ភ្នំពេញ៖ នៅឆ្នាំ២០២២ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះបញ្ជីរោងចក្រថ្មីចំនួន ១៨៦ ដែលនាំឲ្យចំនួនរោងចក្រសរុបកើនដល់ ១៩៨២។ ក្រសួងបានឲ្យដឹងថា តម្លៃវិនិយោគសរុបរបស់រោងចក្រឧស្សាហកម្មមានចំនួន ១៦,៦៩ ពាន់លានដុល្លារ កើនឡើង ២១ ភាគរយធៀបនឹងឆ្នាំមុន។
ឯកឧត្តម ចម ប្រសិទ្ធ ទេសរដ្ឋមន្ត្រី និងជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងនៅថ្ងៃទី២៨ ខែកុម្ភៈ ក្នុងកិច្ចប្រជុំសន្និបាតប្រចាំឆ្នាំ ដើម្បីពិនិត្យមើលសមិទ្ធផលការងាររបស់ខ្លួនក្នុងឆ្នាំ២០២២ថា វិស័យឧស្សាហកម្មបានរក្សាស្ថិរភាពល្អ បន្ទាប់ពីរងផលប៉ះពាល់នៃជំងឺរាតត្បាតកូវីដ-១៩ ដែលបានរំខានដល់ប្រតិបត្តិការរោងចក្រ និងកាត់បន្ថយការបញ្ជាទិញ។ រោងចក្រឧស្សាហកម្ម បានបង្កើតការងារជាង ១ លានកន្លែង កើនឡើង ៤ ភាគរយ។
ឯកឧត្តម ចម ប្រសិទ្ធ បានលើកឡើងថា ផលិតផលប្រមាណ ១១.៤ពាន់លានដុល្លារ ត្រូវបាននាំចេញទៅក្រៅប្រទេស ខណៈដែល ៤.៣៥ ពាន់លានដុល្លារ ត្រូវបានលក់នៅលើទីផ្សារក្នុងស្រុក។
គួរបញ្ជាក់ថា បើតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបង្ហាញថា ទិន្នផលផលិតកម្មរបស់កម្ពុជា ឈានដល់១៥.៨ ពាន់លានដុល្លារ ក្នុងឆ្នាំ២០២២ កើនឡើង៨៣ ភាគរយ បើធៀបនឹងឆ្នាំ២០២១៕
