អាចនិយាយថា មង្គលការរវាងតារាចម្រៀង និងរបាំ Shim Mina និងស្វាមីអាយុប្អូន ១៧ឆ្នាំ គឺជាព្រឹត្តិការណ៍ “រំជើបរំជួលបំផុតក្នុងពិភពកម្សាន្តកូរ៉េខាងត្បូងប៉ុន្មានថ្ងៃមកនេះ ។
ថ្ងៃទី ៧ ខែកក្កដា តារាចម្រៀង និងរបាំ វ័យ ៤៦ឆ្នាំ Shim Mina និងកូនកម្លោះអាយុ ២៩ឆ្នាំ Ryu Philip បានរៀបមង្គលការប្រព្រឹត្តទៅសណ្ឋាគារ Grand Hill រដ្ឋធានីសេអ៊ូល កូរ៉េខាងត្បូង ។ មុននោះគូស្វាមីភរិយាទាំងពីរបានស្វែងចិត្តគ្នាអស់រយៈពេល ៣ឆ្នាំ ។
ក្នុងជំនួបជាមួយអ្នកសារព័ត៌មាន នៅមុនពេលប្រព្រឹត្តទៅពិធីមង្គលការ កូនកម្លោះបាននិយាយទាំងស្រក់ទឹកភ្នែកថា ខ្លួនពិតជាដឹងគុណ ដែលចុងក្រោយស្នេហាពួកគេទាំងពីរ បានឈានដល់ទីបញ្ចប់ ជីវិតពួកគេបានបោះជំហានទៅកាន់ទំព័រថ្មី ។ ក្នុងពេលនោះដែរ កូនក្រមុំវ័យក្បែរ ៥០ឆ្នាំ ក៏ពោលថា ខ្លួនពិតជាមានការខ្វាយខ្វល់យ៉ាងខ្លាំងចំពោះអាពាហ៍ពិពាហ៍ថ្ងៃនេះ ។
ថ្វីត្បិតគូស្វាមីភរិយាទាំងពីរទទួលបានការជូនពរយ៉ាងកក់ក្តៅពីមិត្តភក្តិ និងភ្ញៀវចូលរួមក្តី ប៉ុន្តែពួកគេពុំទទួលបានការគាំទ្រពីក្រុមគ្រួសារទាំងសងខាងឡើយ ។ លើសពីនេះទៀត ម្តាយរបស់កូនក្រមុំ នៅមានបំណងប្រាថ្នាចង់ឲ្យអាពាហ៍ពិពាហ៍នេះពុំកើតឡើង ហើយក៏ធ្លាប់សង្ឃឹមថា ស្នេហាពួកគេនឹងព្រាត់ប្រាសពេលដែលកូនកម្លោះចេញទៅធ្វើកាតព្វកិច្ចយោធា ។
យ៉ាងនេះក្តីលើសពីអ្វីៗទាំងអស់អ្នកទាំងពីរនៅតែបានក្លាយជាភរិយា ទោះបីជាមានការជំទាស់ ក៏ដូចជាគម្លាតនៃវ័យ ។
ពួកគេមានផែនការទៅក្រេបទឹកឃ្មុំនៅកោះ Guam អាមេរិក ។ ពួកគេចង់បានកូន ៤នាក់ ហើយប្រសិនពុំអាចមានកូនតាមបែបធម្មជាតិបាននោះនឹងពឹងពាក់អន្តរាគមន៍ពីវេជ្ជសាស្ត្រ។
អ្នកទាំងពីរធ្លាប់បានដើរទៅកាន់ប្រទេសនានាដើម្បីកសាងអាល់ប៊ុមអាពាហ៍ពិពាហ៍ដ៏ផ្អែមល្ហែម ។
Shim Mina កើតឆ្នាំ ១៩៧២ ។ ១ ទសវត្សរ៍កន្លងមកនាងត្រូវបានចាត់ទុកក្នុងក្រុមនិមិត្តរូបទាក់ទាញរបស់កូរ៉េខាងត្បូង ។
នាងត្រូវបានគេចាប់អារម្មណ៍ដំបូងឡើយនៅវេទិការ ២០០២ នៅកូរ៉េខាងត្បូង ។ ជាមួយសម្លៀកបំពាក់សិចស៊ី និងលេចធ្លោនាងត្រូវសារព័ត៌មានក្នុងស្រុកហៅថា បវរកញ្ញា “World Cup” ។
នៅឆ្នាំនោះដែរ Shim Mina បានបង្ហាញវត្តមានជាតារាចម្រៀង Solo ទោល ហើយទទួលបានលទ្ធផលគួរឲ្យកត់សម្គាល់ ពិសេសការចេញអាល់ប៊ុម “Roendez” ទទួលបានការវាយតម្លៃខ្ពស់ពីអ្នកជំនាញ ក៏ដូចជាទស្សនិកជន ។ ចម្រៀងរបស់នាងតែងផ្សារភ្ជាប់ជាមួយរបាំស្រើបស្រាលក៏ដូចជាសម្លៀកបំពាក់ “ខ្វះក្រណាត់” ។
ឆ្នាំ២០០៧ នាងចាប់ផ្តើមលុកលុយទីផ្សារចិន ។ ថ្វីត្បិតទទួលបានលទ្ធផលប្រសើរគ្រាដំបូងក្តី តែដោយរឿងអាស្រូវបន្លំអាយុ នាងបង្ខំចិត្តវិលត្រឡប់មកប្រទេសវិញ ពេលនោះនាងធ្វើសកម្មភាពសិល្បៈធម្មតា ។ ប៉ុន្តែនាងបែរជាលេចធ្លោសារជាថ្មីក្រោយពេលទាក់ទងនឹងមិត្តប្រុសក៏ជាតារាចម្រៀងមានអាយុតិចជាងដល់ទៅ ១៧ឆ្នាំ ។
ក្នុងវ័យ ៤៦ឆ្នាំ នាងនៅមានរាងរៅស្វែល សិចស៊ី ព្រោះតែព្យាយាមហាត់ប្រាណលេងកីឡា ។ គន្លឹះធ្វើឲ្យនាងស្អាតបែបនេះគឺអាស្រ័យដោយរបាំជាមួយបង្គោល ។ ហេតុនេះឯងថ្វីត្បិតគម្លាតអាយុជាមួយស្វាមីច្រើនក្តី តែសម្រស់វិញមិនខុសគ្នាប៉ុន្មានទេ ៕ ចន្ទ្រា
