ប៉ូលីស Kerala កាលពីថ្ងៃចន្ទ បានចាប់ខ្លួននារីអាយុ ១៩ ឆ្នាំម្នាក់ ស្ថិតនៅខាងក្រៅព្រលានយន្តហោះ Kozhikode ពីបទរត់ពន្ធមាស។ ជនជាប់ចោទមានឈ្មោះ Shahla មានស្រុកកំណើតនៅស្រុក Kasaragod បានមកដល់អាកាសយានដ្ឋានអន្តរជាតិ Kozhikode ពីទីក្រុងឌូបៃ។
នាង Shahla ត្រូវបានដឹងថា បានគ្រប់គ្រងគេចចេញជាមួយមាសដែលរត់ពន្ធ ពីការត្រួតពិនិត្យរបស់គយ។ តែទោះជាយ៉ាងណា ក្រុមប៉ូលីស Kerala ដែលបានទទួលព័ត៌មានជាក់លាក់អំពីការរត់ពន្ធមាសរបស់នាង បានកំពុងរង់ចាំ Shahla នៅខាងក្រៅព្រលានយន្តហោះរួចស្រេច ហើយចាប់ខ្លួននាងយកទៅឃុំឃាំងតែម្តង។
គេជឿថា ក្រុមគូប្រជែងមួយក្រុម ប្រហែលជាបានធ្វើឲ្យបែកធ្លាយព័ត៌មាននេះដល់ប៉ូលិស។ ព្រោះថា នៅកន្លែងឃុំឃាំងរបស់ប៉ូលីស Shahla ដំបូងឡើយបានបដិសេធថា នាងមិនមែនជាអ្នកដឹកជញ្ជូនមាសទេ ហើយនាងគួរតែត្រូវបានគេដោះលែង។ ជាក់ស្តែង សូម្បីតែការពិនិត្យអីវ៉ាន់របស់នាង ក៏ក្លាយជារឿងឥតប្រយោជន៍ដែរ។
ទោះជាយ៉ាងនេះក្តី សមត្ថកិច្ចមិនចុះចាញ់ឡើយ ហើយនាងត្រូវបានពិនិត្យខ្លួនប្រាណ និងបានរកឃើញមាសទម្ងន់ ១,៨៨៤ ក្រាម មានតម្លៃមួយកោដិរូពី (ស្មើនឹងជាង ១២ ម៉ឺនដុល្លារ)។
យោងតាមប៉ូលីស Shahla គឺជាអ្នករត់ពន្ធមាសជាលើកដំបូង។
សារព័ត៌មានក្នុងស្រុករាយការណ៍ថា Shahla ដែលរៀបការរួចហើយ បានទៅទីក្រុងឌូបៃ កាលពីសប្តាហ៍មុន ដើម្បីជួបស្វាមី និងចូលរួមសម្ភាសន៍។ នាងត្រូវបានមិត្តភ័ក្តិម្នាក់ ប្រគល់មាសឲ្យ ហើយត្រូវបានគេឲ្យប្រាក់ចំនួន ៦០,០០០ រូពី (ស្មើនឹង ៧០០ ដុល្លារ) ដើម្បីធ្វើជាអ្នកដឹកជញ្ជូន។
នេះគឺជាការប៉ុនប៉ងរត់ពន្ធមាសលើកទី៨៧ ដែលត្រូវបានចាប់ខ្លួនដោយប៉ូលីស Kerala ពីខាងក្រៅព្រលានយន្តហោះ Kozhikode ខណៈការរត់ពន្ធមាសនេះ បានរីករាលដាលពេញអាកាសយានដ្ឋានអន្តរជាតិចំនួនបួន ក្នុងរដ្ឋ Kerala ៕ រក្សាសិទ្ធិដោយ៖ លឹម ហុង
