ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី៣ ខែសីហា ឆ្នាំ២០១៨នេះ បានចេញសេចក្តីបំភ្លឺចំពោះការចោទប្រកាន់របស់ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ទៅលើមន្ត្រីបោះឆ្នោត។
សូមជម្រាបជូនថា គ.ជ.ប បានទទួលបណ្តឹងពី LDP ចំនួន ២.៥៩២ ក្នុងនោះបណ្តឹងដែលពាក់ព័ន្ធនឹងគំនូសសញ្ញានៅលើសន្លឹកឆ្នោតមានរហូតទៅ ២.៤៩៣បណ្តឹង ហើយបណ្តឹងដែលពាក់ព័ន្ធនឹងការផ្តន្ទាទោសមានចំនួនត្រឹមតែ៩៩បណ្តឹង សម្រាប់៩៩ការិយាល័យនៃការិយាល័យបោះឆ្នោត សរុបចំនួន២២.៩៦៧។ ដូច្នេះការនិយាយរបស់ ខឹម វាសនា ប្រធាន LDP នៅវិទ្យុបារាំង RFI
កាលពីថ្ងៃទី១ ខែសីហា ឆ្នាំ២០១៨ មិនឆ្លុះបញ្ចាំងពីការពិតនៃបណ្តឹង ដែលភាគច្រើនលើសលុបគាត់ប្តឹងពីគំនូសសញ្ញាគាំទ្រគណបក្បនយោបាយ នៅលើសន្លឹកឆ្នោត ។
ជាទូទៅ ការថ្លែងណាមួយ គួរផ្អែកទៅលើភស្តុតាង និងមូលដ្ឋានច្បាស់លាស់ ដើម្បីចៀសវាងការភាន់ច្រឡំដែលនាំឲ្យបាត់ទំនុកចិត្តទៅលើការបោះឆ្នោត ដែលជាសមត្ថកិច្ចពេញលេញរបស់ គ.ជ.ប ស្របតាមរដ្ឋធម្មនុញ្ញ និងច្បាប់។
សូមបញ្ជាក់ជាថ្មីម្តងទៀត រាល់ការផ្សព្វផ្សាយព័ត៌មាន ពាក់ព័ន្ធនឹងការបោះឆ្នោត ដែលមិនចេញពីគ.ជ.ប មិនមែនជាព័ត៌មានផ្លូវការទេ ហើយគ.ជ.ប មិនទទួលខុសត្រូវចំពោះការផ្សព្វផ្សាយទាំងនោះ និងស្នើសុំប្រព័ន្ធផ្សព្វផ្សាយជាតិ និងអន្តរជាតិ ទាំងអស់ ព្រមទាំងសាធារណជន ជ្រាប់ជាព័ត៌មាន៕ ដោយ ៖ កូឡាប
ខាងក្រោមនេះជាសេចក្តីបំភ្លឺរបស់គ.ជ.ប៖