែងតែណាត់ជួបជាមួយគ្រូបង្គោល ដើម្បីណែនាំការប្រើប្រាស់។ គាត់ជាមនុស្សមានចិត្តល្អ ចិត្តស្ងប់ ងាយស្រួលក្នុងការបង្រៀនប្រើកាំភ្លើងក្នុងផ្លូវល្អ»។
ដោយឡែក ទាក់ទងរឿងបាញ់ចោរនេះផងដែរ មេធាវីម្នាក់ លោក Decha បានបង្ហោះឃ្លីបតាមរយៈទំព័រមេធាវីរបស់ខ្លួន ដោយបានបញ្ជាក់ថា ក្នុងករណីមានមនុស្សយកកាំភ្លើងចូលផ្ទះ ឬក្នុងហាង មិនថាម្ចាស់បាញ់ប៉ុន្មានគ្រាប់ទេ គឺចាត់ទុកថាជាការការពារខ្លួន។ ចំណែកក្រុមចោររត់ចេញពីហាងជារឿងបន្តបន្ទាប់។ បើតាមច្បាប់ចាត់ទុកថាសមហេតុផល ព្រោះយើងមិនបានចេញពីហាង ហើយសម្លាប់ពួកគេ។ ពេលនោះគ្រោះថ្នាក់មិនទាន់ចប់នៅឡើយទេ ព្រោះជនដៃដល់នៅតែកាន់កាំភ្លើង។ ដូច្នេះ ក្នុងករណីនេះ លោកយល់ឃើញថា មិនគួរមានបទល្មើសអ្វីកើតឡើងនោះទេ៕ រក្សាសិទ្ធិដោយ៖ លឹម ហុង
