ភ្នំពេញ៖ លោក កឹម សុខា នឹងត្រូវតុលាការកំពូលដោះលែងអោយនៅក្រៅឃុំ ឬយ៉ាងណា? នាព្រឹកម៉ោង 8ព្រឹកថ្ងៃទី២២ ខែសីហា ឆ្នាំ២០១៨ តុលាការកំពូលបើកសវនាការជំនុំជម្រះ លើការស្នើសុំនៅក្រៅឃុំជាបណ្តោះអាសន្នរបស់លោកកឹម សុខា។
នេះជាសវនាការ ជំនុំជម្រះលើបណ្តឹងសុំនៅក្រៅឃុំ ជាលើកទី២ របស់លោក កឹម សុខា អតីតប្រធាននៃគណបក្សសង្គ្រោះជាតិ។
លោកម៉ុត ចន្ថា នាយកខុទ្ទកាល័យលោកកឹម សុខា បានថ្លែងថា តុលាការកំពូលបើកសវនការលើសំណើសុំនៅក្រៅឃុំរបស់ ឯកឧត្តម កឹម សុខា ប្រធានគណបក្សសង្គ្រោះជាតិ ប៉ុន្តែពុំមានវត្តមានរបស់លោកឡើយ។ សូមថ្លែងអំណរគុណចំពោះបងប្អូនជនរួមជាតិ និងអន្តរជាតិដែលចូលរួមសង្កេតការណ៍ព្រឹត្តិការណ៍នេះ។
បើតាមអង្គសេចក្តី សវនាការនេះ គឺធ្វើឡើងដោយសារមេធាវីរបស់លោក កឹម សុខា មិនសុខចិត្តនឹងសេចក្តីសម្រេចរបស់តុលាការកំពូល កាលថ្ងៃទី៩ ខែមីនា ឆ្នាំ២០១៨ ដោយបានសម្រេចតម្កល់សាលដីកាសាលាឧទ្ធរណ៍ទុកជាបានការ នឹងតម្រូវឲ្យបន្តឃុំខ្លួន លោក កឹម សុខា ក្នុងពន្ធនាគារបន្តទៀត ដើម្បីសាកសួរ និងការពារកុំឲ្យមានបទល្មើសថ្មីកើតឡើង។
សេចក្តីសម្រេចរបស់តុលាការកំពូលនេះដែរ គឺសំអាងហេតុថា ករណីលោក កឹម សុខា ជាបទល្មើសឧក្រិដ្ឋ ដែលចាំបាច់ត្រូវឃុំខ្លួនដើម្បីស៊ើបសួរ ឲ្យបានហ្មត់ចត់ត្រឹមត្រូវ។
ពាក់ពន្ធ័លើសុំរឿងនេះ ប្រធានចៅក្រុមជំនុំជម្រះ លោក ឃឹម ប៉ុណ្ណ ធ្លាប់បានប្រកាសក្នុងសម្រង់ន័យដើមដោយយោងលើមូលហេតុថា៖ លោក កឹម សុខា បានប្រព្រឹត្តបទល្មើស សន្ទិដ្ឋភាពជាមួយបរទេស ចាប់តាំងពីឆ្នាំ១៩៩៣ ដល់ឆ្នាំ២០១៧។ បទល្មើសនេះជាបទឧក្រិដ្ឋ ដូច្នេះការស៊ើបសួរត្រូវហ្មត់ចត់ត្រឹមត្រូវ។
លោក កឹម សុខា ត្រូវបានសមត្ថកិច្ចចាប់ខ្លួនពីក្នុងផ្ទះទាំងកណ្ដាលយប់ កាលពីដើមខែកញ្ញា ឆ្នាំ២០១៧ ដោយចោទពីបទ ក្បត់ជាតិ និងបញ្ជូនលោកទៅឃុំក្នុងពន្ធនាគារត្រពាំងផ្លុង នៅខេត្តត្បូងឃ្មុំ។ លោក កឹម សុខា ត្រូវបានចោទប្រកាន់ពីបទ សន្ទិដ្ឋិភាពជាមួយបរទេស តាមមាត្រា ៤៤៣នៃក្រមព្រហ្មទណ្ឌ។
បើតាមក្រមព្រហ្មទណ្ឌកម្ពុជា សន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំដល់៣០ឆ្នាំ៕ ដោយ ៖ បញ្ញាស័ក្តិ