សៀវភៅការទូតអាហារ កេរដំណែលនៃស្នាដៃម្ហូបខ្មែរ ឈ្នះពានរង្វាន់ទូរទស្សន៍ម្ហូបអាហារល្អដាច់គេលើពិភពលោក

ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ បានចេញសេចក្តីប្រកាសព័ត៌មានថា សៀវភៅ «កេរដំណែលស្នាដៃម្ហូបខ្មែរ» (The Taste of Angkor) ដែលរៀបចំចងក្រង និងបោះពុម្ពផ្សាយដោយក្រសួងការបរទេស និងសហប្រតិបត្តិការអន្តរជាតិ និងជាផ្នែកមួយនៃការទូតអាហារ របស់ក្រសួងបានទទួលជ័យលាភីជាថ្មីម្តងទៀតគឺ «ពានរង្វាន់ទូរទស្សន៍ម្ហូបអាហារល្អដាច់គេលើពិភពលោក» (Best Television Awards in the World) នៅក្នុងកម្មវិធីប្រកួតពានរង្វាន់សៀវភៅមុខម្ហូបពិភពលោក ប្រចាំឆ្នាំនេះ (The Gourmand World Cookbook Awards) ដែលបានប្រារព្ធធ្វើឡើងពីថ្ងៃទី២៧ ដល់ថ្ងៃទី២៩ ខែវិច្ឆិកា ឆ្នាំ២០២៣ នៅទីក្រុងរីយ៉ាត ព្រះរាជាណាចក្រអារ៉ាប៊ីសាអ៊ូឌីត

កម្មវិធីនេះ ត្រូវបានរៀបចំឡើងព្រមគ្នានៅក្នុងពិធីបុណ្យអាហារសាអូឌីត (Saudi Feast Food Festival)។ ក្រសួងបានរំលឹកថា កាលពីឆ្នាំ២០២១ និងឆ្នាំ២០២២ កន្លងទៅ សៀវភៅ «កេរដំណែលស្នាដៃម្ហូបខ្មែរ» បានទទួល បានជ័យលាភីជាសៀវភៅមុខម្ហូបអាស៊ីដែលល្អផ្តាច់គេ (The Best Asian Cookbook) និងពានរង្វាន់ សៀវភៅមុខម្ហូបសម្រាប់ប្រមុខរដ្ឋ (Best Heads of State/Food) នៅក្នុងកម្មវិធីប្រកួតពានរង្វាន់ សៀវភៅមុខម្ហូបពិភពលោកនេះ។ ការឈ្នះជ័យលាភីឆ្នាំនេះ «ពានរង្វាន់ទូរទស្សន៍ម្ហូបអាហារល្អដាច់គេលើពិភពលោក» បានឆ្លុះបញ្ចាំងអំពីនយោបាយការបរទេសរបស់ក្រសួងការបរទេស និងសហប្រតិបត្តិការអន្តរជាតិ ក្នុងការលើកស្ទួយម្ហូបអាហារខ្មែរដ៏ពិតប្រាកដទៅដល់ពិភពលោក។ ការទទួលបានជ័យលាភីនេះ ពិតជាមោទនភាព និងកិត្តិយសសម្រាប់ការខិតខំប្រឹងប្រែងរបស់កម្ពុជា ក្នុងការផ្សព្វផ្សាយឱ្យពិភពលោកស្គាល់ និងផ្តល់តម្លៃចំពោះមរតកដ៏មហិមានៃម្ហូបខ្មែរដែលមានអាយុកាលរាប់ពាន់ឆ្នាំមកហើយ។

បើតាមក្រសួងការបរទេស ពានរង្វាន់ទូរទស្សន៍ម្ហូបអាហារល្អដាច់គេលើពិភពលោក» សម្រាប់ឆ្នាំ២០២៣ បានផ្តល់ មកឱ្យកម្ពុជាទៅលើវីដេអូឃ្លីបដែលបង្ហាញអំពីការចម្អិនម្ហូបខ្មែរចំនួន៧មុខ និងបង្អែមចំនួន ២មុខ ដកស្រង់ ចេញពីសៀវភៅ «កេរដំណែលស្នាដៃម្ហូបខ្មែរ»។ វគ្គបណ្តុះបណ្តាលមួយ ជាជំនួយដល់ស្ថានបេសកកម្មការទូតកម្ពុជារនៅបរទេស ស្វែងយល់ឱ្យកាន់តែច្បាស់ពីសិល្បៈនៃការចម្អិនម្ហូបខ្មែរ និងបង្កើនសមត្ថភាពពន្យល់អំពីប្រវត្តិ ម្ហូបខ្មែរដល់បរទេស ហើយក៏ជាការចូលរួមប្រកបដោយបុរេសកម្មនៃវិស័យការទូតក្នុងការផ្សព្វផ្សាយពី មុខម្ហូប និងវប្បធម៌ខ្មែរ ទាក់ទាញភ្ញៀវទេសចរបរទេស និងការវិនិយោគ និងការពង្រីកការនាំចេញ ផលិតផលកសិកម្មទៅកាន់ទីផ្សារបរទេស។

ការទូតអាហារ គឺជាផ្នែកមួយដ៏សំខាន់នៃអភិក្រមយុទ្ធសាស្ត្ររបស់ក្រសួងការបរទេស និង សហប្រតិបត្តិការអន្តរជាតិ ក្នុងការអនុវត្តយុទ្ធសាស្រ្តការទូតសេដ្ឋកិច្ចរបស់ក្រសួងដែលបានដាក់ចេញ កាលពីឆ្នាំ ២០២១។ គោលបំណងនៃយុទ្ធសាស្ត្រនេះ គឺដើម្បីលើកស្ទួយកិត្យានុភាពកម្ពុជានៅលើឆាក អន្តរជាតិ និងរួមចំណែកជាមួយរាជរដ្ឋាភិបាលឈានទៅសម្រេចនូវចក្ខុវិស័យរបស់កម្ពុជា ប្រែក្លាយជា ប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានចំណូលខ្ពស់នៅឆ្នាំ ២០៥០៕