ភ្នំពេញ៖ ក្រសួងការពារជាតិកម្ពុជា នៅថ្ងៃទី២៨ ខែមិថុនា ឆ្នាំ២០១៨នេះ បានចេញសេចក្តីថ្លែងការណ៍សម្តែងការសោកស្តាយយ៉ាងខ្លាំងចំពោះ របាយការណ៍បំភ្លៃការពិតដែលបង្កើតឡើងតាមអំពើចិត្តដោយរបស់ អង្គការឃ្លាំមើលសិទ្ធិអន្តរជាតិ (HRW) ផ្សព្វផ្សាយ នៅថ្ងៃទី២៨ខែមិថុនាឆ្នាំ២០១៨ ដែលមានបំណងញុះញង់ចោទប្រកាន់ ដោយគ្មានមូលដ្ឋាន និងមិនសមហេតុផល មកលើមន្ត្រីជាន់ខ្ពស់១២រូប នៃកងកម្លាំងប្រដាប់អាវុធព្រះរាជាណាចក្រកម្ពុជា។
នៅក្នុងសេចក្តីថ្លែងការណ៍របស់ក្រសួងការពារជាតិ បានបញ្ជាក់យ៉ាងដូច្នេះថា ការប្រឌិតរបាយការណ៍បែបឆ្គួតលីលារបស់ក្រុមនេះគឺជាការរំលោភបំពានម្តងហើយម្តងទៀតមកលើ អធិបតេយ្យភាព ឯករាជ្យភាព និងនីតិរដ្ឋរបស់ព្រះរាជាណាចក្រកម្ពុជា ដើម្បីបម្រើនយោបាយទុច្ចរិតរបស់ ជនបរទេសមួយចំនួន និងក្រុមអ្នកនយោបាយក្បត់ជាតិ ដែលបានប៉ុនប៉ងបង្កើតបដិវត្តន៍ពណ៌បំផ្លិចបំផ្លាញដល់សន្តិភាព និងសេចក្តីសុខរបស់ប្រជាពលរដ្ឋខ្មែរ ហើយបើទោះបីជាផែនការបដិវត្តន៍ពណ៌នេះ បានបរាជ័យរហូតដល់មានការចាប់ខ្លួនមេខ្លោងរួចហើយក៏ដោយ ក៏ក្រុមនេះខ្លះ នៅមិនទាន់បោះបង់ចោលគំនិតបំផ្លិចបំផ្លាញកម្ពុជានៅឡើយទេ។ ក្រសួងការពារជាតិ សូមប្រកាសច្រានចោលទាំងស្រុង មិនទទួលយកដាច់ខាតចំពោះការចោទប្រកាន់នៃរបាយការណ៍ដែលបង្កប់ឧបាយកលពិសពុល របស់ក្រុមដែលហៅថា អង្គការឃ្លាំមើលសិទ្ធិមនុស្ស បែបនេះ។
ក្រសួងការពារជាតិ សូមបានអំពាវនាវដល់ របស់ដែលហៅថា អង្គការឃ្លាំមើលបញ្ហាសិទ្ធិមនុស្ស (HRW) ឱ្យបញ្ឈប់ជាបន្ទាន់នូវការប្រឌិត របាយការណ៍ចោទប្រកាន់ ដោយគ្មានមូលដ្ឋាន ទៅលើថ្នាក់ដឹកនាំកងកម្លាំងប្រដាប់អាវុធកម្ពុជា យ៉ាងអយុត្តិធម៌បែបនេះតទៅទៀត។
សូមបញ្ជាក់ថា អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ទើបតែបានចេញផ្សាយនូវរបាយការណ៍ថ្មីសន្លាងមួយ ស្ដីពី បុគ្គលនាយឧត្ដមសេនីយ៍មានបាតដៃកខ្វក់១២រូបរបស់កម្ពុជា៖ ប្រវត្តិរំលោភសិទ្ធិមនុស្សដ៏យូរអង្វែង នៃនាយឧត្ដមសេនីយ៍របស់សម្តេចតេជោ ហ៊ុន សែន។ របាយការណ៍ថ្មីនេះ លាតត្រដាងឲ្យឃើញថា កម្ពុជាកាន់តែប្រែក្លាយទៅរករបបផ្ដាច់ការ និងការដឹកនាំបែបឯកបក្ស ដោយសារតែនាយឧត្ដមសេនីយ៍មានបាតដៃកខ្វក់ទាំង១២រូប ក្នុងជួរកងកម្លាំងសន្តិសុខរបស់លោកនាយករដ្ឋមន្ត្រី ហ៊ុន សែន បានធ្វើជាខ្នងបង្អែកនៃរបបនយោបាយមួយពោរពេញទៅដោយអំពើរំលោភបំពានសិទ្ធិមនុស្សធ្ងន់ធ្ងរជាប្រព័ន្ធនិងមានចរិតផ្ដាច់ការនិយម។
របាយការណ៍កម្រាស់២២៣ទំព័រ របស់អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ ទើបនឹងចេញផ្សាយនៅថ្ងៃទី២៨ មិថុនា នេះ ចង្អុលបង្ហាញថា នាយឧត្ដមសេនីយ៍របស់លោក ហ៊ុន សែន ល្បីនៅលើឆាកអន្តរជាតិថា មានបាតដៃប្រឡាក់ឈាមទាំងនោះ រួមមាន៖
១) នាយឧត្ដមសេនីយ៍ផ្កាយមាស៤ ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ។
២) នាយឧត្ដមសេនីយ៍ផ្កាយមាស៤ គន់ គីម អគ្គមេបញ្ជាការរង នៃកងយោធពលខេមរភូមិន្ទ និងជានាយសេនាធិការចម្រុះ។
៣) នាយឧត្ដមសេនីយ៍ផ្កាយមាស ៤ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថ
លើផ្ទៃប្រទេស។
៤) នាយឧត្ដមសេនីយ៍ផ្កាយមាស៤ នេត សាវឿន អគ្គស្នងការនគរបាលជាតិ។
៥) ឧត្ដមសេនីយ៍ឯកផ្កាយមាស៣ ជា ម៉ន មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤។
៦) ឧត្ដមសេនីយ៍ឯកផ្កាយមាស៣ ប៊ុន សេង មេបញ្ជាការរងកងទ័ពជើងគោក និងជាមេបញ្ជាការកងយោធភូមិភាគទី៥។
៧) ឧត្ដមសេនីយ៍ឯកផ្កាយមាស៣ ជឿន សុវណ្ណថា មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី២។
៨) ឧត្ដមសេនីយ៍ឯកផ្កាយមាស៣ ចាប ភក្តី នាយរងសេនាធិការចម្រុះនៃកងយោធពលខេមរភូមិន្ទ និងជាមេបញ្ជាការកងពលតូចទ័ព
ពិសេសឆត្រយោង៩១១។
៩) ឧត្ដមសេនីយ៍ឯកផ្កាយមាស៣ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថ
រាជធានីភ្នំពេញ។
១០) នាយឧត្ដមសេនីយ៍ផ្កាយមាស៤ សុខ ផល អគ្គស្នងការរងនគរបាលជាតិ និងជាអគ្គនាយកអន្តោប្រវេសន៍។
១១) នាយឧត្ដមសេនីយ៍ផ្កាយមាស ៤ ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរង នៃអាជ្ញាធរជាតិប្រយុទ្ធប្រឆាំង
គ្រឿងញៀន។
១២) នាយឧត្ដមសេនីយ៍ផ្កាយមាស៤ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ៕ ដោយ បញ្ញាស័ក្តិ
