ប្រជាអ៊ិនធើរណេតបានធ្វើការថ្កោលទោសយ៉ាងខ្លាំង ចំពោះអ្នកប្រដាល់អាជីពហ្វីលីពីនម្នាក់ ដែលបានប្រើអំពើហិង្សាវាយទៅលើបុរសម្នាក់ជាជនជាតិខ្លួនឯងយ៉ាងធ្ងន់ធ្ងរ ក្នុងអំឡុងពេលជម្លោះស្ថិតនៅក្នុងមជ្ឈមណ្ឌលកំសាន្តរាត្រីមួយ កាលពីល្ងាចថ្ងៃអាទិត្យ ។
អ្នកកម្មករក្នុងស្រុកម្នាក់ឈ្មោះ Ricky Lizo អាយុ ៥០ ឆ្នាំ បានបន្សល់ទុកជាមួយភ្នែកជាំពោរទាំងសងខាង, ច្រមុះបែកដែលតម្រូវឲ្យធ្វើការវះកាត់ និងបបូរមាត់ក៏ត្រូវការពេទ្យដេរ៣ថ្នេរផងដែរ បន្ទាប់ពីរងការដាល់ទាត់ធាក់យ៉ាងសាហាវ ដោយស្នាដៃដ៏កំណាចរបស់គ្រូបង្វឹកប្រដាល់ និងជាម្ចាស់ជើងឯកខ្សែក្រវ៉ាត់ឈ្មោះ Primo Solmiano ។
ជនរងគ្រោះ Lizo បានប្រាប់អ្នកសារព័ត៌មានថា៖ «បុរសនោះ គឺជាអ្នកប្រដាល់ដ៏ល្បីម្នាក់ គាត់បានដាល់មុខខ្ញុំសាប់យៗប្រៀបដូចបាវសាក់អីចឹង! ដែលទង្វើនេះ ខ្ញុំពុំអាចទទួលយកបានទេ ហេតុនេះ ច្បាប់ត្រូវតែជួយរកយុត្តិធម៌ដល់ខ្ញុំផង» ។
វីដេអូនៃហេតុការណ៍នេះទទួលបានអ្នកទស្សនាជាង ៩៧៦,០០០ ដង ហើយរូបភាពផ្តោតសំខាន់បង្ហាញមុខមាត់របស់ Lizo ពោរពេញរបួសជាំយ៉ាងធ្ងន់ធ្ងរបង្ហោះលើហ្វេសប៊ុក ក៏ត្រូវបានចែករំលែកជាង ១៦,០០០ ដង ដែលទាក់ទាញការថ្កោលទោសយ៉ាងខ្លាំងក្លា ពីសំណាក់សហគមន៍ហ្វីលីពីន ។
Lizo បានអះអាងថា ជម្លោះបានចាប់ផ្តើមកើតឡើង បន្ទាប់រូបគាត់ និងបងប្រុសរបស់គាត់ បានចាកចេញពីក្លឹបមួយនៅ LKF នៅវេលាម៉ោងប្រហែល ១១ យប់ ហើយបានអន្តរាគមន៍បុរសម្នាក់វាយទៅលើស្ត្រីម្នាក់ ។
គាត់បានចោទប្រកាន់បុរសម្នាក់នោះ ដែលជាកីឡាករប្រដាល់ Muay Thai ឈ្មោះ Sebastian “Kid” Yip ដែលជាមិត្តភក្តិរបស់ Solmiano ។
Lizo បានទទួលស្គាល់ថា បានវាយ Yip មួយដបស្រា ដើម្បីការពារបងប្រុសរបស់គាត់ នៅពេលដែលគាត់ត្រូវបានវាយដោយកីឡាករ Muay Thai រូបនេះ ។
គាត់ក៏ទទួលស្គាល់ថា ទង្វើរបស់គាត់ក៏បង្កឲ្យអ្នកប្រដាល់ថៃនោះឈឺចុកចាប់ផងដែរ ប៉ុន្តែ មិនគួរណា Somiano ធ្វើការសងសឹកជួសឲ្យមិត្តភក្តិរបស់ខ្លួនមកលើរូបខ្ញុំយ៉ាងសាហាវបែបនេះឡើយ ។
«Solminano បានដាល់លើមុខខ្ញុំឆ្វេងស្តាំៗយ៉ាងសន្ធាប់ ។ ហើយនៅពេលខ្ញុំដួលទៅនឹងដី ពួកគេបានទាត់ធាក់ខ្ញុំគ្រប់ទីកន្លែងលើដងខ្លួន» ។
Lizo និយាយថា៖ «គ្រាន់តែដាល់១ដៃ ខ្ញុំអាចទទួលយកបាន ព្រោះថា ខ្ញុំក៏ធ្វើឲ្យមិត្តភក្តិរបស់គាត់ឈឺចាប់ដែរ តែនេះក៏ដោយសារតែខ្ញុំធ្វើឡើង ដើម្បីការពារបងប្រុសខ្ញុំប៉ុណ្ណោះ» ។
«ខ្ញុំមិនសុខចិត្តទេ ច្បាប់ត្រូវតែរកយុត្តិធម៌ឲ្យខ្ញុំ សម្រាប់មុខរបួសដ៏ធ្ងន់ធ្ងររបស់ខ្ញុំ» ។
Lizo នៅបានលើកឡើងថា «អ្នកជាអ្នកប្រដាល់អាជីពម្នាក់ អ្នកគួរតែដឹងថា អ្នកមិនត្រូវបានអនុញ្ញាតឲ្យវាយធ្វើបាបជនស្លូតត្រង់បែបនេះឡើយ» ៕ ឧត្តម
