ខេត្តកណ្តាល ៖ យុវជនម្នាក់ត្រូវបានស្លាប់នៅនិងកន្លែងនិងនារីម្នាក់រងរបួសធ្ងន់ ដោយសាររថយន្តមួយគ្រឿងបើកបុកម៉ូតូ នៅលើកំណាត់ផ្លូវជាតិលេខ៣ ត្រង់គីឡូម៉ែត្រលេខ៣៤និងលេខ៣៥ភូមិក្រាំងគាំ ឃុំត្បែង ស្រុកកណ្តាលស្ទឹងខេត្តកណ្តាលកាលពីម៉ោង១៨ថ្ងៃទី១៣ខែវិច្ឆិកា ឆ្នាំ២០១៧។
នគរបាលចរាចរបានឲ្យដឹងថា៖ជនរងគ្រោះដែលស្លាប់ឈ្មោះ សុង សឿត អាយុ ១៧ឆ្នាំស្នាក់នៅភូមិត្បូងបឹង ឃុំស្រង់ ស្រុកគងពិសី ខេត្តកំពង់ស្ពឺ។ ចំណែកអ្នករួមដំណើរឈ្មោះ គុំ គន្ធា ភេទស្រីអាយុ១៨ឆ្នាំរស់នៅក្នុងភូមិ ឃុំកើតហេតុជាមួយគ្នា អ្នកទាំងពីរជិះម៉ូតូមួយគ្រឿងម៉ាកសេ១២៥ពណ៌ខ្មៅពាក់ស្លកលេខ 1BU-9606។ រថយន្តបង្កគ្រោះថ្នាក់ចរាចរម៉ាកហ៊ីយ៉ានដាយពណ៌ក្រហមពាក់ស្លាកលេខ ភ្នំពេញ 3B-6665អ្នកបើកបរពុំត្រូវបានគេស្គាល់ឈ្មោះនោះទេ។
នគរបាលបានបន្តទៀតថា៖មុនពេលកើតហេតុគេឃើញជនរងគ្រោះទាំងពីរនាក់ ជិះម៉ូតូឌុបគ្នាពីត្បូងទៅជើងលុះដល់ចំណុចកើតហេតុស្រាប់រថយន្តបង្កបើកបរក្នុងទិសដៅបញ្ច្រាសទិសគ្នាក្នុងល្បឿនលឿនបានជ្រុលទៅបុកម៉ូតូជនរងគ្រោះទាំងពីរ បណ្តាលឲ្យអ្នកបើកបរម៉ូតូស្លាប់នៅនឹងកន្លែង និងនារីរួមដំណើររងរបួសធ្ងន់។
ចំណែកអ្នកបើកបររថយន្តក្រោយឃើញស្ថានភាពមិនល្អបានព្យាយាមរត់គេចខ្លួនបាត់ ក្រោយកើតហេតុនគរបាលបានចុះទៅដល់ជួយអន្តរាគមន៍រួចយកវត្ថុតាងយកទៅរក្សាទុកដើម្បីដោះស្រាយគ្នាជាក្រោយ។ សាកសពត្រូវបានប្រគល់ទៅឲ្យក្រុមគ្រួសារជនរងគ្រោះរីឯអ្នករងរបួសបានបញ្ជូនទៅកាន់មន្ទីរពេទ្យដើមកបីជួយសង្គ្រោះ៕ ដោយ៖កូឡាប
