បន្ទាប់ពីមានព័ត៌មានជាច្រើនបានចុះផ្សាយនៅក្នុងថ្ងៃនេះ ទាក់ទងនឹងស្ថានភាពរបស់លោក ចាន់ សម័យ ដែលធ្លាក់ខ្លួនដុនដាបប្រកបរបរស្ទូចត្រីចិញ្ចឹមក្រពះ និងគ្មានសូម្បីផ្ទះផ្ទាល់ខ្លួន ពោលគឺជួលផ្ទះគេនៅតែប៉ុណ្ណោះ ។
បើយោងតាមប្រភពពីទំព័រហ្វេសប៊ុក Movie Star Research របស់អ្នកនាង សុិន ឧត្ដមផល្លា តារាជើងចាស់ខ្មែរមួយរូបបានឱ្យដឹងថា កន្លងមកលោក ចាន់ សម័យ ធ្លាប់បានទៅសម្តែងនៅសហរដ្ឋអាមេរិក ប៉ុន្តែនៅពេលដែលលោកត្រឡប់មកប្រទេសកម្ពុជាវិញត្រូវបានចោរលួចកាបូបលុយរបស់លោក ដូច្នេះប្រាក់ដែលបានមកពីការសម្តែងត្រូវបានបាត់បង់ទាំងអស់ ថែមទាំងខ្លួនកំពុងជួបបញ្ហាពិបាក សព្វថ្ងៃនេះលោក ចាន់ សម័យ គ្មានមធ្យោបាយក្នុងការធ្វើដំណើរទេ ហើយលោកត្រូវទទួលរ៉ាប់រងចិញ្ចឹមគ្រួសារ ប្រពន្ធនឹងកូនចំនួនប្រាំនាក់ កូនភ្លោះពីរដងនិងម្នាក់ទៀតសរុបកូនទាំងអស់ប្រាំនាក់ លោកគ្មានផ្ទះទេគឺរស់នៅផ្ទះជួលគេ ។
តាមប្រភពនោះបានបន្ថែមទៀតថាលោក ចាន់ សម័យ រាល់ពេលទៅច្រៀងតាមកម្មវិធីម្តងៗ លោកតែងតែអង្គុយឆ្ងាយពីអ្នកសិល្បៈផ្សេងៗ ទោះបីចប់កម្មវិធីមិត្តភ័ក្តិសិល្បៈជូនលោកទៅផ្ទះក៏លោកអោយគេឈប់ពាក់កណ្ដាលផ្លូវ មិនព្រមអោយជូនដល់ផ្ទះ លោកហាក់ដូចជាចង់លាក់បាំងពីការលំបាករបស់លោក ហើយលោកថែមទាំងឈឺជើងអស់រយៈពេលជាងដប់ឆ្នាំហើយ ប៉ុន្តែលោកហាក់ដូចជាមិនអើពើ ដោយសារលោកមិនមានថវិកាដើម្បីព្យាបាល ចំណែករូបភាពស្ទូចត្រីនោះ ទីមួយការស្ទូចត្រីគឺជាចំណូលចិត្តរបស់លោក នឹងទីពីរដើម្បីធ្វើម្ហូបពិតមែន ហើយទឹកមុខរបស់លោកសព្វថ្ងៃទោះជាមិននិយាយក៏គេគ្រប់គ្នាអាចយល់បានថា លោកពិតជាមានភាពទុក្ខលំបាកយ៉ាងខ្លាំង ។
ជាមួយគ្នានេះ អ្នកនាង សុិន ឧត្ដមផល្លា ក៏សូមអំពាវនាវដល់បណ្ដាផលិតកម្មនឹងតាមស្ថានីយ៍ទូរទស្សន៍ទាំងអស់ សូមមេត្តាផ្តល់ឱកាសអោយលោក ចាន់ សម័យ ឡើងច្រៀងផងដើម្បីចិញ្ចឹមជីវិតនឹងគ្រួសារទាំងមូល ៕ សាវុធ
