ភ្នំពេញ៖ យោងតាមក្រសួងទេសចរណ៍ បានឲ្យដឹងថា នៅសប្តាហ៍ទី៤ ខែធ្នូ ចាប់ពីថ្ងៃទី ១៩-២៥ ខែធ្នូ ឆ្នាំ២០២២ កម្ពុជាទទួលបានភ្ញៀវទេសចរសរុបចំនួន ៤៣៩,០៤៦នាក់។ ប្រជាពលរដ្ឋខ្មែរចំនួន ៤០២.៣៤៧នាក់ និងភ្ញៀវបរទេស ៣៦.៦៩៩នាក់។ តំបន់ទេសចរណ៍សំខាន់ៗរួមមាន៖ ខេត្តព្រះសីហនុ ១៩០,០១៥ នាក់។ ខេត្តសៀមរាប ៧៦,០២២ នាក់។ រាជធានីភ្នំពេញ ៣២,១៧៥នាក់។ ខេត្តកំពត ២៧.៦៨១ នាក់។ ខេត្តបាត់ដំបង ១៩.៩៧០ នាក់។ ខេត្តកំពង់ចាម ១៤.១៦១ នាក់។ ខេត្តកែប ១០.៨៧៨ នាក់។
យោងតាមការព្យាករណ៍សម្រាប់ឆ្នាំ ២០២២ កម្ពុជាអាចទទួលបានភ្ញៀវទេសចរជាតិសរុបពី ១២.៥ ទៅ ១៣លាននាក់ លើសពីផែនការដែលបានកំណត់ក្នុងផែនទីបង្ហាញផ្លូវស្តីពីការស្តារ និងផ្សព្វផ្សាយទេសចរណ៍ក្នុង និងក្រោយវិបត្តិកូវីដ-១៩ ខណៈដែលភ្ញៀវទេសចរអន្តរជាតិ នឹងកើនឡើងដល់ប្រហែល ២.២ លាននាក់នៅក្នុងឆ្នាំ ២០២២។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា វិស័យឯកជននៅតែបន្តមានសុទិដ្ឋិនិយមចំពោះលំហូរភ្ញៀវទេសចរ នៅចុងឆ្នាំ២០២២នេះ ជាពិសេសការរៀបចំសម្រាប់ឆ្នាំថ្មី (Countdown) និងកម្មវិធីផ្សេងៗនៅចុងសប្តាហ៍កន្លងទៅនេះ។
គួរបញ្ជាក់ថា ក្នុងរយៈពេល ១១ ខែដើមឆ្នាំ ២០២២នេះ កម្ពុជាទទួលបានភ្ញៀវទេសចរក្នុងស្រុកប្រមាណ ១១,៦៤ លាននាក់ និងភ្ញៀវអន្តរជាតិចំនួន ១,៩១ លាននាក់៕
