តាកែវ ៖ ថ្លែងចេញពីពិធីជួបសំណេះសំណាល និងហូបបាយសាម្គីជាមួយបងប្អូនប្រជាពលរដ្ឋនៅឃុកណ្តឹង ស្រុកបាទី ខេត្តតាកែវប្រមាណងជាង៤០០គ្រួសារ លោក ថៃ ផានី ជំនួយការខុន្ទការល័យក្រសួងការពារជាតិ និងជាអនុប្រធានគណៈពង្រឹងខេត្តសៀមរាប បានមានប្រសាសន៍ថា កម្ពុជានាពេលបច្ចុប្បន្ននេះ មានភាពរីកចម្រើន ដែលមិនគួរឲ្យជឿ ហើយភាពរីកចម្រើននេះ គឺកើតចេញពីស្រុកទេសរបស់យើងមានសុខសន្តិភាព ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ជានាយករដ្ឋមន្ត្រី ។
ថ្លែងចំពោះមុខប្រជាពលរដ្ឋ ដែលបានចូលរួមក្នុងនៅក្នុងពិធីនេះ នាព្រឹកថ្ងៃអាទិត្យ ទី២៣ ខែកក្កដា ឆ្នាំ២០១៨ លោក ថៃ ផានី បានបន្តថា កត្តាសុខសន្តិភាពនេះហើយ ដែលអាចឲ្យយើងមានឱកាសច្រើន ក្នុងការកសាងប្រទេសជាតិឲ្យមានការរីកចម្រើន និងបន្តអភិវឌ្ឍន៍ថែមទៀត ជាពិសេសគឺសន្តិភាពនេះហើយ ដែលជាមូលដ្ឋានគ្រឹះដ៏សំខាន់មិនអាចខ្វះបានឡើយ ។ ភាពរីកចម្រើនទាំងនេះ គឺកើតចេញពីការខិតខំប្រឹងប្រែងរបស់រាជរដ្ឋាភិបាលកម្ពុជា ដែលមានសម្តេចតេជាហ៊ុនសែនជាប្រមុខដឹកនាំ និងប្រជាពលរដ្ឋ ដែលបានចូលរួមចំណែកក្នុងការកសាងឲ្យសមិទ្ធិផលនានាដូចជាមន្ទីរពេទ្យ សាលារៀន ផ្លូវថ្នល់ វត្តអារាម កើតមានឡើងជាបន្តបន្ទាប់ ដូច្នោះតម្លៃសន្តិភាពនេះពិតជាមិនអាចកាត់ថ្លៃបានឡើយ និងពិតជាពិបាករកបានណាស់ ។
សូមបញ្ជាក់ផងដែរថា ដោយមើលឃើញពីការលំបាកក្នុងការធ្វើការដំណើរដឹកកសិផល ដំណាំ នានា របស់ប្រជាពលរដ្ឋ និងការលំបាកធ្វើដំណើរទៅមករបស់បងប្អូនកម្មកររោងចក្រ លោក ថៃ ផានី និងលោកស្រី ហ៊ុន ចាន់ថុល បានចំណាយថវិការផ្ទាល់ខ្លួន ជួយធ្វើផ្លូវលំមួយខ្សែ នៅឃុំកណ្តឹង ស្រុកបាទី ប្រវែងជិត ២គីឡូម៉ែត្រ ដើម្បីសម្រួលលើការចរាចរណ៍ ហើយមិនតែប៉ុណ្ណោះ លោក ក៏បានអំពាវនាវ អោយបងប្អូនប្រជាពលរដ្ឋនៅឃុំកណ្តឹងណា ដែលជួបការលំបាក និងមានបញ្ហាដោះស្រាយមិនចេញ ឬស្ត្រីមានផ្ទៃពោះ ខ្វះខាតថវិការ សូមទំនាក់ទំនងលោកមេភូមិ ឃុំ រាយការណ៏ភ្លាម នោះលោកនិងជួយតាមលទ្ធភាពដែលអាចជួយទៅបាន ៕ តាកែវ
