ភ្នំពេញ ៖ តំណាងប្រទេសទាំង៦ ដែលជាអ្នកសង្កេតការណ៍បោះឆ្នោតអន្តរជាតិ បានវាយតម្លៃថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ នៅក្នុងប្រទេសកម្ពុជា ប្រព្រឹត្តទៅដោយសេរី ត្រឹមត្រូវ និងយុត្តិធម៌។
ប៉ុន្តែក៏មានការចោទសួរនូវសំណួរជាច្រើន ដូចជា ហេតុអ្វីបានជាកម្ពុជាមានចំនួនអ្នកចេញទៅបោះឆ្នោតច្រើន? តើសន្លឹកឆ្នោតមិនបានការមានចំនួនច្រើនប៉ះពាល់ដល់លទ្ធផលនៃការបោះឆ្នោតដែរឬទេ? និងការប្រកាសមិនទទួលស្គាល់លទ្ធផលនៃការបោះឆ្នោតពីប្រទេសមួយចំនួនដូចជា សហរដ្ឋអាមេរិក ជាដើម តើអាចមានអ្វីកើតឡើង? ឆ្លើយតបទៅនឹងសំណួរខាងលើ លោក សោម សូរីដា អគ្គលេខាធិការរង គ.ជ.ប បានពន្យលថា មូលហេតុដែលនាំឲ្យកម្ពុជាមានអ្នកចេញទៅបោះឆ្នោតមានចំនួនច្រើន ដោយសារ កម្ពុជាមានសន្តិសុខ សុវត្ថិភាព និងសណ្តាប់ធ្នាប់ គ.ជ.ប បានប្រើប្រាស់គ្រប់មធ្យោបាយ ដើម្បីផ្សព្វផ្សាយព័ត៌មានដល់អ្នកបោះឆ្នោត ពលរដ្ឋខ្មែរស្រឡាញ់ និងត្រូវការលទ្ធិប្រជាធិបតេយ្យ ។ល។
ចំពោះសន្លឹកឆ្នោតមិនបានការមានច្រើននៅនីតិកាលនេះ លោក សោម សូរីដា ឆ្លើយថា គឺយើងត្រូវទទួលស្គាល់ទាំងអស់គ្នា ប៉ុន្តែសន្លឹកឆ្នោតមិនបានការក៏បានបង្ហាញឆន្ទៈរបស់ប្រជាពលរដ្ឋ ឆន្ទៈបែបណាយើងមិនអាចវាយតម្លៃបានទេ ការបោះឆ្នោតត្រូវធ្វើឡើងជាសម្ងាត់ ប្រការនេះ គួរគណបក្សឈ្នះឆ្នោតយកទៅពិចារណា។
សំណួរចុងក្រោយ លោកហង្ស ពុទ្ធា ពន្យលថា ការវាយតម្លៃការបោះឆ្នោតនៅកម្ពុជា ដោយពាក់វ៉ែនតាខ្មៅ ប្រាកដជាមើលទៅឃើញខ្មៅហើយ ចំពោះអ្នកដែលបានចូលរួមសង្កេតការណ៍បោះឆ្នោត នៅកម្ពុជាវិញ ពិតណាស់ពួកគេពិតជាបានមើលឃើញ អំពីលទ្ធផលប្រជាធិបតេយ្យនៅកម្ពុជា។
លោកហង្ស ពុទ្ធា មានប្រសាសន៍ថា ការបោះឆ្នោត នីតិកាលទី៦ នេះមានប្រជាពលរដ្ឋជាង៨០ភាគរយ បានចេញទៅបោះឆ្នោត ។ នេះបង្ហាញឲ្យឃើញថា ប្រជាពលរដ្ឋកម្ពុជា ស្រឡាញ់ និងត្រូវការលទ្ធិប្រជាធិបតេយ្យ។ ហើយការប្រកាសលទ្ធនៃការបោះឆ្នោតត្រូវធ្វើឡើងជា៤ដំណាក់កាល គឺការប្រកាសលទ្ធផលនៅតាមការិយាល័យបោះឆ្នោត ការប្រកាសលទ្ធផលបឋមនៃការបោះឆ្នោត ការប្រកាសលទ្ធផលបណ្តោះអាសន្ននៃការបោះឆ្នោត និងការប្រកាសលទ្ធផលផ្លូវការនៃការបោះឆ្នោត។
បើយោងតាមសេចក្តីប្រកាសព័ត៌មានរបស់ គ.ជ.ប នៅរសៀលថ្ងៃទី៣០ ខែកក្កដានេះ បានឱ្យដឹងថា ប្រទេសទាំង៦នោះរួមមាន៖ ប្រទេសម៉ាឡេស៊ី ប្រទេសរុស្ស៊ី ប្រទេសឡាវ ប្រទេសឥណ្ឌា ប្រទេសថៃ និងប្រទេសវៀតណាម។ ជាមួយគ្នានេះ តំណាងប្រទេសទាំង៦នេះ បានបង្ហាញពីចំណាប់អារម្មណ៍ម្នាក់ម្តងៗ ពួកគាត់បានវាយតម្លៃថា ការបោះឆ្នោតជ្រើសតាំងតំណាងរាស្ត្រ ប្រព្រឹត្តទៅដោយសេរី ត្រឹមត្រូវ យុត្តិធម៌ មានសន្តិសុខ សណ្តាប់ធ្នាប់ល្អ និងគ្មានអំពើហិង្សា៕ ដោយ៖កូឡាប
សម្រាប់ព័ត៌មានលម្អិត សូមអានសេចក្តីជូនដំណឹងរបស់ គ.ជ.ប ដូចខាងក្រោម៖
