កាលពីថ្ងៃអាទិត្យ (១៥ មករា) សោកនាដកម្ម នៃឧបទ្ទវហេតុធ្លាក់យន្តហោះ ATR 72 របស់ក្រុមហ៊ុនអាកាសចរណ៍ Yeti Airlines នៅក្នុងប្រទេសនេប៉ាល់ ដែលបណ្តាលឲ្យមនុស្សទាំងអស់ ៧២ នាក់ ស្លាប់បាត់បង់ជីវិត គឺជាហេតុការណ៍ដ៏សោកសៅបំផុត ដែលប្រទេសនេះ បានជួបប្រទះក្នុងរយៈពេលជាង ៣០ ឆ្នាំ។
ក្នុងចំណោមជនរងគ្រោះ គឺមានបុរស ៣៧ នាក់ ស្រី ២៥ នាក់ កុមារ ៣ នាក់ និងទារក៣នាក់ ។ អ្នកដែលជិះយន្តហោះនោះរួមមាន៖ ជនជាតិនេប៉ាល់ ៥៧ នាក់ ឥណ្ឌា ៥ នាក់ រុស្ស៊ី ៤ នាក់ កូរ៉េ ២ នាក់ អូស្ត្រាលី ជនជាតិអាហ្សង់ទីន សញ្ជាតិបារាំង និងជនជាតិអៀរឡង់។
យោងតាមរបាយការណ៍របស់ CNN យន្តហោះដែលដឹកមនុស្ស ៧២ នាក់ (សមាជិកនាវិក ៤ នាក់ និងអ្នកដំណើរ ៦៨ នាក់) បានចាកចេញពីទីក្រុង Kathmandu ហើយកំពុងធ្វើដំណើរទៅកាន់ Pokhara ។ ប៉ុន្តែ ខណៈយន្តហោះនេះហៀបនឹងចុះចតនៅគោលដៅ ស្រាប់តែអ្នកបើកយន្តហោះ បានស្នើសុំប្តូរផ្លូវរត់។
អ្នកនាំពាក្យអាកាសយានដ្ឋាន Pokhara ចែករំលែកឲ្យដឹងថា៖ «ការអនុញ្ញាតត្រូវបានផ្តល់ឱ្យ។ យើងមិនទាន់បានសួរ អំពីមូលហេតុអ្វីនោះទេ នៅពេលដែលអ្នកបើកយន្តហោះសួរ ដោយយើងគ្រាន់តែផ្តល់ការអនុញ្ញាតឱ្យផ្លាស់ប្តូរវិធីសាស្រ្តប៉ុណ្ណោះ។ ប៉ុន្តែ អ្វីដែលមិននឹកស្មានដល់នោះ គឺបន្ទាប់ភ្លាមៗនោះ ស្រាប់តែយន្តបានជួបគ្រោះថ្នាក់បែបនេះតែម្តង»។
ដោយឡែក ក្រឡេកមកវីដេអូនេះ គឺពិតជារន្ធត់ណាស់ ព្រោះថា មុនពេលយន្តហោះធ្លាក់ ខណៈពេលកំពុងចុះចត បុរសអ្នកដំណើរជាជនជាតិឥណ្ឌាម្នាក់ បាន Live វីដេអូតាមហ្វេសប៊ុក ក្នុងទឹកមុខយ៉ាងរីករាយទៅកាន់អ្នកមើល។ ប៉ុន្តែ ប៉ុន្មានវិនាទីក្រោយមក ស្រាប់តែស្ថានភាពក្នុងយន្តហោះរង្គើ ខណៈសំឡេងអ្នកដំណើរស្រែកឡើងក្នុងភាពតក់ស្លុត ហើយអ្វីៗបានក្រឡាប់ចាក់ និងរំភេចក្រោយមក ក៏បង្ហាញអណ្តាតភ្លើងបានឆាបឆេះតែម្តង៕ រក្សាសិទ្ធិដោយ៖ លឹម ហុង
⚠️ Facebook live-stream by one of the passengers on the Yeti Airlines Flight 691 documents the moment the plane crashed in Nepal, killing all 72 people on board. pic.twitter.com/G9mpJsuEnE
— Upward News (@UpwardNewsHQ) January 15, 2023
