ភរិយា​ស្លាប់ចោល កូនចៅ​លែងរ​វីរ​វល់ លោកតា​ចំណាស់ ៨៩​ឆ្នាំ សុខចិត្ត​ធ្វើ​អ្នក​អាក្រាត​សម្រាប់​គេ​គូរ​រូប​

​បុរស​ចំណាស់​វ័យ ៨៩​ ឆ្នាំ​ម្នាក់ នៅ​ប្រទេស​ចិន បាន​ក្លាយ​ជា​អ្នកស៊ីឈ្នួល​ស្រាត​ឲ្យគេ​ថតរូប ឬ​គូរគំនូ ដើម្បី​មាន​លុយកាក់​សម្រាប់​បន្តជីវិត ។​

​លោកតា Wang Suzhong ជា​អ្នក​អាក្រាតកាយ​ឲ្យគេ​ថត និង​គូររូប នា​ទីក្រុង​ចេង​ឌូ ។​

​ភរិយា​របស់​លោក Wang Suzhong បាន​ស្លាប់ចោល​គាត់​តាំង​ពី​២០​ឆ្នាំមុន​ម្លេះ ហើយ​ពី​ពេលនោះ​មក​កូនៗ​របស់​គាត់​ក៏​ផ្តាច់ទំនាក់ទំនង​ជាមួយ​ឪពុក​ខ្លួន ។ គាត់​រស់នៅ​ម្នាក់ឯង​ក្នុង​ផ្ទះ​តូច​មួយ ប៉ុន្តែ​ការឈឺចាប់​បាន​ធ្វើឲ្យ​លោក Wang ប្តេជ្ញាចិត្ត​ងើបឈរ​តតាំង​នឹង​ជីវិត​ចាស់ជរា​តែម្នាក់ឯង ។​

​លោក​បាន​ស្វះស្វែង​និង​ចុះកិច្ចសន្យា​ធ្វើ​ការងារ​មួយ​ដែល​អាច​រកប្រាក់​គ្រប់គ្រាន់​សម្រាប់​រស់នៅ​បាន នោះឯង​គឺជា​របរ​ស្រាត​ឲ្យគេ​ថត​ឬ​គូរ ។​

​លោកតា Wang Suzhong ចាត់ទុក​ការងារ​របស់​ខ្លួន​គឺជា “​សិល្បៈ​នៃ​រាងកាយ​” ។​

២​ដង​ក្នុង​១​សប្តាហ៍ លោកតា​ត្រូវ​ធ្វើដំណើរ​ទៅកាន់​សកល​វិទ្យាល័យ​មួយចំនួន និង​ស្ទូឌីយោ សិល្បៈ​នៃ​ទីក្រុង​ចេង​ឌូ ខេត្ត​សឺ​ជាំ​ង​ប្រទេស​ចិន ។​

​នៅ​ទីនោះ​លោក Wang ត្រូវ​ដោះ​ខោអាវ​ចេញ​ទាំងអស់ ហើយ​ឈរ​នៅ​ពីមុខ​កាមេរ៉ា ប្រសិនបើ​កិច្ចការ​តម្រូវឲ្យ​គេ​ថត​រូបអាក្រាត ។ ក្រៅពី​នោះ​លោក​ក៏​ត្រូវ​ឈរ​បញ្ចេញ​កាយវិការ​នៅតាម​សកល​វិទ្យាល័យ​ដើម្បី​ឲ្យ​និស្សិត​គូរ​រូប ។ លោក​ចាត់ទុកថា ការងារ​របស់​ខ្លួន​គឺជា​សិល្បៈ​នៃ​រាងកាយ ហើយ​ថា​រាងកាយ​របស់​មនុស្ស​ចាស់ដូ​ចលោក​ល្អ​ម្យ៉ាង​ដែរ ។​

​ពេលវេលា​ដែល​នៅ​សេសសល់ លោក​ក៏​រវល់​ជា​ការដាំ​ស្ល បោក​អ៊ុត​សម្លៀក​បំពាក់​របស់ខ្លួន ។​

​ពិត​ណាស់​អ្នក​ដែល​អាម៉ាស់​ពុំមែន​ខ្លួន​គាត់​ទេ នោះ​គឺជា​កូនៗ​របស់គាត់ ៕ ចន្ទ្រា​