ភ្នំពេញ៖ យោងតាមស្ថិតិរបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា នៅដើមឆ្នាំ ២០២៣នេះ ទំហំពាណិជ្ជកម្មទ្វេភាគីរកម្ពុជា និងវៀតណាម មានតម្លៃទឹកប្រាក់សរុប ៤៧៨ លានដុល្លារអាមេរិក ធ្លាក់ចុះ ១,៨% បើធៀបនឹងរយៈពេលដូចគ្នាកាលពីឆ្នាំមុន។
ស្ថិតិ បានឲ្យដឹងថា នៅខែមករា ដើមឆ្នាំ២០២៣នេះ កម្ពុជា បាននាំចេញទំនិញនានាទៅកាន់ប្រទេសវៀតណាម មានតម្លៃទឹកប្រាក់ប្រមាណ ១៧២ លានដុល្លារអាមេរិក កើនឡើង ១០,៧% ខណៈការចូលត្រឡប់មកពីប្រទេសវៀតណាមវិញ មានតម្លៃទឹកប្រាក់ប្រមាណ ៣០៦លានដុល្លារ ធ្លាក់ចុះ ៧,៦% បើប្រៀបធៀបរយៈពេលដូចគ្នាកាលពីឆ្នាំមុន។
កម្ពុជា និងវៀតណាម បានចុះហត្ថលេខាលើកិច្ចព្រមព្រៀងក្របខណ្ឌ ស្ដីពីការតភ្ជាប់សេដ្ឋកិច្ចវៀតណាម-កម្ពុជា នៅឆ្នាំ២០១៧ និងកិច្ចព្រមព្រៀងស្តីការចៀសវាងការយកពន្ធត្រួតគ្នានៅឆ្នាំ២០១៨។ នៅថ្ងៃទី ៨ ខែវិច្ឆិកា ឆ្នាំ២០២២ កម្ពុជា និងវៀតណាម បានចុះកិច្ចព្រមព្រៀងលើឯកសារចំនួន ១១ ក្រោមអធិបតីភាពនាយករដ្ឋមន្ត្រីនៃប្រទេសទាំងពីរ ដែលក្នុងនោះឯកសារភាគច្រើនផ្តោតលើកិច្ចសហប្រតិបត្តិការជំរុញពាណិជ្ជកម្ម វិនិយោគ ហិរញ្ញវត្ថុ និងទូរគមនាគមន៍។
ការវិនិយោគរបស់វៀតណាម នៅកម្ពុជា ប្រមាណជិត ៣ពាន់លានដុល្លារអាមេរិក ក្នុងនោះវិស័យកសិកម្មមានចំនួនប្រមាណ ២ភាគ៣ នៃគម្រោងវិនិយោគទាំងអស់។
គួរបញ្ជាក់ថា មុខទំនិញសំខាន់ៗរបស់កម្ពុជា នាំចេញទៅកាន់ប្រទេសវៀតណាម ភាគច្រើនជាផលិតផលកសិផល មានដូចជា គ្រាប់ស្វាយចន្ទី, ដំឡូងមី, ជ័រកៅស៊ូ, ស្រូវ, ពោត និងថ្នាំជក់ ជាដើម ខណៈដែលមុខទំនិញកម្ពុជាភាគច្រើន នាំចូលពីប្រទេសវៀតណា មានដូចជា ប្រេងឥន្ធនៈ, សម្ភារសំណង់, គ្រឿងឧបភោគបរិភោគ, បន្លែ ផ្លែឈើ ជី និងគ្រឿងយន្តកសិកម្ម ជាដើម៕