នៅថ្ងៃទី១៧ ខែឧសភា ឆ្នាំ២០២៣ សមត្ថកិច្ច មន្រ្តីគយ និងបសុសត្វ នៅខេត្តប៉ាតានី បានឆ្មក់ចូលឃ្លាំងស្តុកទំនិញមួយ បន្ទាប់ពីបានស៊ើបអង្កេតរកឃើញថា មានការនាំចូលសាច់គោពីបរទេសដោយខុសច្បាប់ ដើម្បីលក់ចែកចាយនៅតំបន់ប៉ាតានី។
មន្រ្តីបានឆ្មក់ចូលឃ្លាំងស្តុកសាច់គោខុសច្បាប់នេះ ដែលមានឈ្មោះ Ikhwan 99 ផ្ទះលេខ 114 ផ្លូវ Ruedee ឃុំ Anoroo ស្រុក Muang ខេត្ត Pattani គឺនៅពេលកម្មករកំពុងដឹកជញ្ជូនសាច់គោចូលទៅក្នុងឃ្លាំង តាមរយៈរថយន្តតូយ៉ូតា រីវ៉ូ ភីកអាប់ ១គ្រឿង។
សមត្ថកិច្ចបានឲ្យដឹងថា សាច់គោ ក្របី ថ្លើម ដែលមានប្រភពមកពីប្រទេសឥណ្ឌា និងប្រេស៊ីល ត្រូវបានគេដឹកតាមរថយន្តភីកអាប់ទម្ងន់ ៣,៧ តោន ចំនួន ១៥០ ប្រអប់ ឆ្លងកាត់ព្រំដែនម៉ាឡេស៊ី និង៤តោនទៀត ដែលទុកនៅក្នុងឃ្លាំង មានតម្លៃជាងមួយលានបាត។
តាមការសួរចម្លើយ ជនជាប់ចោទបានប្រាប់ឲ្យដឹងថា ខ្លួនបានរត់ពន្ធអស់រយៈពេលជាង២ឆ្នាំមកហើយៗ ការនាំចូលសាច់គោ សាច់ក្របីពីបរទេសទាំងនេះ គឺគ្មានច្បាប់អនុញ្ញាតនោះទេ។
ចំពោះការវេចខ្ចប់សាច់មកពីប្រទេសឥណ្ឌានេះផងដែរ គេបានរកឃើញថា មើលទៅដូចសាច់លំដាប់ថ្នាក់ខ្ពស់ គឺត្រូវវេចខ្ចប់យ៉ាងល្អក្នុងមួយប្រអប់ ២០ គីឡូក្រាម។ ទោះជាយ៉ាងណា សាច់ស្តុកទាំងនេះមិនបានធ្វើតេស្តរកជំងឺទេ ប្រសិនបើមនុស្សទទួលទានអាចធ្វើឲ្យប៉ះពាល់សុខភាពកាន់តែធ្ងន់ធ្ងរ ដែលវាអាចនឹងឆ្លងមេរោគដូចជាជំងឺគោឆ្កួតជាដើម។
តាមរយៈការចុះត្រួតពិនិត្យនៅតាមផ្សារសើម នៅខេត្តប៉ាតានី គឺបានរកឃើញមានសាច់គោប្រភេទនេះលក់ច្រើន ហើយក៏បានរកឃើញថា មានមនុស្សជាច្រើនដែលចូលចិត្តទិញ និងធ្វើម្ហូប។ ជាពិសេសភោជនីយដ្ឋាន គេបានរកឃើញថា ពេញនិយមខ្លាំងក្នុងការទិញយកទៅធ្វើម្ហូបសម្រាប់លក់ ដោយសារតែសាច់គោបែបនេះមាន caramel ថោកជាងសាច់គោថៃ ដែលអ្នកភូមិខ្លះប្រហែលមិនដឹងនៅឡើយទេ ថាសាច់រត់ពន្ធយកមកលក់មិនត្រូវបានត្រួតពិនិត្យ។
ទោះយ៉ាងណា អាជ្ញាធរតាមដានម្ចាស់ឃ្លាំងសាច់សត្វនោះ ចំពោះបទល្មើសនាំចូលសាច់សត្វ ឬគ្រោងឆ្អឹងដោយគ្មានការអនុញ្ញាត រួមទាំងបទល្មើសពាក់ព័ន្ធផ្សេងទៀត ដែលអាចរឹបអូសយកសាច់បាន និងថែមទាំងប្រឈមទោសទណ្ឌបន្ថែមទៀតផង។
សូមបញ្ជាក់ថា នៅខ្មែរ ក៏មានឃ្លាំងខ្មែរឥស្លាម នាំចូលសាច់គោប្រភេទនេះផងដែរ ដោយបានចែកចាយនៅក្នុងទីក្រុងភ្នំពេញ ពិសេសនៅព្រែកប្រា និងគីឡូលេខ៧ និងទៅតាមបណ្តាខេត្ត ប៉ុន្តែ មិនដឹងថា នាំចូលមានច្បាប់អនុញ្ញាត និងត្រូវបានត្រួតពិនិត្យត្រឹមត្រូវ ឬយ៉ាងណានោះទេ៕ រក្សាសិទ្ធិដោយ៖ លឹម ហុង
