ជំនួយការម្នាក់របស់អនុរដ្ឋមន្ត្រីក្រសួងមហាផ្ទៃម៉ាឡេស៊ីលោក Datuk Mohd Azis Jamman បានកំពុងប្រឈមមុខនឹងការស៊ើបអង្កេតរបស់ប៉ូលីស បន្ទាប់ពីបុរសរូបនោះត្រូវបានប្រទះឃើញនៅក្នុងវីដេអូ បង្ហាញពីទង្វើមិនសមរម្យរបស់គាត់ ថតផ្នែកខាងក្រោមសំពត់ស្ត្រីម្នាក់បង្កឲ្យមានការផ្ទុះកំហឹងយ៉ាងខ្លាំង ។
បុរសរូបនេះដែលមានអាយុប្រហែល ៤០ ឆ្នាំ ត្រូវបានប្រទេសឃើញនៅក្នុងវីដេអូ ដោយប្រើទូរស័ព្ទស្មាតហ្វូនរបស់គាត់ ដើម្បីថតរូបភាពផ្នែកខាងក្រោមសំពត់ស្ត្រីបុគ្គលិកម្នាក់ នៅក្នុងហាងអប់ទិកមួយ ស្ថិតក្នុងបរិវេណផ្សាទំនើបមួយកន្លែងនៅក្នុងប្រទេសម៉ាឡេស៊ី ។
នៅក្នុងវីដេអូខ្លីមួយ បុរសម្នាក់ត្រូវបានឃើញអង្គុយនៅជាប់នឹងបុរសម្នាក់ដែលគេជឿថាជាលោក Mohd Azis ដែលកំពុងទទួលការពិនិត្យភ្នែករបស់គាត់ដោយស្ត្រីបុគ្គលិកហាងម្នាក់ ។
ហេតុការណ៍នេះ ត្រូវបានគេជឿថា បានកើតឡើងកាលពីថ្ងៃសៅរ៍ ហើយជនរងគ្រោះដែលមានអាយុ ៣០ ឆ្នាំ បានរាយការណ៍ករណីនេះទៅប៉ូលីស ។
នៅក្នុងសេចក្តីថ្លែងការណ៍មួយត្រូវបានបញ្ចេញកាលយប់មិញ Mohd Azis និយាយថា គាត់បានបណ្តេញមន្ត្រីនោះហើយ ។
លោក Mohd Azis បាននិយាយឲ្យដឹងថា៖ «បុគ្គលរូបនេះបានធ្វើការថតយ៉ាងសម្ងាត់ ខណៈខ្ញុំកំពុងទទួលការពិនិត្យភ្នែក ។ ខ្ញុំបានសម្រេចបណ្តេញមន្ត្រីនេះភ្លាមៗ ព្រោះតែទង្វើមិនសមរម្យរបស់គាត់ បានបំផ្លាញកេរ្តិ៍ឈ្មោះរបស់ខ្ញុំ និងភាពជឿទុកចិត្តក្នុងនាមជាអនុរដ្ឋមន្ត្រីមហាផ្ទៃរបស់ខ្ញុំ» ។
លោកបន្ថែមថា៖ «ខ្ញុំបានសុំទោសដល់មហាជននៅទូទាំងប្រទេស ចំពោះសកម្មភាពអសិលធម៌របស់មន្ត្រីរូបនេះ ហើយទង្វើរបស់គាត់អស់ន័យជាមួយមន្ត្រីដទៃ ដែលកំពុងធ្វើការងារជាមួយខ្ញុំទៀតឡើយ» ៕ ចន្ទី (thecoverage.my)
