ភ្នំពេញ៖ យោងតាមរបាយការណ៍របស់អគ្គនាយកដ្ឋានគយ និងរដ្ឋាករ បានឲ្យដឹងថា ក្នុងរយៈពេល១១ ខែ នៃឆ្នាំ២០២២នេះ ប្រទេសកម្ពុជា បាននាំចូលផលិតផលប្រេង និងឧស្ម័ន ក្នុងទំហំទឹកប្រាក់ប្រមាណ ៣.៣៨ ពាន់លានដុល្លារ កើនឡើងជិត៥៨ ភាគរយធៀបនឹងរយៈពេលដូចគ្នាកាលពីឆ្នាំមុន។
បច្ចុប្បន្ននេះ កម្ពុជានាំចូលប្រេង និងឧស្ម័ន ខណៈធនធានប្រេង និងឧស្ម័ននៅបាតសមុទ្ររបស់ខ្លួន មិនទាន់ បានទាញយកមកប្រើប្រាស់នៅឡើយ។
ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានឲ្យដឹងថា តម្រូវការផលិតផលប្រេងនៅកម្ពុជា ត្រូវបានគេព្យាករណ៍ថា នឹងកើនឡើងដល់ ៤,៨លានតោននៅឆ្នាំ២០៣០ ពោលគឺកើនឡើងពី ២,៨លានតោនក្នុងឆ្នាំ២០២០។ ហើយការវិនិយោគបន្ថែមទៀតនៅក្នុងវិស័យនេះ គឺចាំបាច់ដើម្បីឆ្លើយតបទៅនឹងតម្រូវការដែលកំពុងកើនឡើងនេះផងដែរ៕
