ព្រះសីហនុ៖ ប្រជាពលរដ្ឋ មានរបរធ្វើនេសាទសមុទ្រ នៅតំបន់កោះខ្យង ស្រុកព្រៃនប់ ខេត្តព្រះសីហនុ បានចោទឈ្មួញចិញ្ចឹមគ្រែងឈាម ឬចិញ្ចឹមកូនគ្រែង មានទីតាំងនៅម្តុំតំបន់កោះខ្យង ស្រុកព្រៃនប់ ខេត្តព្រះសីហនុ ថាបានហ៊ុំព័ទ្ធឆ្នេរសមុទ្រមានវិសាលភាពធំទូលាយ ដោយហាមឃាត់មិនអោយពលរដ្ឋធ្វើរបរនេសាទជាលក្ខណៈគ្រួសារ ដើម្បីចិញ្ចឹមជីវិតអោយបានទូលំទូលាយនោះទេ។
ផ្តើមពីបញ្ហានេះ ប្រជានេសាទ ខេត្តព្រះសីហនុ បានអំពាវនាវដល់ថ្នាក់ដឹកនាំក្រសួងស្ថាប័នជំនាញពាក់ព័ន្ធថ្នាក់ជាតិ ពិសេសក្រសួងបរិស្ថាន ក្រសួងកសិកម្មរុក្ខាប្រមាញ់ និងនេសាទ ព្រមទាំងជលផលសមុទ្រជាដើម ជួយបញ្ចូនមន្ត្រីចុះពិនិត្យ និងជួយអន្តរាគមន៍ អោយប្រជានេសាទសមុទ្រ រស់នៅតំបន់កោះខ្យង អាចប្រកបរបរនេសាទនៅលើផ្ទៃសមុទ្រអោយបានទូលំទូលាយឡើងវិញ។
អ្នកនេសាទរស់នៅតំបន់កោះខ្យង ចោទថា ឈ្មួញចិញ្ចឹមគ្រែងឈាមមួយចំនួន បានបើកធ្វើជំនួញនេះ ដោយអាងខ្នងបង្អែក ឬអ្នកកាងការពារតែរៀងៗខ្លួន ហើយឈ្មួញខ្លះ បានបើកធ្វើវារីវប្បកម្មចិញ្ចឹមគ្រែងឈាមនេះ ដោយគ្មានច្បាប់អនុញ្ញាតពីស្ថាប័នជំនាញអោយបានត្រឹមត្រូវទេ។
ចំណែកឈ្មួញខ្លះទៀត បានហ៊ុំព័ទ្ធស៊ុមគ្រែងឈាមនេះ លើសចំនួនទំហំហិចតារ ឬលើសទំហំផ្ទៃសមុទ្រ ដែលបានស្នើសុំ ដោយឈ្មួញខ្លះបានហ៊ុំព័ទ្ធលើសពីច្បាប់អនុញ្ញាតច្បាប់ ចាប់ពី ១ហិចតារ រហូតដល់ ១០ហិចតារជាដើម។
ប្រជានេសាទខ្លះទៀត បានអះអាងថា ឈ្មួញមួយចំនួន បានបើកធ្វើអាជីវកម្មចិញ្ចឹមគ្រែងឈាមនៅតំបន់កោះខ្យងនេះ ក្រោមរូបភាពយកប្រជាពលរដ្ឋធ្វើជាខែល ដើម្បីពាំងមុខរបរល្មើស របស់ពួកគេ..។ល។
កាលពីថ្ងៃទី១០ ខែវិច្ឆិកា ឆ្នាំ២០១៧ ក្រុមការងារចម្រុះ ដឹកនាំដោយ លោក សរ កក្កដា អភិបាលស្រុកព្រៃនប់ បានចុះត្រួតពិនិត្យ និង វាស់វែងទីតាំងធ្វើវារីវប្បកម្មចិញ្ចឹមគ្រែងឈាមចំនួន ៣ទីតាំង ស្ថិតនៅភូមិកោះខ្យង ឃុំអូរជ្រៅ ស្រុកព្រៃនប់ ខេត្តព្រះសីហនុ។
កោយបញ្ចប់សកម្មភាពចុះពិនុត្យទីតាំងចិញ្ចឹមគ្រែងឈាមទាំងនោះ លោក សរ កក្កដា បានប្រាប់ប្រព័ន្ធផ្សព្ធផ្សាយថា ទីតាំងចិញ្ចឹមគ្រែងឈាមទាំង ៣ទីតាំងនោះ ជាលទ្ធផលបន្ទាប់ពីបានចុះវាស់វែងទីតាំង របស់ឈ្មោះលោកស្រី ផេង នី,លោក លីវ លីម និងឈ្មោះ ស៊ូ ចាន់ផន។
ទីតាំងទាំង ៣ខាងលើ គឺមានទីតាំងខ្លះ មានលិខិតអនុញ្ញាតច្បាប់ចេញ ដោយស្ថាប័នជំនាញ ឲ្យបានត្រឹមត្រូវ និងខ្លះទៀតមិនទាន់មានច្បាប់អនុញ្ញាតពីស្ថាប័នមានសមត្ថកិច្ចអោយគ្រប់ចំនួនទេ។
លោក សរ កក្កដា បន្ថែមថា តាមការពិនិត្យជាក់ស្តែងដក់ទីតាំងចិញ្ចឹមគ្រែងឈាម គឺមានម្ចាស់ធ្វើអាជីវកម្មខ្លះ បានបោះបង្គោលហ៊ុំព័ទ្ធកំណត់ផ្ទៃទឹកសមុទ្រខុសគ្នានឹងទំហំ ដែលពួកគេបានស្នើសុំ ក្នុងនោះ លោកស្រី ផេង នី បានស្នើសុំ ១០ហិកតា ប៉ុន្តែជាក់ស្តែងបានបោះបង្គោលហ៊ុំព័ទ្ធរំលោភប្រមាណ ២០ហិចតារ និងមានសង់រោងចំនួន ៣នៅលើទីតាំងនោះ។ លោក លីវ លីម បានស្នើសុំ ៥ហិកតា ជាបោះបង្គោលហ៊ុំព័ទ្ធជាក់ស្តែងប្រមាណ ៦ហិចតារ និងមានសង់រោងចំនួន១ នៅលើទីតាំងនោះ និង លោក ស៊ូ ចាន់ផន បានស្នើសុំ ៥ហិកតា ប៉ុន្តែជាក់ស្តែង បានបោះបង្គោលហ៊ុំព័ទ្ធប្រមាណ ១០ហិចតារ និងមានសង់រោង ១ នៅលើទីតាំងជាក់ស្តែង។
ត្រង់ចំណុចនេះ លោក សរ កក្កដា បានព្រមានថា ចំពោះទីតាំងចឹញ្ចឹមគ្រែងឈាមទាំងឡាយណា ដែលបានហ៊ុំព័ទ្ធហួសប្បាប់អនុញ្ញាត លោកនឹងចាត់ការទៅតាមនីតិវិធីច្បាប់ ដើម្បីជៀសវាង ការឆ្លើយដាក់គ្នា រវាងឈ្មួញចិញ្ចឹមគ្រែងឈាម នៅតំបន់កោះខ្យង ហើយបានហ៊ុំព័ទ្ធផ្ទៃទឹកសមុទ្រលើសពីទំហំ ដែលច្បាប់បានអនុញ្ញាត។ ជាពិសេសបាននាំអោយប៉ះពាល់ដល់ការធ្វើរបរនេសាទ ជាលក្ខណៈគ្រួសារនៅប្រទេសកម្ពុជា របស់ពលរដ្ឋក្នុងមូលដ្ឋាននេះ។ លោក សរ កក្កដា សង្កត់ធ្ងន់ថា ម្ចាស់ទីតាំងល្មើសទាំងនោះ នឹងតម្រូវអោយអនុវត្តទៅតាមទំហំ ដែលបានស្នើសុំពីស្ថាប័នជំនាញ បើមានអ្នករឹងទទឹងនឹងមានវិធានការផ្លូវច្បាប់ធ្ងន់ធ្ងរ។
ចំណែក លោក ឯម ភា នាយសង្កាត់ជលផលស្រុកព្រៃនប់ បានអោយដឹងថា ចំពោះទីតាំងចិញ្ចឹមគ្រែងឈាមទាំង ៣ទីតាំងនៅតំបន់កោះខ្យងខាងលើ គឺបានសុំច្បាប់អនុញ្ញាត ពីមន្ត្រីស្ថាប័នជំនាញរៀងៗខ្លួន ប៉ុន្តែនៅមានចំណុចស្មើសច្បាប់មួយចំនួន ដែលតម្រូវអោយម្ចាស់ទីតាំងចិញ្ចឹមគ្រែងឈាមទាំងនោះត្រូវអនុវត្តអោយស្របតាមច្បាប់អុញ្ញាត ចេញដោយស្ថាប័នជំនាញ។
មន្ត្រីជំនាញរូបនេះ ឲ្យដឹងថា ច្បាប់ចិញ្ចឹមកូនគ្រែងឈាម អ្នកធ្វើអាជីវកម្មទាំងអស់ តម្រូវអោយសុំច្បាប់ ១ឆ្នាំម្តង ហើយយោងតាមច្បាប់ថ្មី អាជីវករ ដែលពុំទាន់បានសុំច្បាប់អនុញ្ញាតទីតាំងចិញ្ចឹមគ្រែងឈាមកន្លងមក គឺ ត្រូវសុំច្បាប់បន្ថែម ពីក្រសួងបរិស្ថាន ព្រោះក្រសួងបរិស្ថាន ជាស្ថាប័នមានសមត្ថកិច្ច ក្នុងការអនុញ្ញាតទីតាំងទាំងនោះ។ រីឯក្រសួងកសិកម្ម រុក្ខាប្រមាញ់ និងនេសាទ ជាអ្នកអនុញ្ញាតច្បាប់ទាក់ទងបច្ចេកទេសជាដើម៕ ដោយ៖ ដែន សីមា
