គណៈកម្មការបោះឆ្នោត (EC) កំពុងបើកការស៊ើបអង្កេតករណីនៃការសន្ទនាតាមទូរស័ព្ទថ្មីៗ របស់អតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត្រា ទៅកាន់ក្រុមអ្នកនយោបាយភឿថៃ ដែលត្រូវបានគេរិះគន់ថា ជាការធ្វើអន្តរាគមន៍ខុសច្បាប់នៅក្នុងកិច្ចការផ្ទៃក្នុងរបស់គណបក្សនេះ ។
អគ្គលេខាធិការ EC លោក Jarungvith Phumma បាននិយាយកាលពីថ្ងៃចន្ទថា លោកបានតែងតាំងអនុប្រធានរបស់លោក គឺលោក Sawaeng Boonmee ឱ្យដឹកនាំការស៊ើបអង្កេតរកការពិតអំពីហេតុការណ៍នេះ ។ ក្រោមច្បាប់គណបក្សនយោបាយថ្មី នោះគណបក្សត្រូវហាមឃាត់មិនអនុញ្ញាតឲ្យអ្នកមិនមែនជាសមាជិកណាម្នាក់ ឬ អ្នកខាងក្រៅ ជ្រៀតជ្រែកកិច្ចការផ្ទៃក្នុងរបស់ពួកគេ ដោយផ្ទាល់ ឬដោយប្រយោល ។ គណបក្សនយោបាយណាមួយដែលត្រូវបានរកឃើញថា កំពុងរំលោភបំពានលើហានិភ័យនៃមាត្រា នឹងត្រូវបានរំលាយចោល ដោយបញ្ជារបស់តុលាការធម្មនុញ្ញ ។
លោក ថាក់ស៊ីន ដែលបាននិរទេសខ្លួនឯងនៅក្រៅប្រទេស តាំងពីឆ្នាំ ២០០៨ កាលពីសប្តាហ៍មុននេះ បានចូលរួមនៅក្នុងការសន្ទនាតាមទូរស័ព្ទជាមួយអ្នកនយោបាយភឿថៃ ខណៈដែលលោកកំពុងនៅទីក្រុងឡុងដ៏ ដើម្បីអបអរសាទរថ្ងៃកំណើតរបស់ប្អូនស្រីរបស់លោក ដែលក៏ជាអតីតនាយករដ្ឋមន្ត្រីថៃលោកស្រី យីងឡាក់ ស៊ីណាវ៉ាត្រា ។
នៅក្នុងកិច្ចសន្ទនាដែលត្រូវបានកត់ត្រានៅក្នុងវីដេអូ និងការផ្សាយនៅក្នុងប្រព័ន្ធផ្សព្វផ្សាយ លោក ថាក់ស៊ីន ត្រូវបានគេលឺនិយាយព្យាករណ៍អំពីជ័យជំនះនៃការបោះឆ្នោតរបស់គណបក្សភឿថៃ និងព្រមានទៅដល់បណ្តាអតីតសមាជិកសភារបស់ខ្លួនដែលបានរត់ទៅរកគណបក្សកាន់ជើងរដ្ឋាភិបាលយោធាថា ពួកគេនឹងប្រឈមការបាត់បង់ការបោះឆ្នោត ។
លោក ថាក់ស៊ីន ពុំមានតួនាទីអំណាចណាមួយទៀត នៅក្នុងគណបក្សភឿថៃទេ ប៉ុន្តែ លោកនៅតែមានឥទ្ធិពលខ្លាំងនៅក្នុងគណបក្សនេះ ដែលត្រូវបានហៅថា «បងធំ» ដោយអ្នកសមាជិកអ្នកនយោបាយជាច្រើនរបស់បក្សនេះ ៕ ឧត្តម