ភ្នំពេញ៖ យោងតាមសេចក្តីប្រកាសរបស់ក្រសួងទេសចរណ៍ រាជរដ្ឋាភិបាលកម្ពុជា មិនមានគោលនយោបាយតម្រូវឱ្យភ្ញៀវទេសចរ នាំសាច់ប្រាក់ ១០០០ ដុល្លារ ឬ ២០០០ ដុល្លារ ចូលប្រទេសកម្ពុជានោះទេ”។
បើតាមក្រសួងទេសចរណ៍ រាជរដ្ឋាភិបាលកម្ពុជា បានបញ្ជាក់ថា មិនតម្រូវឱ្យភ្ញៀវទេសចរ បង្ហាញតម្លៃពី ១០០០ ទៅ ២០០០ដុល្លារ មុនពេលចូលប្រទេសកម្ពុជានោះទេ។ ការប្រកាសរបស់ក្រសួង ធ្វើឡើង បន្ទាប់ពីបុគ្គលិកក្រុមហ៊ុនអាកាសចរណ៍មួយចំនួន បានស្នើឱ្យអ្នកទេសចរបង្ហាញសាច់ប្រាក់ ១០០០ ទៅ ២០០០ដុល្លារ មុនពេលឡើងយន្តហោះ។
ឯកឧត្តម ហោ សារុន រដ្ឋលេខាធិការក្រសួងទេសចរណ៍ បានឲ្យដឹងថា រាជរដ្ឋាភិបាល បានលើកលែងការស្នើសុំប័ណ្ណចាក់ថ្នាំបង្ការរួចហើយ ការធ្វើតេស្តរហ័ស ហើយទាមទារតែលិខិតបញ្ជាក់គយ និងពាក្យសុំទិដ្ឋាការនៅពេលមកដល់ប៉ុណ្ណោះ។
សេចក្តីប្រកាស បានបន្ថែមថា ការសាកសួរភ្ញៀវទេសចរអំពីចំនួនទឹកប្រាក់ ដែលត្រូវយកជាមួយពួកគេមកនោះ គឺជាការទទួលខុសត្រូវរបស់មន្ត្រីនៅច្រកទ្វារអន្តរជាតិ ដែលគួរធ្វើតែក្នុងករណីខ្លះប៉ុណ្ណោះ។ មន្រ្តីក្រសួងទេសចរណ៍ ក៏បានអំពាវនាវ ឱ្យភ្ញៀវទេសចរទាំងអស់ គោរពតាមតម្រូវការរបស់កម្ពុជា និងស្វាគមន៍ភ្ញៀវទេសចរ ដែលមកទស្សនាប្រទេសកម្ពុជា៕