ខេត្តត្បូងឃ្មុំ៖ លោក វង សូត រដ្ឋមន្ត្រីក្រសួងសង្គមកិច្ច ជំរុញពលរដ្ឋគ្រប់និន្នាការគណបក្សនយោបាយប្រមូលផ្តុំបញ្ញាញាណ និងឆន្ទៈចូលរួមកសាងជាតិកម្ពុជា ជាប្រទេសប្រកាន់យករបបប្រជាធិបតេយ្យសេរីពហុបក្ស។
លោក រដ្ឋមន្ត្រីក្រសួងសង្គមកិច្ច បានបន្ថែមថា ប្រទេសមានគណបក្ស នយោបាយច្រើន ហើយប្រជាពលរដ្ឋមាននិន្នាការ គាំទ្រគណបក្សនយោបាយផ្សេងៗគ្នា តែការសំខាន់បើ ទោះបីជាបងប្អូន ស្ថិតក្នុងគណបក្សនយោបាយណាក៏ដោយចុះ រឿងសំខាន់ គឺក្នុងនាមជាខ្មែរយើងត្រូវតែ ប្រមូលផ្តុំបញ្ញាញាណ និងឆន្ទៈចូលរួមកសាងជាតិ។
នេះជាការលើកឡើងរបស់រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត ក្នុងពិធីជួបជុំមួយនាឃុំវាលម្លូរ ស្រុកពញាក្រែក ខេត្តត្បូងឃ្មុំ កាលពីព្រឹកថ្ងៃទី២២ មិថុនានេះ។ លោករដ្ឋមន្ត្រី វង សូត បានគូសបញ្ជាក់ថា ការបោះឆ្នោតជ្រើស តាំងតំណាងរាស្ត្រអាណត្តិទី៦ ដែលនឹងប្រព្រឹត្តិ ទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះមានគណបក្សនយោបាយចំនួន ២០ ចូលរួមប្រកួតប្រជែង តាមគោលការណ៍ប្រជាធិបតេយ្យសេរី។ ដូច្នេះនៅថ្ងៃបោះឆ្នោតនោះ បងប្អូនដែលជាម្ចាស់ឆ្នោតអាចធ្វើការជ្រើសរើស ពោលគឺគូសឲ្យគណបក្សនយោបាយណាមួយ ដែលបងប្អូនពេញចិត្ត ដោយគ្មានការបង្ខិតបង្ខំ គ្មានការគំរាមកំហែង និងគ្មាននរណាម្នាក់ដឹងថា បងប្អូនបោះឆ្នោតឲ្យគណបក្សណាទេ ព្រោះការបោះឆ្នោតធ្វើឡើងដោយសំងាត់ នៅក្នុងបន្ទប់សម្ងាត់។
ក្នុងឱកាសនេះលោក វង សូត បានថ្លែងនូវការកត់សម្គាល់ ចំពោះរដ្ឋបាលឃុំវាលម្លូរ ក្រោមការ ជួយជ្រោមជ្រែងរបស់ក្រុមការងារ ចុះជួយមូលដ្ឋាន ដែលបានខិតខំក្នុងការបម្រើសេវា ជូនពលរដ្ឋក្នុងមូលដ្ឋាន ជាពិសេសសេវាសាធារណៈ ដែលជាកិច្ចការដ៏មានសារសំខាន់ ដែលអាជ្ញាធរត្រូវផ្តល់ជូនប្រជាពលរដ្ឋ នៅក្នុងមូលដ្ឋានរបស់ខ្លួន។ ជាមួយគ្នានេះលោក ក៏បានលើកឡើងអំពីកិច្ចខិតខំប្រឹងប្រែង របស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ក្នុងការអភិវឌ្ឍជាតិ ការផ្តល់អ្វីៗសព្វបែបយ៉ាង ទៅឲ្យប្រជាពលរដ្ឋ។ ដូច្នេះអាជ្ញាធរគ្រប់លំដាប់ថ្នាក់ ដែលជាសេនាធិការ របស់រាជរដ្ឋាភិបាល ត្រូវយល់អំពីរឿងនេះ ហើយត្រូវចូលរួមជាមួយរាជរដ្ឋាភិបាល ដើម្បីប្រទេសជាតិ និងដើម្បីប្រជាជន ជាពិសេសជំរុញការអភិវឌ្ឍជាតិ ឲ្យឈានឡើងខ្ពស់បន្ថែមទៀត ខណៈដែល បច្ចុប្បន្ននេះកំណើនសេដ្ឋកិច្ចជាតិ កំពុងមានអត្រាល្អប្រសើរក្នុងរង្វង់ ៧ភាគរយ ហើយថាអ្វីៗទាំងអស់នឹងកាន់ តែប្រសើរឡើងបន្ថែមទៀត ប្រសិនបើប្រទេសជាតិយើង រក្សាបាននូវសុខសន្តិភាព នៅក្នុងក្របខ័ណ្ឌទូទាំង ប្រទេសដូចសព្វថ្ងៃនេះ។
លោករដ្ឋមន្ត្រី វង សូត បានគូសបញ្ជាក់ថា សន្តិភាពមានតម្លៃធំជាងអ្វីៗទាំងអស់ ដែលយើង ត្រូវតែរួបរួមគ្នាថែរក្សាវា ឲ្យបានជានិច្ចនិរន្តរ ព្រោះខ្មែរបានភ្លក្សហើយ នូវរសជាតិសង្គ្រាមកាលពីអតីត កាល ទម្រាំយើងរកបានសន្តិភាពមកវិញ ក្រោមនយោបាយឈ្នះឈ្នះ របស់សម្តេចតេជោនាយករដ្ឋមន្ត្រី ដែលទើបតែអាចបញ្ចប់សង្គ្រាម បានកាលពីឆ្នាំ១៩៩៨៕ ដោយ៖កូឡាប
