ភ្នំពេញ៖ វេទិកាស្តីពី “ការជំរុញពាណិជ្ជកម្ម និងវិនិយោគកម្ពុជា-ចិន (ខេត្តក្វាងស៊ី)” នៅថ្ងៃទី៦ ខែមករា ឆ្នាំ២០២៣នេះ កម្ពុជា មានគោលដៅជំរុញផលិតផលសក្តានុពលរបស់កម្ពុជា ទៅកាន់ទីផ្សារចិន ក្នុងឆ្នាំ២០២៣នេះ។
មន្រ្តីអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្មកម្ពុជា ឯកឧត្តម កៅ កោសល មានប្រសាសន៍ថា កម្ពុជា បានបន្តធ្វើកិច្ចសហប្រតិបត្តិការជាមួយប្រទេសចិន លើកិច្ចការជាច្រើនទាក់ទងនឹងពាណិជ្ជកម្ម មានដូចជា បានបង្កើតមជ្ឈមណ្ឌលពាណិជ្ជកម្មឯកជនកម្ពុជា ចំនួន៩ទីតាំង នៅតាមទីក្រុងធំៗមួយចំនួន នៃប្រទេសចិន ដើម្បីផ្សព្វផ្សាយពីផលិតផលសក្តានុពលកម្ពុជា ផ្សព្វផ្សាយពីវប្បធម៌ ទេសចរណ៍ និងគោលនយោបាយពាណិជ្ជកម្ម និងវិនិយោគរបស់កម្ពុជា ព្រមទាំងជំរុញការនាំចេញទៅទីផ្សារចិន។
ឯកឧត្តម លើកឡើងថា ថ្មីៗនេះ កម្ពុជា-ចិន ទើបបានចុះហត្ថលេខា លើអនុស្សរណៈយោគយល់គ្នា ស្តីពីការពង្រឹងកិច្ចសហប្រតិបត្តិការជំរុញពាណិជ្ជកម្ម រវាងអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្មកម្ពុជា និងមន្ទីរពាណិជ្ជកម្ម នៃតំបន់ស្វយ័តជនជាតិជាំងក្វាងស៊ី ប្រទេសចិន ក្នុងគោលដៅជំរុញផលិតផលសក្តានុពលកម្ពុជា ទៅកាន់ទីផ្សារចិន ក្នុងនោះនឹងជំរុញការនាំចេញដំឡូងមីស្ងួតកម្ពុជា ៤០ម៉ឺនតោន ទៅកាន់ប្រទេសចិន ក្នុងឆ្នាំ២០២២-២០២៣នេះ។
ក្នុងឆ្នាំ២០២១កន្លងទៅ ទំហំពាណិជ្ជកម្មសរុបកម្ពុជា-ចិន សម្រេចបានទំហំទឹកប្រាក់ប្រមាណ១១,១៩ពាន់លានដុល្លារ ក្នុងនោះ កម្ពុជានាំចេញទៅប្រទេសចិន បានជាង១៥១០ លានដុល្លារអាមេរិក និងនាំចូលពីប្រទេសចិនមកវិញ ជាង ៩៦៨៤លានដុល្លារអាមេរិក ជាមួយនឹងកំណើនប្រមាណ ៣៨% បើធៀបនឹងឆ្នាំ២០២០
ឯកឧត្តម កៅ កោសល មានប្រសាសន៍ថា កិច្ចសហប្រតិបត្តិការពាណិជ្ជកម្មកម្ពុជា-ចិន ត្រូវបានពង្រឹង និងពង្រីកជាបន្តបន្ទាប់ ក្រោមការដឹកនាំប្រកបដោយចក្ខុវិស័យ និងស្មារតីសហប្រតិបត្តិការ របស់ថ្នាក់ដឹកនាំកំពូល នៃប្រទេសទាំងពីរកម្ពុជា-ចិន ក្រោមក្របខ័ណ្ឌតំបន់ ភាគីទាំងពីរបានចូលរួម បង្កើតកិច្ចព្រមព្រៀងពាណិជ្ជកម្មសេរីអាស៊ាន-ចិន និងជំរុញឲ្យសម្រេច បាននូវកិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយតំបន់ (RCEP)។
ក្រោមក្របខ័ណ្ឌទ្វេភាគី កម្ពុជា និងចិន បានចុះហត្ថលេខា លើកិច្ចព្រមព្រៀងពាណិជ្ជកម្មសេរីកម្ពុជា-ចិន កាលពីថ្ងៃទី១២ ខែតុលា ឆ្នាំ២០២០។ កិច្ចព្រមព្រៀងនេះ បានចូលជាធរមានកាលពីថ្ងៃទី១ ខែមករា ឆ្នាំ២០២២កន្លងទៅ ដែលបានត្រួសត្រាយផ្លូវ សម្រាប់ភាពជាដៃគូយុទ្ធសាស្ត្រ និងជំរុញកិច្ចសហប្រតិបត្តិការវិស័យសេដ្ឋកិច្ច ពាណិជ្ជកម្ម និងវិនិយោគរវាង ព្រះរាជាណាចក្រកម្ពុជា និងសាធារណរដ្ឋប្រជាមានិតចិន៕