លោកVladimir Putin និងលោកDonal Trump ជួបគ្នានៅប្រទេសទីបី រីឯពេលវេលានិងទីកន្លែងត្រូវបានប្រកាសនៅថ្ងៃ។
ប្រធានាធិបតីអាមេរិក(ឆ្វេង) ជួបជាមួយប្រធានាធិបតីរុស្ស៊ី កាលពីឆ្នាំ២០១៧
តាម AFP ឧបការីប្រធានាធិបតីរុស្ស៊ី Yuri Ushakov អះអាងថា៖«យើងខ្ញុំបានឯកាភាពរៀបចំជំនួបកំពូល។ យើងខ្ញុំបានព្រមព្រៀងគ្នាអំពីពេលវេលា ទីកន្លែង ហើយនឹងប្រកាសរឿងនេះរួមជាមួយដៃគូអាមេរិកនៅថ្ងៃស្អែក។
លោក Yuri Ushakov ឱ្យដឹងបន្ថែមថា ជំនួបនេះនឹងមិនប្រព្រឹត្ដិទៅនៅអាមេរិក ឬរុស្ស៊ីទេ តែគឺនៅប្រទេសទីបី។ប្រព័ន្ធផ្សព្វផ្សាយបានប៉ាន់ស្មានថា ព្រឹត្ដិ្កការណ៍នះនឹងនៅទីក្រុងVienna ប្រទេសអូទ្រីស ឬទីក្រុង Helsinki ប្រទេសហ្វាំឡង់នាខែកក្កដាខាងមុខ។
នៅថ្ងៃនេះ ទីប្រឹក្សាសន្ដិសុខជាតិអាមេរិក John Bolton នឹងទៅកាន់រុស្ស៊ី ក៏ដើម្បីជួបជាមួយប្រមុខការទូតរុស្ស៊ី Sergei Lavrov និងប្រធានាធិបតី Putin ដើម្បីពិភាក្សាសន្និសីទកំពូល។
លោក Putin និយាយថា ដំណើរទស្សកិច្ចរបស់លោកJohn Bolton នៅរុស្ស៊ីសង្ឃឹមថាប្រទេសទាំងពីរអាចមានជំហានដំបូងសម្រាប់ការស្ដារទំនាក់ទំនងទ្វេភាគី។
ទំនាក់ទំនងរវាងក្រុងវ៉ាស៊ីនតោននិងមូស្គូ កំពុងស្ថិតនៅក្នុងកម្រិតទាបបំផុតគិតចាប់ពីក្រោយសង្គ្រាមត្រជាក់ ព្រោះតែការខ្វែងគំនិតគ្នាទាក់ទងដល់ប្រទេសអ៊ុយក្រែនក៏ដូចជាការចោទប្រកាន់ថាបានលូកដៃចូល អន្ដរាគមន៍ក្នុងការបោះឆ្នោតប្រធានាធិបតីអាមេរិកនៅឆ្នាំ២០១៦ ក៏ដូចជាបទថោទប្រកាន់ថាករណី«ចារបុសមុខពីរ»ដែលរងការបំពុលនៅអំឡុងដើមខែមីនាដើមឆ្នាំនេះ។
សន្និសីទកំពូលអាមេរិក-រុស្ស៊ី អាចបណ្ដាលឱ្យសម្ព័នមិត្តលោកខាងលិចរបស់អាមេរិករសាប់រសល់ ពិសេសគ្រាដែល អង់គ្លេសកំពុងមានបំណងធ្វើឱ្យរុស្ស៊ីឯកោ។
ជំនួបនេះក៏នឹងធ្វើឱ្យក្រុមប្រឆាំងលោកTrump ទាំងក្នុងនិងក្រៅប្រទេសចោទសួរពីរឿងដែលអាមេរិកសន្យាជាមួយ NATO ព្រមទាំងកង្វល់ពីការដែលអាមេរិកប៉ងកសាងទំនាក់ទំនងជាមួយរុស្ស៊ីឡើងវិញ ទោះបីជាក្រុងវ៉ាស៊ីនតោននៅបន្ដរឹតបន្ដឹងការដាក់ទណ្ឌកម្មលើក្រុងមូស្គូក្ដី៕
សូយន