ឧត្តមសេនីយ៍ត្រី ទិត សាវុឌ្ឍី គ្រូនគរបាលជាតិ ទទួលមរណភាពដោយគ្រោះថ្នាក់ចរាចរណ៍ បើករថយន្តបុករបាំងថ្ម

កណ្តាល ៖ ហេតុការណ៍គ្រោះថ្នាក់ចរាចរណ៍ ដែលបង្កឡើងរថយន្តLEXUS RX330 ពណ៍ខៀវ ពាក់ផ្លាកលេខ ភ្នំពេញ 2AY-3977 បុករបាំងថ្មពុះចែកទ្រូងផ្លូវ បណ្តាលអោយស្លាប់ អ្នកបើកបរ០១នាក់ មានឈ្មោះ ទិត សាវុឌ្ឍី ភេទប្រុស អាយុ៥២ឆ្នាំ មានទីលំនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល មានមុខរបរ ជាគ្រូនគរបាលជាតិឧត្តមកម្រិត២ ថ្នាក់លេខ១ ។

ហេតុការណ៍នេះបានកើតឡើងកាលពីថ្ងៃពុធ ៣កើត ខែបុស្ស ឆ្នាំរោង ឆស័ក ព.ស២៥៦៨ ត្រូវនឹងថ្ងៃទី០១ ខែមករា ឆ្នាំ២០២៤ វេលាម៉ោង ២០ និង ២០ នាទី នៅចំណុចខាងមុខឃ្លាំងជី លោក ជៀម តិច នៅលើកំណាត់ផ្លូវជាតិលេខ២១ ស្ថិតនៅភូមិ ព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល។ នគរបាលមូលដ្ឋានបានបញ្ជាក់ពីសភាពនៃរឿងហេតុថា៖ នៅវេលាម៉ោង ថ្ងៃ ខែ ឆ្នាំ កើតហេតុខាងលើ មានរថយន្តមួយគ្រឿងម៉ាក LEXUS RX 330 ពណ៌ខៀវ ពាក់ផ្លាកលេខ ភ្នំពេញ2AY-3977 អ្នកបើកបរឈ្មោះ ទិត សាវុឌ្ឍី ភេទប្រុស អាយុ ៥២ឆ្នាំ មានទីលំនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្ដាល បើកបរមានទិសដៅពីជើងទៅត្បូង ពេលបើកមកដល់កន្លែងកើតហេតុខាងលើ ក៏បានបុករបាំងថ្មទ្រូងផ្លូវបណ្ដាលឲ្យអ្នកបើករថយន្តស្លាប់ភ្លាមៗនៅកន្លែងកើតហេតុ ។
សាកសពបានប្រគល់ជូនបងប្អូនសាច់ញាត្តិលោកគ្រូដើម្បីយកធ្វើបុណ្យតាមប្រពៃណីខ្មែរ ។

មូលហេតុករណីគ្រោះខាងលើ បណ្ដាលមកពីអ្នកបើកបររថយន្ត បើកបរមានល្បឿនលឿនខ្វះការប្រុងប្រយ័ត្ន។

ឯកឧត្ដមនាយឧត្ដមសេនីយ៍ សាស្ដ្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា និងថ្នាក់ដឹកនាំ សាស្ដ្រាចារ្យ មន្ដ្រី ព្រមទាំងនិស្សិត សិក្ខាកាម និងសិស្សនគរបាលពន្ធនាគារទាំងអស់ នៃបណ្ឌិត្យសភានគរបាលកម្ពុជា ផ្ញើសាររំលែកទុក្ខជូនចំពោះ លោកជំទាវ លី ធាវី និងក្រុមគ្រួសារ ចំពោះមរណភាពរបស់ ឯកឧត្តម ឧត្តមសេនីយ៍ត្រី ទិត សាវុឌ្ឍី គ្រូនគរបាលជាតិ ឧត្តមកម្រិត២ ថ្នាក់លេខ១ ដែលត្រូវជាស្វាមី បានទទួលមរណភាពនៅថ្ងៃពុធ ៣កើត ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១ ខែមករា ឆ្នាំ២០២៥ ក្នុងជន្មាយុ ៥២ឆ្នាំ ដោយគ្រោះថ្នាក់ចរាចរណ៍៕ រក្សាសិទ្ធដោយ៖សុទ្ធលី