គេហទំព័រ Mirror នៅថ្ងៃទី២ ខែកក្កដា ឆ្នាំ២០២៣ បានរាយការណ៍ឲ្យដឹងថា យន្តហោះពីរគ្រឿងរបស់កងទ័ពអាកាសកូឡុំប៊ី បានបើកប៉ះទង្គិចគ្នានៅពាក់កណ្តាលអាកាស ក្នុងអំឡុងពេលហ្វឹកហាត់ហោះហើរ ដែលជាលទ្ធផល យន្តហោះមួយក្នុងចំណោមនោះ បានធ្លាក់ដល់ដីដ៏រន្ធត់ ខណៈ១គ្រឿងទៀតអាចចុះចតទាន់ពេល។ ឧបទ្ទវហេតុនេះបានបណ្តាលឲ្យអ្នកបើកយន្តហោះម្នាក់ស្លាប់ និងម្នាក់ទៀតរងរបួស។
ហេតុការណ៍នេះបានកើតឡើងកាលពីវេលាម៉ោង ៥ និង ៣០ នាទី ល្ងាចពីថ្ងៃទី១ កក្កដា ។ តាមរយៈវីដេអូឃ្លីបបានបង្ហាញឲ្យឃើញថា នៅពេលគ្រោះថ្នាក់កើតឡើង, គេបានឃើញយន្តហោះចំនួន ៥ គ្រឿង បានហោះហើរជាមួយគ្នា ប៉ុន្តែ រំពេចនោះ យន្តហោះមួយគ្រឿងស្រាប់តែងាកហើយបុកជាមួយមួយគ្រឿងទៀត រហូតធ្វើឲ្យយន្តហោះ១គ្រឿង ត្រូវភ្លើងឆេះធ្លាក់មកដីខាងក្រោមតែម្តង ខណៈមួយទៀត អាចរក្សាកម្ពស់របស់វា មុនពេលចុះចតជាបន្ទាន់។
កងទ័ពអាកាសកូឡុំប៊ី បានចេញសេចក្តីថ្លែងការណ៍បញ្ជាក់ថា យន្តហោះហ្វឹកហាត់ T-27 Tucano ពីរគ្រឿង បានបុកគ្នានៅឯមូលដ្ឋានទ័ពអាកាសមួយក្នុងខេត្ត Meta ភាគកណ្តាលប្រទេសកូឡុំប៊ី។ អ្នកបើកយន្តហោះដែលបានស្លាប់ មានបទពិសោធន៍ហោះហើរយ៉ាងហោចណាស់ ១៣ ឆ្នាំ ជាមួយកងទ័ពអាកាសថៃ។
អ្នកបើកយន្តហោះ ត្រូវបានគេរំពឹងថា នឹងហ្វឹកហាត់ដើម្បីហោះហើរសម្រាប់ពិព័រណ៍អាកាសចរណ៍ ដែលនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី១៦ ខែកក្កដា។ ទោះជាយ៉ាងណា សម្រាប់មូលហេតុនៃគ្រោះថ្នាក់នេះនៅមិនទាន់ដឹងច្បាស់នៅឡើយទេ និងកំពុងត្រូវបានស៊ើបអង្កេតផងដែរ៕ រក្សាសិទ្ធិដោយ៖ លឹម ហុង
