នេះជាគ្រោះថ្នាក់ដ៏រន្ធត់ទៀតហើយ ដែលបានកើតឡើងអំឡុងពេលជួសជុលស្ពានអាកាស ឆ្លងកាត់ផ្លូវប្រសព្វក្រុងបាងកាពី (ប្រទេសថៃ) គឺខណៈពេលកំពុងធ្វើការដកបន្ទះដែកក្រោមស្ពានដែលមានប្រវែងប្រហែល១០ម៉ែត្រ ស្រាប់តែធ្លាក់មកក្រោម ត្រូវចំកម្មករ២នាក់ បណ្តាលរបួសធ្ងន់១នាក់ និងម្នាក់ទៀតស្លាប់នៅមន្ទីរពេទ្យ។
កាលពីម្សិលមិញ (១៧ សីហា ២០២៣) ទូរទស្សន៍ប៉ុស្តិ៍លេខ៣ បានរាយការណ៍ថា នៅកណ្តាលយប់ មានករណីគ្រោះថ្នាក់ នៅស្ពានអាកាស ឆ្លងផ្លូវកាត់ Bang Kapi បណ្តាលឲ្យមនុស្ស៣នាក់ ក្នុងនោះមានម្នាក់សន្លប់បាត់ស្មារតី ដោយសារធ្លាក់ពីលើកម្ពស់ប្រហែល១០ម៉ែត្រ ខណៈកំពុងធ្វើការ មុនពេលគាត់ស្លាប់នៅមន្ទីរពេទ្យ។
លោក Chaiwat Boonprasom អ្នកជួយសង្គ្រោះមកពីមូលនិធិ Siam Ruamjai (Pu In) បានប្រាប់ឲ្យដឹងថា ហេតុការណ៍នេះកើតឡើងនៅម៉ោងប្រហែល ១ និង ៥០ នាទីទៀបភ្លឺ ហើយគាត់បានឮសំឡេងស្រដៀងនឹងវត្ថុធំមួយធ្លាក់។ ពេលនោះមានកម្មករមួយក្រុមបានមករាយការណ៍ថា មានអ្នករបួស ខណៈកំពុងប្រើរថយន្តស្ទូចចំនួន២គ្រឿង យកខ្សែរមកចងជាប់នឹងបន្ទះដែកក្រោមស្ពាន ដើម្បីដកចេញ។
ពេលនោះខ្សែដែកមិនជាប់នឹងបន្ទះដែកទាំង៤ជ្រុងទេ ដែលបណ្តាលឱ្យបន្ទះដែក របូតធ្លាក់មកបុកកម្មករដែលជិះឡានស្ទូច និងនៅលើរន្ទា បណ្តាលឱ្យបាក់ ធ្លាក់កម្មករប្រុសម្នាក់រងរបួសធ្ងន់ធ្ងរ និងបានស្លាប់នៅមន្ទីរពេទ្យ ខណៈស្ត្រីកម្មករម្នាក់ទៀត រងរបួសជើងស្រាល។
ហេតុការណ៍នេះបានកើតឡើង គឺនៅពេលការជួសជុលស្ពាន កំពុងធ្វើការរុះរើគ្រឿងបង្គុំស្ពានដែក។ ចំពោះមូលហេតុនៃការធ្លាក់បន្ទះដែកនេះ គឺស្ថិតនៅក្រោមការស៊ើបអង្កេតយ៉ាងហ្មត់ចត់ ព្រោះក្រោយកើតហេតុមិនឃើញមានមន្ត្រី ឬកម្មករធ្វើការនៅតំបន់នោះទេ៕ រក្សាសិទ្ធិដោយ៖ លឹម ហុង
