ភ្នំពេញ ៖ គណៈរដ្ឋមន្ត្រីអាណត្តិទី៦ ដែលដឹកនាំក្បាលម៉ាស៊ីន ដោយសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី ក្នុងអាណត្តិទី៥ និងអនាគត ជានាយករដ្ឋមន្ត្រី សម្រាប់អាណត្តិទី៦ (២០១៨.២០២៣) នឹងចាប់ផ្តើមចេញដំណើរជាផ្លូវ តាមរយៈកិច្ចប្រជុំគណៈរដ្ឋមន្ត្រីជាផ្លូវការ នាព្រឹកថ្ងៃសុក្រ ទី៧ ខែកញ្ញា ឆ្នាំ២០១៨ខាងមុខនេះ។
នេះបើតាមការប្រកាសជាសាធារណៈរបស់សម្តេចតេជោ ក្នុងឱកាសដែលសម្តេចជួបសំណេះសំណាល ជាមួយកម្មករ កម្មការិនី ជិត២ម៉ឺននាក់ មកពីរោងចក្រសហគ្រាសចំនួន១៤ នៅក្នុងខេត្តកំពង់ស្ពឺ នាព្រឹកថ្ងៃទី៨ ខែសីហា ឆ្នាំ២០១៨នេះ។
សម្តេចតេជោ បានបញ្ជាក់ថា នៅព្រឹកថ្ងៃទី៥ ខែកញ្ញា សភានិងកោះប្រជុំសភា ក្រោមព្រះរាជាធិបតីដ៏ខ្ពង់ខ្ពស់ របសព្រះមហាក្សត្រ នៃព្រះរាជាណាចក្រកម្ពុជា ព្រះករុណា ព្រះបាទសម្តេចព្រះបរមនាថ នរោត្តម សីហមុនី ហើយនៅរសៀលថ្ងៃដដែល ប្រកាសស្បថចូលកាន់មុខដំណែង និងក្បាលម៉ាស៊ីន ជាផ្លូវការ សមាជិករដ្ឋសភា។ បន្ទាប់មកនៅព្រឹកថ្ងៃទី៦ កញ្ញា ប្រកាសបង្កើតក្បាលម៉ាស៊ីន គណៈរដ្ឋមន្ត្រីថ្មីអាណត្តិថ្មីទី៦ ហើយនៅរសៀល សមាជិកសមាជិការគណៈរដ្ឋមន្ត្រីថ្មីស្បថចូលកាន់តំណែង នឹងនៅព្រឹកថ្ងៃសុក្រ ទី៧កញ្ញា គណៈរដ្ឋមន្ត្រីថ្មី ចាប់ផ្តើមបើកសម័យប្រជុំពេញអង្គរបស់ខ្លួនជាផ្លូវការ ក្រោមអធិបតីភាព សម្តេចតេជោហ៊ុនសែន នាយករដ្ឋមន្ត្រី នៃកម្ពុជា សម្រាប់អាណត្តិទី៦។
សម្តេចតេជោបានថ្លែងថា គណៈរដ្ឋមន្ត្រីអាណត្តិថ្មីនេះ និងធ្វើកិច្ចការងារទ្វេរដង និងកាន់តែសកម្ម និងប្រសិទ្ធភាពជាងមុន ដើម្បីបម្រើផលប្រយោជន៍ប្រជាពលរដ្ឋខ្មែរទូទាំងប្រទេស ដែលបានបោះឆ្នោតគាំទ្រ គណបក្សប្រជាជនកម្ពុជា កាលពីថ្ងៃទី២៩ កក្កដា ២០១៨ ដើម្បីសម្តេចបន្តដឹកនាំនាវាកម្ពុជា អោយកាន់តែរីកចម្រើន ជាមួយសុខសន្តិភាព រួមនិងការអភិវឌ្ឍន៍សង្គមជាតិ ជាមួយកំណើនសេដ្ឋកិច្ចកាន់តែរឹងមាំ។
សម្តេចតេជោ ហ៊ុន សែន បានថ្លែងថា ម្សិលមិញនេះ សម្តេចបានចូលគាល់ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដើម្បីសុំព្រះរាជទានពីព្រះអង្គ ទៅលើការកែប្រែនូវកាលបរិច្ឆេទស្តីពីការកោះប្រជុំសភា និងការបង្កើតរាជរដ្ឋាភិបាលនៅក្នុងអាណត្តិថ្មី។ កាលពីមុននោះ យើងបានគ្រោងទុកថា ការប្រជុំសភាលើកដំបូង ធ្វើនៅថ្ងៃទី១៩ ខែកញ្ញា ហើយល្ងាចថ្ងៃទី១៩ ខែកញ្ញាសភាស្បថចូលកាន់តំណែង។ ព្រឹកថ្ងៃទី២០ ខែកញ្ញា បង្កើតរាជរដ្ឋាភិបាល ល្ងាចថ្ងៃទី២០ ខែកញ្ញា រាជរដ្ឋាភិបាលស្បថចូលកាន់តំណែង ហើយនៅថ្ងៃទី២១កញ្ញា គណៈរដ្ឋមន្ត្រីប្រជុំលើកដំបូង ប៉ុន្តែបន្ទាប់ពីពិគ្រោះយោបល់ជាមួយ ប្រធានក្រុមប្រឹក្សាធម្មនុញ្ញ និងប្រធានគណៈកម្មាធិការជាតិរៀបចំការបោះឆ្នោត គឺកាលបរិច្ឆេទនេះត្រូវបានប្តូរដោយកំណត់យកថ្ងៃទី៥ ខែកញ្ញា ឆ្នាំ២០១៨ ដើម្បីប្រជុំសភាលើកដំបូងវិញ។ ការផ្លាស់ប្តូរត្រូវបានបញ្ជាក់ប្រាប់ទៅប្រជាពលរដ្ឋជាម្ចាស់ឆ្នោត ឲ្យបានដឹង អំពីគម្រោងដែលត្រូវធ្វើបន្តថា យើងត្រូវបង្កើតរាជរដ្ឋាភិបាលមុន និងប្រជុំសភាមុនកាលបរិច្ឆេទ នៅត្រង់ថា នៅព្រឹកថ្ងៃពុធ ទី៥ ខែកញ្ញា សភានឹងកោះប្រជុំលើកដំបូង ក្រោមព្រះរាជអធិបតីភាពរបស់ព្រះមហាក្សត្រ នៅល្ងាចថ្ងៃទី៥ កញ្ញា សភានឹងចូលស្បថកាន់តំណែង។ ថ្ងៃព្រហស្បតិ៍ទី៦ ខែកញ្ញា នឹងបង្កើតឡើងនូវក្បាលម៉ាស៊ីនរដ្ឋសភា ក៏ដូចជាបង្កើតនូវរាជរដ្ឋាភិបាលថ្មី ដល់ពេលល្ងាចថ្ងៃទី៦ ខែកញ្ញា
គឺរាជរដ្ឋាភិបាល នឹងស្បថចូលកាន់តំណែង ដល់ពេលព្រឹកថ្ងៃទី៧ ត្រូវនឹងថ្ងៃសុក្រ គណៈរដ្ឋមន្ត្រីថ្មី នឹងបើកកិច្ចប្រជុំលើកដំបូង។ នេះជាប្រតិទិនជាក់លាក់ ដែលត្រូវបានជម្រាបជូនប្រជាពលរដ្ឋជាម្ចាស់ឆ្នោត ។
សម្តេច បានថ្លែងបន្តថា ការកែប្រែនេះមិនមានខុសច្បាប់ ឬរដ្ឋធម្មនុញ្ញនោះទេ ព្រោះច្បាប់បានកំណត់ថា ការបង្កើតរដ្ឋសភា ត្រូវធ្វើឡើងយ៉ាងយូរ៦០ថ្ងៃ ក្រោយប្រកាសលទ្ធផលបោះឆ្នោត។ សម្តេចតេជោ បានថ្លែងថា ថ្ងៃទី១៥ ខែសីហា គ.ជ.ប នឹងប្រកាសលទ្ធផលផ្លូវការ ហើយអំឡុងពេលនោះ ទុកឱ្យមានការប្តឹងតវ៉ា និងដោះស្រាយតាំងពីថ្នាក់គ.ជ.ប រហូតដល់ក្រុមប្រឹក្សាធម្មនុញ្ញ។ ដូច្នេះ១០ថ្ងៃ វាគ្រប់គ្រាន់សម្រាប់ក្រុមប្រឹក្សាធម្មនុញ្ញហើយ ដូច្នេះនៅដើមខែកញ្ញា គណៈកម្មការជាតិរៀបចំការបោះឆ្នោត អាចនឹងប្រកាស លទ្ធផលស្ថាពរ បែងចែកអាសនៈ និងកំណត់ឈ្មោះអ្នកដែលជាប់ឆ្នោត ដូច្នេះដល់ព្រះរាជតួនាទីរបស់ព្រះមហាក្សត្រ ដែលព្រះអង្គត្រូវកោះប្រជុំតែម្តង៕ ដោយ ៖ កូឡាប
